Nau Tâm Mpơl 20 - Nau Brah Ndu Ngơi 2023

Nau Brah Yêsu chiă uănh du rbăn năm

¹ Jêh nây gâp saơ du huê tông mpăr jŭr tă bơh trôk, ti păng djôt keh khuă brŏng jru jêh ri du rse rvăk toyh.

² Păng nhŭp bêh nhŭk nhăk, nâm bu ntĭt bêh kăl e, jêng brah mhĭk, jêng Satan, jêh ri kât păng du rbăn năm.

³ Tông mpăr klŭp păng jŭr tâm brŏng jru, nchăng mpông brŏng jru jêh ri ndâl tâp pŏng ta klơ mpông, gay ma păng mâu hôm ndơm mƀruh lĕ bri dak, kŏ tât lôch du rbăn năm nây. Pakơi nây, bu mra doh mƀơk Satan luh ƀât lât.

⁴ Gâp saơ lĕ sưng hađăch, jêh ri phung bunuyh gŭ ta sưng hađăch bu ăn khân păng nau dơi phat dôih. Gâp saơ đŏng huêng phung khĭt bu koh trô ko yor khân păng mbơh nkoch ma Brah Yêsu jêh ri nau ngơi Brah Ndu, jêh ri huêng phung mâu yơk mbah ma mpô mpa dŭt janh ndrel ma rup păng, mâu sŏk dơn nau mbên ta ndăr kleng mâu lah ta ti khân păng nơm. Khân păng dơi dâk rêh tay jêh ri chiă uănh ndrel ma Brah Krist tâm du rbăn năm.

⁵ Phung khĭt ƀaƀă mâu dơi dâk rêh tay ôh kŏ tât nôk du rbăn năm lôch jêh. Aơ jêng nau dâk rêh tay tal nguay.

⁶ Ueh maak ngăn jêh ri kloh ueh ngăn jêng phung geh kô̆ tâm nau dâk rêh tay tal nguay! Nau khĭt rơh bar mâu geh nau dơi đah khân păng ôh, ƀiălah khân păng mra jêng kôranh ƀư brah ma Brah Ndu jêh ri ma Brah Krist; khân păng mra chiă uănh ndrel ma Păng tâm du rbăn năm.

Satan roh nau dơi n'ho ro

⁷ Tơlah du rbăn năm lôch jêh, bu mra mƀơk Satan luh tă bơh ntŭk bu krŭng;

⁸ păng mra hăn luh gay ndơm mƀruh phung mpôl băl bunuyh gŭ tâm puăn njônh ta neh ntu jêng phung Gôk jêh ri phung Magôk, gay rgum phung nây ma nau tâm lơh. Phung tahan khân păng âk nâm bu choih ta kơh dak mƀŭt.

⁹ Khân păng hăn bra pru pra lam neh ntu, nchueng jŭm ntŭk phung kloh ueh gŭ jêh ri ƀon bu rŏng ngăn ngên. Ƀiălah ŭnh tă bơh trôk jŭr jêh ri su rai khân păng.

¹⁰ Bi brah mhĭk jêng nơm ndơm mƀruh khân păng bu klŭp mƀăr păng lăp nglao ŭnh geh mô ŭnh, Ta nây geh mpô mpa dŭt janh jêh ri nơm mbơh lor nklă gŭ jêh. Khân păng geh nau rêh ni măng nâm nar ma tât n'ho ro.

Nau phat dôih nglĕ dŭt

¹¹ Nôk nây gâp saơ du mlâm sưng hađăch toyh jêh ri nglang ndrel ma Nơm gŭ ta sưng hađăch. Tanăp măt Păng neh ntu jêh ri trôk du lĕ, mâu hôm saơ geh ntŭk ma khân păng ôh.

¹² Gâp saơ phung khĭt, toyh jêh ri jê̆, dâk tanăp sưng hađăch nây da dê, jêh ri bu pơk jêh lĕ ndrom samƀŭt. Du ndrom samƀŭt êng jêng ndrom samƀŭt nau rêh bu pơk đŏng. Bu phat dôih phung khĭt tĭng nâm kan khân păng ƀư jêh, tĭng nâm lĕ nau bu nchih jêh tâm ndrom samƀŭt nây.

¹³ Dak mƀŭt mplơ̆ lơi phung hŏ khĭt tâm păng; Nau khĭt jêh ri Ƀon phung khĭt mplơ̆ lơi phung khĭt khân păng djôt prăp. Ăp nơm bu mra phat dôih tĭng nâm kan păng nơm ƀư jêh.

¹⁴ Jêh nây bu klŭp Nau khĭt jêh ri Ƀon phung khĭt jŭr tâm nglao ŭnh. Nglao ŭnh nây jêng nau khĭt rơh bar.

¹⁵ Mbu nơm mâu geh amoh bu nchih jêh tâm ndrom samƀŭt nau rêh, bu mra klŭp păng tâm nglao ŭnh.