Nau Tâm Mpơl 9 - Nau Brah Ndu Ngơi 2023

¹ Tông mpăr rơh prăm uh nŭng, gâp saơ du mănh mbing tă bơh trôk tŭp ta neh ntu; bu ăn mănh mbing nây keh khuă brŏng jru.

² Nôk mănh mbing pơk brŏng jru, geh nhhŭk ŭnh tă bơh brŏng jru hao nâm bu nhhŭk ŭnh tă bơh tâm ŭnh năk toyh ngăn; nar jêh ri trôk jêng ngo yor ma nhhŭk ŭnh tă bơh brŏng jru nây.

³ Tă bơh nhhŭk ŭnh nĕ geh krah nsăt mpăr luh lam neh ntu, jêh ri bu ăn ma khân păng nau dơi tâm ban ma nau dơi phung ndŭr vơng geh tâm neh ntu.

⁴ Bu lah jêh ma khân păng lơi ƀư mhĭk ma gơ̆ rêp ta neh ntu, lĕ ndơ ndrêh jêh ri ma tơm si ôh, ƀiălah knŏng ƀư nau mhĭk ma phung bunuyh mâu geh ndơ tâp pŏng tă bơh Brah Ndu ta ndăr kleng khân păng.

⁵ Bu ăn ma khân păng mâu dơi vay nkhĭt bu, ƀiălah dơi vay ƀư rêh ni phung bunuyh tâm prăm khay. Nau nđêh nji khân păng ƀư, jêng nâm bu nau nđêh nji bunuyh ndŭr vơng sôch.

⁶ Tâm lĕ nar nĕ, bunuyh mra joi nau khĭt ƀiălah mâu dơi geh ôh; khân păng ŭch ngăn nau khĭt ƀiălah nau khĭt der ngai.

⁷ Rup phung krah nsăt tâm ban ma seh ndrăp ma nau tâm lơh. Ta bôk khân păng geh ndơ nâm bu đon hađăch ma mah; muh măt khân păng nâm bu muh măt bunuyh;

⁸ sŏk nâm bu sŏk bu ur; sêk nâm bu sêk yau mŭr.

⁹ Khân păng geh ndơ nkŭm ntang ntơh nâm bu ao loih; nteh nting năr khân păng nâm bu nteh ndeh seh âk rduh lăp ntŭk tâm lơh.

¹⁰ Khân păng geh chiăng jêh ri dak kăch tâm ban ma mpôch ndŭr vơng; lĕ chiăng nây geh nau dơi ƀư nau mhĭk ma phung bunuyh tâm prăm khay.

¹¹ Hađăch ma khân păng jêng phung mbơh tă bơh brŏng jru, geh amoh tâm nau ngơi Hêbrơ jêng Abadôn, jêh ri tâm nau ngơi Grek jêng Apôliôn.

¹² Nau rêh ni tal nguay rlau jêh. Aơ, hôm geh bar ntil nau rêh ni êng dôl văch.

¹³ Tông mpăr rơh prao uh nŭng, gâp tăng du bâr luh bơh puăn njônh nơng ƀư brah mah gŭ tanăp Brah Ndu.

¹⁴ Bâr ngơi nây lah ma tông mpăr rơh prao dôl djôt nŭng pô aơ: “Mƀơk luh hom puăn nuyh tông mpăr bu chăp jêh ta dak krong toyh Ơphrat.”

¹⁵ Pôri, bu mƀơk puăn nuyh tông mpăr; khân păng rơm ndrăp jêh ma mông, ma nar, ma khay, ma năm nây gay nkhĭt khĭt du kô̆ tâm pe kon bunuyh.

¹⁶ Rnoh kơp phung tahan ncho seh jêng bar rhiăng rkeh. Nây jêng rnoh kơp khân păng gâp tăng jêh.

¹⁷ Tâm nau tâm saơ, gâp saơ phung seh jêh ri phung ncho seh tâm ban pônây: Khân păng nsoh ao loih nkŭm ntang ntơh nâm bu dak ŭnh, dak lŭ ĭr jêh ri dak mô ŭnh; bôk phung seh nâm bu bôk yau mŭr; trôm mbung khân păng bruh luh ŭnh, nhhŭk ŭnh jêh ri mô ŭnh.

¹⁸ Du kô̆ tâm pe kon bunuyh khĭt yor pe ntil nau ƀư rai aơ, nây jêng: ŭnh, nhhŭk ŭnh jêh ri mô ŭnh luh tă bơh trôm mbung phung seh nĕ.

¹⁹ Yorlah nau dơi phung seh nĕ gŭ tâm trôm mbung jêh ri ta chiăng khân păng; chiăng khân păng nâm bu bôk bêh jêh ri khân păng sŏk bôk nây ƀư nau tih mhĭk.

²⁰ Kô̆ hôm e tâm kon bunuyh, phung bunuyh mâu khĭt yor nau ƀư rai aơ, mâu rmal ôh lĕ kan ti khân păng ƀư, mâu đŏng chalơi nau yơk mbah ma brah mhĭk, ma lĕ rup brah mah, prăk, kông, lŭ, tơm si jêng lĕ rup brah mâu dơi saơ, mâu tăng mâu lah blau nsong ôh.

²¹ Khân păng mâu rmal ôh lĕ nau tih khân păng nkhĭt bunuyh, ƀŭk rƀên, văng tĭr, ntŭng.