Nau Tâm Mpơl 6 - Nau Brah Ndu Ngơi 2023

Prao tâp pŏng lor lơn

¹ Gâp uănh tơlah Kon Biăp pơk tâp pŏng tal nguay tâm pơh tâp pŏng jêh ri gâp tăng du huê tâm puăn mlâm mpa rêh ngơi nâm bu nglaih pô aơ: “Văch hom!”

² Gâp uănh, ri, du mlâm seh nglang. Nơm ncho seh nĕ geh du mlâm na jêh ri bu ăn ma păng du mlâm đon hađăch. Păng hăn luh nâm bu du huê bunuyh tŭn mpet jêh ri dơi jêh.

³ Tơlah Kon Biăp pơk ndơ tâp pŏng rơh bar, gâp tăng mpa rêh rơh bar lah pô aơ: “Văch hom!”

⁴ Du mlâm seh chăng êng tâm mpơl. Nơm ncho seh nây geh nau dơi sŏk lơi jêh nau đăp mpăn bơh neh ntu gay ma bu tâm nkhĭt ndrăng băl păng nơm; bu ăn jêh ma păng du mlâm đao gưm toyh.

⁵ Tơlah Kon Biăp pơk tâp pŏng rơh pe, gâp tăng mpa rêh rơh pe lah: “Văch hom!” Gâp uănh, ri, geh du mlâm seh krăk. Nơm ncho seh djôt njing tâm ti păng.

⁶ Gâp tăng nâm bu geh bâr ta nklang puăn mlâm mpa rêh lah pô aơ: “Du đơniê du njơ ba ƀlê; du đơniê pe njơ ba ôrgơ; ƀiălah dak ngi ôlive jêh ri ndrănh lơi pah tât.”

⁷ Tơlah Kon Biăp pơk tâp pŏng rơh puăn, gâp tăng bâr mpa rêh rơh puăn lah: “Văch hom!”

⁸ Gâp uănh, ri du mlâm seh ĭr rmĭt. Nơm ncho seh rnha Nau Khĭt, jêh ri Ƀon phung khĭt tĭng pakơi păng. Bu ăn ma khân păng nau dơi ƀư rai du kô̆ tâm puăn ta neh ntu gay nkhĭt ma đao gưm, nau sa sât ji ngot, nau ji tưp jêh ri ma phung mpô mpa bri janh ta neh ntu.

⁹ Tơlah Kon Biăp pơk tâp pŏng rơh prăm, gâp saơ tâm dâng nơng ƀư brah geh huêng phung bunuyh bu nkhĭt jêh yor nau ngơi Brah Ndu jêh ri yor nau khân păng mbơh nkoch.

¹⁰ Khân păng nter ktang pô aơ: “Ơ Kôranh Brah jêng Nơm kloh ueh jêh ri nanê̆ ngăn, ndah hôm jŏ đŏng Kôranh Brah mra phat dôih, jêh ri plơng bôk ma phung gŭ ta neh ntu yor ma mham hên?”

¹¹ Ăp nơm tâm phung khân păng bu ăn du blah ao jong nglang, jêh ri bu lah ma khân păng gŭ rlu ƀât lât đŏng, kŏ tât nôk nŭm rnoh phung pah kan ndrel ma khân păng jêh ri oh nâu khân păng mra dơn nau bu nkhĭt tâm ban ma khân păng.

¹² Tơlah Kon Biăp pơk tâp pŏng rơh prao, gâp saơ nau n'găr neh ktang; nar plơ̆ jêng ngo tâm ban ma du blah bok rsau krăk, khay plơ̆ jêng chăng nâm bu mham,

¹³ Phung mănh klơ trôk tŭp ta neh ntu nâm bu play ndrêh rŭng tă bơh tơm rvi tâm nôk sial khôm ktang.

¹⁴ Trôk roh lĕ nâm bu ndrom samƀŭt bu klôn, lĕ rngôch yôk, lĕ rngôch kôdak trơn du bơh ntŭk ơm khân păng nơm.

¹⁵ Phung hađăch ta neh ntu, phung toyh, phung kôranh tahan, phung ndrŏng, phung dơi toyh, lĕ rngôch phung dĭk, phung kon me du krap tâm lĕ trôm jêh ri ta nklang lĕ lŭ toyh ta klơ yôk.

¹⁶ Khân păng lah ma yôk jêh ri ma lŭ toyh pô aơ: “Tŭp hom ta hên jêh ri pôn hên bơh muh măt Nơm gŭ ta sưng hađăch jêh ri bơh nau ji nuih Kon Biăp;

¹⁷ yorlah nar phung Păng ji nuih toyh hŏ tât jêh, mbu nơm dơi gŭ tanăp nau nây?”