Nau Tâm Mpơl 12 - Nau Brah Ndu Ngơi 2023

Bu ur jêh ri bêh nhŭk nhăk

¹ Jêh nây geh du nau mbên khlay toyh mpơl ta klơ trôk: Du huê bu ur geh nau nkŭm păng nơm ma nar, jâng păng dâk ta klơ khay, bôk păng ndô đon hađăch geh jât ma bar mlâm mănh mbing.

² Păng ntreo jêh ri nter vơl ji glăm, ji kruăt rêt yor păng dăch deh kon.

³ Ta klơ trôk mpơl đŏng du nau tâm mbên khlay êng: Du mlâm bêh nhŭk nhăk chăng toyh geh pơh mlâm bôk, jât mlâm nke, jêh ri klơ bôk păng geh pơh mlâm đon hađăch.

⁴ Chiăng păng têk du kô̆ tâm pe phung mănh mbing ta klơ trôk jêh ri klŭp mƀăr ta neh ntu. Bêh nhŭk nhăk dâk tanăp bu ur dăch deh kon, gay ma tơlah bu ur nây deh kon, sa rvăn kon păng.

⁵ Bu ur deh du huê kon bu klâu; kon bu klâu nây mra dŏng du mlâm mâng loih chiă uănh lĕ rngôch phung mpôl băl. Ƀiălah bu chông kon păng hao tât Brah Ndu, tât ma sưng hađăch Păng.

⁶ Bi bu ur nĕ nchuăt du tâm bri rdah; ta nây, Brah Ndu ndrăp lor jêh du ntŭk ma păng gay ma bu mât siăm păng tâm du rbăn bar rhiăng prao jât nar.

Bêh nhŭk nhăk mâu dơi đah phung tông mpăr

⁷ Nôk nây geh nau tâm lơh ta klơ trôk: Mikel jêh ri phung tông mpăr păng nơm tâm lơh đah bêh nhŭk nhăk; bêh nhŭk nhăk jêh ri phung mbơh păng tâm lơh đŏng.

⁸ Ƀiălah khân păng mâu dơi ôh, jêh ri joi mâu hôm saơ đŏng ntŭk khân păng ta klơ trôk.

⁹ Bu klŭp mƀăr bêh nhŭk nhăk toyh jŭr ta neh, jêng bêh ơm, bu rnha jêng brah mhĭk mâu lah Satan, nơm ndơm mƀruh lĕ kon bunuyh. Bu klŭp păng jŭr ta neh ntu; phung mbơh păng bu klŭp mƀăr jŭr ndrel ma păng.

¹⁰ Gâp tăng ta klơ trôk geh bâr huy lah pô aơ: “Aƀaơ aơ nau tâm rklaih, nau brah, Ƀon bri hađăch Brah Ndu he, Jêh ri nau dơi Brah Krist văch jêh, Yorlah nơm phong phung oh nâu he, măng nâm nar phong khân păng tanăp Brah Ndu, Bu klŭp mƀăr jêh păng jŭr ta neh.

¹¹ Khân păng geh nau dơi yor mham Kon Biăp, Jêh ri yor nau khân păng mbơh nkoch; Khân păng mâu nhhuach nau rêh khân păng nơm ma tât nau khĭt.

¹² Yor ri, hơi lĕ ndâr trôk, jêh ri phung gŭ tâm nây, Răm maak hom! Ƀiălah rêh ni ngăn ma neh ntu jêh ri ma dak mƀŭt, Yorlah brah mhĭk gĭt mông nar păng mâu hôm jŏ, Pôri hăn jŭr ma khân may ma nau ji nuih hâu ngăn.”

Bêh nhŭk nhăk nhŭp bu ur jêh ri phung kon păng

¹³ Tơlah bêh nhŭk nhăk saơ bu klŭp mƀăr jêh păng jŭr ta neh ntu, păng hăn tĭng bu ur deh jêh kon bu klâu.

¹⁴ Ƀiălah bu ăn ma bu ur nây bar mlâm nting năr klang ƀŭng gay ma păng mpăr tât ta ntŭk păng nơm tâm bri rdah, ta ntŭk bu mât siăm păng dôl du rnôk, lĕ rnôk, jêh ri n'gul rnôk, der ngai bơh bêh nhŭk nhăk.

¹⁵ bêh bruh dak luh tă bơh trôm mbung păng tâm ban dak krong hoch pakơi bu ur gay ma rdu păng tâm dak.

¹⁶ Ƀiălah neh sâm rklaih bu ur nây, păng hă mbung sâm rhôp n'hong dak krong bêh nhŭk nhăk bruh luh jêh tă bơh mbung păng.

¹⁷ Mlâm bêh nhŭk nhăk ji nuih ma bu ur nây jêh ri hăn tâm lơh đah noi deh păng hôm e, nâm bu ntĭt phung djôt prăp ma lĕ nau vay Brah Ndu ntăm jêh ri geh nau mbơh Brah Yêsu.

¹⁸ Jêh nây bêh nhŭk nhăk dâk ta kơh choih tâm dak mƀŭt.