Nau Tâm Mpơl 10 - Nau Brah Ndu Ngơi 2023

Tông mpăr jêh ri ndrom samƀŭt jê̆

¹ Pakơi nây, gâp saơ du huê tông mpăr êng geh nau dơi jŭr tă bơh trôk, geh du ndâr tŭk nkŭm păng. Ta klơ bôk tông mpăr geh bêh tŭng tĭng; muh măt tông mpăr nâm bu nar jêh ri jâng nâm bu n'gâng ŭnh.

² Tông mpăr djôt tâm ti du ndrom samƀŭt jê̆ pơk jêh. Tông mpăr jot jâng ma ta klơ dak mƀŭt, jâng chiau ta klơ neh

³ jêh ri nter bâr huy nâm bu nter ngrông yau mŭr. Tơlah tông mpăr nter bâr huy geh pơh ndăr nglaih nteh huy.

⁴ Tơlah pơh tơ̆ nglaih nteh huy, gâp nchih tay, ri mơ gâp tăng bâr tă bơh trôk: “Nchăng hom lĕ nau pơh nteh nglaih nĕ lah jêh, lơi nchih!”

⁵ Tông mpăr gâp saơ nĕ dâk ta klơ dak mƀŭt jêh ri ta klơ neh yơr ti ma păng mpeh ta klơ trôk,

⁶ sŏk amoh Nơm gŭ rêh n'ho ro, Nơm rhăk njêng trôk jêh ri lĕ rngôch ndơ klơ trôk, neh ntu jêh ri lĕ rngôch ndơ klơ neh ntu, dak mƀŭt jêh ri lĕ rngôch ndơ tâm dak mƀŭt, jêh ri sơm ton pô aơ: “Mâu mra hôm mbrĕ mbrơi ôh!

⁷ Ƀiălah tât lĕ nar tông mpăr rơh pơh uh nŭng, nau khlay ndâp tă bơh Brah Ndu mra lôch jêh, nâm bu Păng mbơh jêh ma phung oh mon Păng jêng phung nơm mbơh lor.”

⁸ Bâr gâp tăng jêh tă bơh trôk ngơi ma gâp: “Hăn hom, sŏk ndrom samƀŭt pơk jêh tâm ti tông mpăr dôl dâk ta dak mƀŭt jêh ri ta neh.”

⁹ Pôri, gâp hăn văch ta tông mpăr jêh ri dăn ma păng ăn ndrom samƀŭt jê̆ nây ma gâp. Tông mpăr lah: “Sŏk hom jêh ri sa păng! Tâm ndŭl may mra tăng, ƀiălah tâm mbung may păng jêng njŭng nâm bu dak sŭt.”

¹⁰ Gâp sŏk ndrom samƀŭt jê̆ tă bơh ti tông mpăr jêh ri gâp sa. Păng njŭng nâm bu dak sŭt tâm mbung gâp; ƀiălah nôk gâp sa jêh, geh tăng tâm ndŭl gâp.

¹¹ Jêh nây bu lah ma gâp: “Ăn may ngơi nau mbơh lor ma âk phung ƀon lan, âk bri dak, âk nau ngơi, jêh ri ma âk hađăch.”