Nau Ngluh Êjipt 33 - Nau Brah Ndu Ngơi 2023

Brah Yêhôva ntĭnh ma phung ƀon lan hăn du bơh yôk Sinai

¹ Yêhôva ngơi ma Y-Môis: “May jêh ri phung ƀon lan may ngluh jêh luh bơh n'gor Êjipt, hăn hom tă bơh ntŭk nây jêh ri hăn hom tât ta n'gor Gâp hŏ ton ma Y-Abraham, Y-Isăk, jêh ri Y-Yakôb pô aơ: ‘Gâp mra ăn n'gor nây ma phung kon sau khân may.’

² Gâp mra njuăl du huê tông mpăr hăn lor ma may, jêh ri Gâp mra nsot phung Kanaan, phung Amôrit, phung Hitit, phung Pêrisit, phung Hivit jêh ri phung Jêbusit,

³ gay leo khân may tât ta n'gor bêng ma dak toh jêh ri dak sŭt; ƀiălah Gâp mâu mra hăn ôh ndrel ma khân may, yorlah khân may jêng du phung ƀon lan dăng ko, klach lah Gâp mra ƀư rai khân may rŏ trong.”

⁴ Tơlah phung ƀon lan tăng lĕ nau ngơi mâu ueh nây, khân păng nhĭm nhhiăng, mâu geh ôh du huê văn ndơ nkrơ̆.

⁵ Yorlah Brah Yêhôva hŏ lah jêh ma Y-Môis: “Lah hom ma phung ƀon lan Israel: ‘Khân may jêng phung ƀon lan dăng ko, tơlah Gâp hăn ndrel ma khân may knŏng ƀât lât, Gâp mra ƀư rai khân may! Pôri, aƀaơ, doh lơi hom ndơ nkrơ̆ khân may, gay ma Gâp gĭt moh Gâp mra ƀư ma khân may.’”

⁶ Yor nây, sŏk ntơm bơh yôk Hôrep, phung ƀon lan Israel doh lơi lĕ ndơ nkrơ̆ khân păng.

Ndâk Ngih Bok Nau Tâm Rƀŭn padih rmlak tahan

⁷ Rnôk nây, Y-Môis djôt leo ngih bok jêh ri ndâk padih rmlak tahan jêh ri rnha jêng Ngih Bok Nau Tâm Rƀŭn. Mbu nơm ŭch kuăl mbơh sơm Brah Yêhôva hăn tât ta Ngih Bok Nau Tâm Rƀŭn, padih rmlak tahan.

⁸ Ăp tơ̆ Y-Môis dâk hăn ta Ngih Bok nây lĕ rngôch phung ƀon lan dâk; ăp nơm dâk ta mpông Ngih Bok păng, tĭng uănh Y-Môis kŏ tât păng lăp jêh tâm Ngih Bok.

⁹ Nôk Y-Môis lăp jêh tâm Ngih Bok, n'gâng tŭk jŭr ta mpông Ngih Bok; Brah Yêhôva ngơi ma Y-Môis.

¹⁰ Lah saơ n'gâng tŭk gŭ ta mpông Ngih Bok, lĕ rngôch phung ƀon lan dâk da dê, jêh nây ăp nơm yơk mbah ta mpông Ngih Bok păng nơm.

Brah Ndu ngơi ta nây ro đah Y-Môis

¹¹ Brah Yêhôva ngơi ma Y-Môis tâm tra năp tâm ban ma du huê bunuyh ngơi ma băl păng. Jêh nây Y-Môis plơ̆ sĭt let rmlak tahan, ƀiălah nơm groi kan păng dôl ndăm jêng Y-Yôsuê, kon bu klâu Y-Nun, mâu luh ôh bơh Ngih Bok.

¹² Y-Môis lah ma Brah Yêhôva: “Ơ Kôranh Brah, May hŏ lah jêh ma gâp: ‘Njŭn leo hom phung ƀon lan aơ’, ƀiălah May mâu ăn gâp gĭt ôh mbu May mra njuăl hăn ndrel ma gâp, nđâp lah May lah: ‘Gâp năl may ma amoh may, jêh ri may geh jêh nau yô̆ tanăp măt Gâp.’

¹³ Pôri aƀaơ, lah gâp geh jêh nau yô̆ tanăp măt May, dăn mpơl trong May ma gâp gay ma gâp dơi gĭt năl May jêh ri geh nau yô̆ tanăp măt May. Ăn May kơp phung ndŭl mpôl aơ jêng phung ƀon lan May!”

¹⁴ Brah Yêhôva lah: “Gâp nơm mra hăn ndrel ma may, jêh ri Gâp mra ăn nau rlu ma may.”

¹⁵ Y-Môis lah: “Tơlah May nơm mâu hăn ôh ndrel ma gâp, lơi ăn ôh hên hăn du bơh ntŭk aơ.

¹⁶ Tơlah May mâu hăn ndrel ma hên, mâm bu gĭt ngăn ma gâp jêh ri phung ƀon lan May geh nau yô̆ tanăp măt May? Geh May hăn ndrel, gâp jêh ri phung ƀon lan May mra dơi tâm nkhah bơh phung ƀon lan êng klơ neh.”

¹⁷ Brah Yêhôva lah ma Y-Môis: “Gâp mra ƀư nau may dăn ma Gâp, yorlah may geh jêh nau yô̆ tanăp măt Gâp, jêh ri Gâp gĭt năl may ma amoh may nơm.”

Y-Môis dăn uănh nau chrêk rmah Brah Ndu

¹⁸ Y-Môis lah: “Dăn May ăn gâp dơi uănh nau chrêk rmah May!”

¹⁹ Brah Yêhôva lah: “Gâp mra ƀư nau dŭt ueh Gâp tanăp may; Gâp mra mbơh amoh Yêhôva tanăp măt may; Gâp mra ƀư nau ueh ma mbu nơm Gâp ŭch ƀư nau ueh jêh ri yô̆ nđach ma mbu nơm Gâp ŭch yô̆ nđach.”

²⁰ Păng lah: “Ƀiălah may mâu dơi saơ ôh muh măt Gâp, yorlah mâu geh ôh nơm saơ măt Gâp hôm gŭ rêh.”

²¹ Brah Yêhôva lah tay: “Aơ, geh du ntŭk dăch Gâp, ăn may gŭ hom ta klơ lŭ.

²² Lah nau chrêk rmah Gâp prot rgăn, Gâp mra ăn may tâm trôm lŭ jêh ri Gâp mra nkŭm may ma ti Gâp kŏ tât Gâp hăn n'hot jêh

²³ Gâp mra rhuăt lơi ti Gâp. May mra saơ mpeh pakơi Gâp, ƀiălah mâu dơi saơ ôh muh măt Gâp.”