Nau Tâm Mpơl 7 - Nau Brah Ndu Ngơi 2023

Phung Israel geh nau tâp pŏng

¹ Jêh nau nĕ, gâp saơ puăn nuyh tông mpăr dâk ta puăn njônh neh ntu, khân păng nkân lơi puăn chiông sial gay mâu geh sial khôm ta klơ neh ntu, ta klơ dak mƀŭt mâu lah klơ ăp tơm si.

² Gâp saơ du huê tông mpăr êng văch tă bơh mpeh luh nar, păng djôt tâp pŏng tă bơh Brah Ndu gŭ rêh mro mrăng. Tông mpăr aơ bâr kuăl huy ktang ma puăn nuyh tông mpăr geh nau dơi ƀư mhĭk ma neh ntu nđâp ma dak mƀŭt

³ jêh ri lah pô aơ: “Lơi ƀư mhĭk ma neh ntu, ma dak mƀŭt jêh ri ma tơm si ôh, kŏ tât nôk hên dơm ndơ tâp pŏng ta ndăr kleng phung oh mon Brah Ndu he.”

⁴ Gâp tăng rnoh bunuyh geh tâp pŏng jêng: Du rhiăng puăn jât ma puăn rbăn nuyh. Phung bunuyh geh tâp pŏng ntơm bơh lĕ rngôch phung ndŭl mpôl Israel:

⁵ Tâm ndŭl mpôl Yuđa: Jât ma bar rbăn nuyh dơi geh tâp pŏng; Tâm ndŭl mpôl Ruben: Jât ma bar rbăn nuyh; Tâm ndŭl mpôl Gat: Jât ma bar rbăn nuyh;

⁶ Tâm ndŭl mpôl Aser: Jât ma bar rbăn nuyh; Tâm ndŭl mpôl Naptali: Jât ma bar rbăn nuyh; Tâm ndŭl mpôl Manasê: Jât ma bar rbăn nuyh;

⁷ Tâm ndŭl mpôl Simêôn: Jât ma bar rbăn nuyh; Tâm ndŭl mpôl Lêvi: Jât ma bar rbăn nuyh; Tâm ndŭl mpôl Isakar: Jât ma bar rbăn nuyh;

⁸ Tâm ndŭl mpôl Sabulôn: Jât ma bar rbăn nuyh; Tâm ndŭl mpôl Yôsep: Jât ma bar rbăn nuyh; Tâm ndŭl mpôl Benjamin: Jât ma bar rbăn nuyh geh ndơ tâp pŏng.

Nau ueh maak ta ƀon ueh klơ trôk

⁹ Jêh nau nây gâp uănh, ri, geh du mpôl bunuyh âk ngăn mâu hôm dơi kơp ôh, bơh lĕ rngôch lĕ bri dak, lĕ rngôch ndŭl mpôl, lĕ rngôch ƀon lan, lĕ rngôch nau ngơi, dâk tanăp sưng hađăch jêh ri tanăp Kon Biăp, nsoh jêh ao jong nglang, ti djôt n'ha đung.

¹⁰ Khân păng nter huy ngăn pô aơ: “Nau tâm rklaih jêng ndơ Brah Ndu he, Nơm gŭ ta klơ sưng hađăch, jêh ri jêng ndơ Kon Biăp.”

¹¹ Lĕ rngôch phung tông mpăr dâk jŭm sưng hađăch, jŭm phung kôranh bu ranh jêh ri phung puăn mpa rêh, chon mon tanăp sưng hađăch jêh ri yơk mbah ma Brah Ndu,

¹² lah pô aơ: “Amen! Nau tâm rnê, nau chrêk rmah, nau blau mĭn, nau lah ueh, nau yơk, nau brah jêh ri nau dơi jêng ndơ Brah Ndu he n'ho ro. Amen!”

¹³ Du huê tâm phung kôranh bu ranh ngơi đah gâp nâm pô aơ: “Mbu nơm nsoh jêh ao jong nglang nĕ, jêh ri mbah tă khân păng văch?”

¹⁴ Gâp lah ma păng: “Hơi kôranh, may gĭt.” Kôranh bu ranh nây lah ma gâp: “Aơ jêng phung bunuyh luh tă bơh nau rêh ni toyh, hŏ pih jêh ao jêh ri pih tho ăn nglang ao khân păng nơm tâm mham Kon Biăp.

¹⁵ Yor ri, khân păng gŭ râng tanăp sưng hađăch Brah Ndu, măng nâm nar pah kan tâm ngih brah ma Brah Ndu; jêh ri Nơm gŭ ta sưng hađăch mra nkŭm nking khân păng.

¹⁶ Khân păng mâu mra hôm ji ngot mâu lah ji hir ôh, mâu đŏng geh nar mâu lah nau duh hôm nđat ma khân păng ôh.

¹⁷ Yorlah Kon Biăp gŭ ta nklang sưng hađăch mra mât njrăng khân păng jêh ri njŭn leo khân păng tât ta lĕ dak n'hor rêh. Brah Ndu mra jut lơi dak măt bơh trôm măt khân păng.”