Nau Ngluh Êjipt 35 - Nau Brah Ndu Ngơi 2023

Nau vay ta nar saƀat

¹ Y-Môis kuăl lĕ rngôch phung Israel tâm rƀŭn jêh ri lah: “Aơ jêng lĕ nau kan Brah Yêhôva hŏ ntĭm nti jêh ma khân ay may ƀư:

² Bu mra pah kan tâm prao nar; ƀiălah ăn khân ay may djôt prăp nar tal pơh ƀư nar kloh ueh, jêng nar saƀat jêng nar rlu, prăp ma Brah Yêhôva. Mbu nơm ƀư ăp ntil kan tâm nar nây, bu mra nkhĭt păng.

³ Tâm nar saƀat khân ay may mâu dơi ôh sĭnh ŭnh tâm lĕ ntŭk khân ay may gŭ.”

Lĕ ndơ nhhơr dŏng gay ndâk Ngih Bok

⁴ Y-Môis lah ma phung Israel tâm rƀŭn: “Aơ jêng nau Brah Yêhôva hŏ ntĭm nti jêh:

⁵ Sŏk hom tă bơh khân may drăp ndơ nhhơr ma Brah Yêhôva. Mbu nơm geh nuih n'hâm lŏng, djôt leo hom ndơ nhhơr ma Brah Yêhôva tâm ban mah, prăk jêh ri kông;

⁶ brai ĭr, brai chăng krăk jêh ri chăng rhưch, brai mhay rhên; rsau be;

⁷ ntâu biăp nkuăng nhom chăng, ntâu ka toyh; si akasi;

⁸ dak pring mpoh ŭnh, lĕ ndơ ƀâu kah gay lŭk dak ƀâu kah mhĭng jêh ri n'hôl ƀâu kah,

⁹ lŭ khlay ônik jêh ri lĕ ntil lŭ khlay êng gay lĭr nkrêp ta êphôt jêh ri ndơ văn ta ntang ntơh.”

Lĕ ntil ndơ tâm Ngih Bok

¹⁰ “Tâm khân ay may, mbu jêng bunuyh blau ti văch ƀư hom lĕ rngôch moh ndơ Brah Yêhôva hŏ ntĭm nti jêh:

¹¹ ngih bok jêh ri bok nkŭm, ndơ nklĕ, kađar, mâng nđăng, meh jêh ri trôm meh;

¹² Hip Nau Tâm Rnglăp jêh ri lĕ mâng tung păng; ndrŭp nau yô̆ jêh ri blah bok nkŭm;

¹³ sưng nđâp lĕ mâng tung, jêh ri lĕ rngôch ndơ dŏng nđâp piăng let nhhơr;

¹⁴ jâng kađen, ndơ dŏng, kađen jêh ri dak pring mpoh ŭnh kađen;

¹⁵ nơng ƀư brah su ndơ ƀâu kah jêh ri lĕ mâng tung, dak ƀâu kah mhĭng, jêh ri ndơ ƀâu kah; jêh ri blah bok ta mpông Ngih Bok;

¹⁶ nơng ƀư brah nhhơr ndơ ƀư brah gŭch jêh ri pŏk dreh ma kông; mâng tung jêh ri lĕ ndơ dŏng ma nơng ƀư brah; thŭng dak jêh ri jâng thŭng dak;

¹⁷ lĕ blah bok rjai nkŭm ndring, meh gâng, trôm meh, jêh ri blah bok ta mpông ndring;

¹⁸ lĕ mâng pêr Ngih Bok, lĕ mâng pêr jêh ri rse ndring;

¹⁹ lĕ bok ao krơ̆ ƀư ma ndơ tanh prăp ma nau kan tâm Ntŭk Kloh Ueh; bok ao kloh ueh ma kôranh ƀư brah Y-Arôn jêh ri bok ao phung kon bu klâu păng prăp ma nau kan ndơ ƀư brah.”

²⁰ Jêh iăt, lĕ rngôch nau phung Israel tâm rƀŭn du luh bơh Y-Môis da dê.

²¹ Lĕ rngôch phung geh nuih n'hâm sŭk nsôr jêh ri geh nau ŭch êng văch jêh ri djôt ndơ nhhơr ma Brah Yêhôva gay dŏng tâm kan ƀư Ngih Bok, ndrăp lĕ ndơ dŏng tâm Ngih Bok jêh ri jĭm lĕ bok ao kloh ueh.

²² Pôri phung kon bu klâu nđâp phung bu ur, lĕ rngôch mbu nơm geh nuih n'hâm ŭch êng văch da dê. Khân păng djôt leo mblo tôr, rgên ti, rgên tâp pŏng, kông dok ta ko, lĕ ndơ nkrơ̆ ma mah jêh ri nhhơr ndơ ma mah ma Brah Yêhôva.

²³ Mbu geh brai ĭr, brai chăng krăk jêh ri brai sut, bok mhay rhên, rsau be, ntâu biăp nkuăng nhom chăng, jêh ri ntâu ka toyh djôt leo lĕ ro.

²⁴ Mbu geh moh ndơ ma prăk mâu lah kông dơi ƀư ndơ nhhơr ma Brah Yêhôva; mbu geh si akasi dơi dŏng ma moh nau kan njŭn nhhơr dĭng lĕ.

²⁵ Lĕ rngôch phung bu ur blau ti khân păng djôt leo da dê lĕ ntil khân păng hŏ ƀư tâm ban bok mhay rhên, brai ĭr, brai chăng krăk jêh ri brai sut.

²⁶ Bi phung bu ur geh nuih n'hâm sŭk nsôr jêh ri nau blau mĭn rui brai ma rsau be.

²⁷ Phung kôranh n'gâng kan djôt leo lŭ khlay jaspidi jêh ri lĕ ntil lŭ khlay aƀă gay nkrêp ta êphôt jêh ri ta ndơ văn ntang ntơh.

²⁸ Khân păng djôt leo đŏng dak pring mpoh ŭnh kađen, lĕ ndơ ƀâu kah gay lŭk lai dak ƀâu kah mhĭng jêh ri n'hôl ƀâu kah.

²⁹ Lĕ rngôch phung ƀon lan Israel, lĕ rngôch bu ur nđâp bu klâu, geh nuih n'hâm sŭk nsôr ŭch nhhơr moh ntil ndơ tâm lĕ nau kan Brah Yêhôva hŏ ntĭnh jêh ma Y-Môis, ŭch da dê tât nhhơr ma Brah Yêhôva.

Y-Bêsalel jêh ri Y-Ôhôliap

³⁰ Y-Môis lah ma phung ƀon lan Israel: “Aơ, Brah Yêhôva hŏ kuăl jêh ma amoh Y-Bêsalel, kon bu klâu Y-Uri, sau bu klâu Y-Hur, bơh noi deh Y-Yuđa.

³¹ Păng hŏ ăn jêh ma păng bêng ler jêh ma Huêng Brah Ndu, nđâp ma nau blau ti, nau gĭt mĭn jêh ri nau gĭt rbăng tâm lĕ nau kan ƀư ma ti

³² gay njêng mhe jêh ri njêng nklă lĕ ndơ ma mah, prăk jêh ri kông,

³³ chrăk klơ lŭ, nsêr lŭ khlay, trah si kan ƀư ma ti.

³⁴ Brah Ndu ăn ma păng nau dơi sâm nti kan, jêh ri ăn đŏng nđâp ma Y-Ôhôliap, kon bu klâu Y-Ahisamak, bơh ndŭl mpôl Dan.

³⁵ Brah Ndu ăn ma khân păng bêng ler nau blau mĭn gay ƀư lĕ rngôch nau kan ma du huê bunuyh blau tâm kan trah si, kan njêng mhe, kan cheh jêh ri tanh âk ntil brai nâm bu brai ĭr, chăng krăk, brai sut jêh ri bok mhay rhên; tâm ban đŏng nau kan phung bunuyh gĭt mâu lah bunuyh geh nau blau njêng mhe ăp ntil êng êng.”