Nau Ngluh Êjipt 38 - Nau Brah Ndu Ngơi 2023

Nơng ƀư brah nhhơr ndơ ƀư brah gŭch

¹ Păng ƀư đŏng nơng ƀư brah nhhơr ndơ ƀư brah gŭch ma si akasi rup blon, ăp njônh bar met bar jêh ri prêh du met pe.

² Păng ƀư nke nkrêp ta puăn njônh nơng ƀư brah; lĕ nke nây tâm di jêng du ngrăng đah nơng ƀư brah. Nơng ƀư brah mblum ma kông.

³ Jêh nây păng ƀư lĕ ndơ dŏng ma nơng ƀư brah nâm bu lĕ glah dơm buh, pel, ngan grưng, n'hoi srang, jêh ri khăl gŭch ƀâu kah. Lĕ rngôch ndơ dŏng nây ƀư ma kông da dê.

⁴ Păng ƀư đŏng ma nơng ƀư brah du plơp dreh ma kông tanh srang dơm ta nâm nơng ƀư brah, klăp lah ta săng n'gul prêh nơng ƀư brah,

⁵ jêh ri lôk puăn mlâm rval ta puăn njônh plơp dreh ma kông nây gay nsro mâng tung.

⁶ Păng ƀư mâng tung ma si akasi ndop ma kông,

⁷ jêh ri nsro mâng nây tâm trôm rval ta bar ding nơng ƀư brah gay tung păng. Păng ƀư nơng ƀư brah trôm lôk ma âk plơp kađar.

Thŭng dak ma kông

⁸ Păng sŏk dŏng dĭng lĕ pŏk nchrâng muh măt phung bu ur pah kan ta mpông Ngih Bok Nau Tâm Rƀŭn gay ƀư du mlâm thŭng dak geh jâng thŭng dak ma kông.

Ndring Ngih Bok

⁹ Păng ƀư đŏng ndring ngih. Mpeh pa dâng ndring ngih geh blah bok rjai ƀư ma rse mhay rhên, jong klăp lah puăn jât puăn met,

¹⁰ geh bar jât n'gâng jêh ri bar jât trôm n'gâng ma kông; ƀiălah ndơ nklĕ n'gâng jêh ri rse rêt păng ƀư ma prăk.

¹¹ Mpeh pa lơ geh đŏng puăn jât puăn met bok nđâp bar jât n'gâng jêh ri bar jât trôm n'gâng ma kông; ƀiălah ndơ nklĕ n'gâng jêh ri rse rêt păng ƀư ma prăk.

¹² Mpeh nhâp nar geh bar jât bar met blah bok jong ndrel ma jât n'gâng jêh ri trôm n'gâng ma kông; ndơ nklĕ n'gâng jêh ri rse rêt păng ƀư ma prăk.

¹³ Panăp, mpeh luh nar, jêng mpeh let nar ntơm nchrat, geh đŏng bar jât bar met blah bok rjai;

¹⁴ Lĕ blah bok rjai nkŭm mpeh đah aơ mpông ndring ngih jong prao met prao ndrel ma pe mlâm n'gâng jêh ri pe trôm n'gâng;

¹⁵ mpeh đah ri geh đŏng prao met prao bok rjai pe mlâm n'gâng jêh ri pe trôm n'gâng.

¹⁶ Lĕ rngôch blah bok rjai jŭm ndring ngih ƀư ma bok mhay rhên da dê;

¹⁷ lĕ trôm n'gâng ƀư ma kông da dê ƀiălah ndơ nklĕ n'gâng jêh ri mbong tâm thoi ƀư ma prăk; lĕ bôl n'gâng ndop đŏng ma prăk. Lĕ rngôch n'gâng ndring ngih tâm thoi ndrăng khân păng tă bơh mbong ƀư ma prăk.

¹⁸ Bok nching ta mpông ndring ngih bu dơi cheh dŭt ueh ngăn ma brai mhay rhên, brai ĭr, brai chăng krăk jêh ri chăng rhưch; blah bok jong pham met pham, prêh bar met bar, ăn tâm găp đah bok rjai jŭm văr ndring ngih.

¹⁹ Puăn mlâm n'gâng jêh ri puăn trôm n'gâng ma kông, ndơ nklĕ n'gâng ma prăk, jêh ri mbong tâm thoi ƀư đŏng ma prăk.

²⁰ Lĕ mâng pêr Ngih Bok jêh ri ndring ngih văr jŭm ƀư ma kông da dê.

Kơp lĕ ndơ dŏng ta Ngih Bok

²¹ Aơ jêng rnoh kơp lĕ ndơ dŏng ma Ngih Bok, jêng Ngih Bok Nau Tâm Rnglăp, kơp tĭng nâm nau vay ntăm Y-Môis ntĭnh ăn ma phung Lêvi, tĭng nâm Y-Ithamar gai, păng jêng kon bu klâu kôranh ƀư brah Y-Arôn.

²² Y-Bêsalel, kon bu klâu Y-Uri, sau bu klâu Y-Hur, bơh ndŭl mpôl Yuđa, ƀư lĕ rngôch nau Brah Yêhôva hŏ ntăm jêh ma Y-Môis,

²³ nđâp ma nơm kơl kan păng jêng Y-Ôhôliap, kon bu klâu Y-Ahisamak, bơh ndŭl mpôl Dan, jêng nơm blau trah, nơm njêng mhe, jêh ri blau cheh ma brai mhay rhên đah brai ĭr, brai chăng krăk jêh ri brai sut.

²⁴ Rnoh kơp mah hŏ nhhơr jêh dŏng kan ndâk njêng Ntŭk Kloh Ueh klăp lah du rbăn kilô, tĭng nâm ndơ nhueh bơh Ntŭk Kloh Ueh.

²⁵ Lĕ rngôch prăk bơh lĕ phung bu kơp jêh tâm phung tâm rƀŭn geh pe rbăn puăn rhiăng pe jât kilô, tĭng nâm ndơ nhueh bơh Ntŭk Kloh Ueh.

²⁶ Lĕ rngôch tâm phung kơp rnoh bunuyh ntơm bơh bar jât năm let klơ, jêng prao rhiăng ma pe rbăn prăm rhiăng prăm jât nuyh, ăp bunuyh chê̆ prao gram, tĭng nâm ndơ nhueh bơh Ntŭk Kloh Ueh.

²⁷ Pe rbăn puăn rhiăng kilô prăk dŏng gay tŏ lĕ trôm n'gâng ma Ngih Brah Kloh Ueh jêh ri lĕ trôm n'gâng ma bok; pe rbăn puăn rhiăng kilô ma du rhiăng trôm n'gâng, jêng pe jât puăn kilô ma ăp trôm n'gâng.

²⁸ Bar jât kilô hôm e păng dŏng ƀư ndơ nklĕ n'gâng, ndop ta bôl n'gâng jêh ri mbong tâm thoi ma lĕ n'gâng.

²⁹ Lĕ rngôch kông bu nhhơr geh bar rbăn puăn rhiăng kilô.

³⁰ Kông nây păng dŏng ƀư trôm n'gâng ma mpông lăp Ngih Bok Nau Tâm Rƀŭn, nơng ƀư brah ma kông, plơp dreh ma kông jêh ri lĕ ndơ dŏng ma nơng ƀư brah,

³¹ lĕ trôm n'gâng văr jŭm ndring ngih, lĕ trôm n'gâng mpông ma n'gâng mpông, lĕ mâng pêr ma Ngih Bok, jêh ri lĕ mâng pêr văr jŭm ndring ngih.