Nau Mprơ Ơm 89 - Nau Brah Ndu Ngơi 2023

Nau Brah Yêhôva tâm rnglăp đah Y-Đavit

Nau nti mprơ Y-Êthan, bunuyh Êsrahit

¹ Gâp mra mprơ ƀaƀơ ma nau ueh Brah Yêhôva, Bâr mbung gâp mra mbơh nau răp jăp May bơh rnôk aơ tât rnôk ri.

² Yorlah gâp lah jêh: “Nuih n'hâm ueh May dơi ndâk nâp tât n'ho ro, May ƀư nâp nau răp jăp May nâm bu lĕ ndâr trôk.”

³ May lah: “Gâp ndâk jêh nau tâm rnglăp đah nơm Gâp săch jêh, Gâp ton jêh đah Y-Đavit, oh mon Gâp, pô aơ:

⁴ ‘Gâp mra njêng noi deh may mro mrăng, Jêh ri ndâk sưng hađăch nâp n'ho ro.’” (Sêla)

⁵ Ơ Brah Yêhôva, lĕ ndâr trôk mra mprơ tâm rnê lĕ nau mbên khlay May; Nau răp jăp May ăt dơi mprơ tâm rnê phung kloh ueh.

⁶ Yorlah mbu nơm gŭ ta klơ lĕ ndâr trôk dơi tâm rđĭl ma Brah Yêhôva? Tâm lĕ phung brah, mbu nơm dơi tâm ban ma Brah Yêhôva?

⁷ Brah Ndu khư ma nau klach yơk tâm phung kloh ueh, Khư klach yơk ngăn rlau lơn ma lĕ rngôch phung gŭ văr jŭm păng.

⁸ Ơ Brah Yêhôva Brah Ndu ma phung tahan, Mbu nơm geh nau brah tâm ban ma May? Ơ Brah Yêhôva, nau răp jăp May gŭ văr jŭm May.

⁹ May chiă uănh nau ngrông huy phung dak mƀŭt: Tơlah rbuh dak, May ăn khân păng gŭ rklăk.

¹⁰ May ƀư nchah hăch Rahap nâm bu du mlâm săk jăn khĭt, Ma ti brah toyh, May lơh phung rlăng du pru pra.

¹¹ Lĕ ndâr trôk jêng ndơ May da dê, neh ntu ăt ndơ May đŏng; May rhăk njêng neh ntu jêh ri lĕ ndơ gŭ tâm păng.

¹² Mpeh pa lơ, mpeh pa dâng rhăk njêng ăt tă bơh May; Tabor jêh ri yôk Hermôn hâk răm tâm amoh May.

¹³ May geh nting tur ti brah toyh, Ti May geh nau ktang jêh ri ti ma May yơr prêh klơ.

¹⁴ Nau sŏng srăng jêh ri nau di jêng ntur ma sưng hađăch May; Nau ueh jêh ri nau nanê̆ ngăn hăn tanăp May.

¹⁵ Ueh maak yơh ma mpôl băl bunuyh gĭt sŏk bâr nau răm maak! Ơ Brah Yêhôva, khân păng hăn tâm nau ang bơh muh măt May.

¹⁶ Khân păng răm maak ăp nar tâm amoh May, Yor ma nau sŏng srăng May, khân păng geh nau yơk.

¹⁷ Yorlah May nơm yơh jêng nau chrêk rmah ma nau ktang khân păng; Yor ma nau yô̆ May yơh, nke hên mra dơi n'gơr hao prêh.

¹⁸ Yorlah Brah Yêhôva jêng khêl ma hên, Nơm kloh ueh Israel jêng Hađăch hên.

¹⁹ Rnôk nây, May lah ma phung kloh ueh May tâm nau tâm saơ, pô aơ: “Gâp dơm jêh du huê nơm ktang gay ma kơl may, Jêh ri n'hao du huê bunuyh dơi săch tă bơh nklang phung ƀon lan.

²⁰ Gâp joi hŏ dơi saơ jêh Y-Đavit jêng oh mon Gâp, Tŏ ăn păng ma Dak ƀâu kah kloh ueh Gâp,

²¹ Ti Gâp mra kuăn rdâng păng, Nting tur ti Gâp mra ƀư ăn ktang păng.

²² Phung rlăng mâu mra tŭn jot ma păng, Phung ƀai mâu lĕ mra dơi ƀư bêk prêng păng ôh.

²³ Gâp mra nchah hăch phung rlăng păng tanăp păng. Jêh ri ăt ƀư cha lôt phung tâm rmot ma păng.

²⁴ Ƀiălah nau răp jăp jêh ri nau ueh Gâp mra gŭ ndrel păng; Tâm amoh Gâp, nke păng mra dơi hao.

²⁵ Gâp mra dơm ti păng ta dak mƀŭt, Jêh ri ti ma păng ta lĕ n'hor dak krong.

²⁶ Păng mra kuăl Gâp pô aơ: ‘Păng jêng Mbơ̆ ma gâp, Jêng Brah Ndu gâp jêh ri lŭ toyh nau tâm rklaih gâp.’

²⁷ Gâp mra ăn păng ƀư kon bu klâu bôk rah Gâp. Jêng hađăch klơ lơn ma phung hađăch ta neh ntu.

²⁸ Gâp mra prăp nau ueh Gâp ma păng n'ho ro, Jêh ri ƀư nau Gâp tâm rnglăp đah păng dơi nâp.

²⁹ Gâp mra ƀư ăn noi deh păng hôm n'ho ro Jêh ri sưng hađăch păng mra hôm gŭ rêh nâm bu ăp nar tâm trôk.

³⁰ Tơlah phung kon sau păng chalơi nau vay Gâp, Mâu hăn ôh tĭng nâm nau vay Gâp ƀư,

³¹ Tơlah khân păng ƀư tih đah nau vay dăp Gâp, Mâu djôt prăp ôh lĕ nau vay Gâp ntăm,

³² Pôri gâp mra tâm rmal ma mâng rvĕ nau khân păng uh ah, Jêh ri sŏk nau mhĭk gay ma tâm rmal nau tih khân păng.

³³ Ƀiălah nau ueh tă bơh Gâp đah păng mâu mra rgâl ôh, Jêh ri nau răp jăp Gâp đah păng mâu blau dŭt ôh.

³⁴ Gâp mâu mra chalơi ôh nau Gâp tâm rnglăp, Mâu lĕ tâm rgâl moh nau lah jêh bơh bâr mbung Gâp.

³⁵ Gâp sŏk jêh nau kloh ueh Gâp gay ma ton du tơ̆ rĭng jêh; Gâp mâu mra mƀruh ôh đah Y-Đavit.

³⁶ Noi deh păng mra hôm n'ho ro, Jêh ri sưng hađăch păng mra gŭ mro nâm bu nar tanăp Gâp.

³⁷ Sưng hađăch nây mra dơi nâp mro mrăng nâm bu khay, Jêng mbơh mpơl nâp jăp ta nklang lĕ ndâr trôk.” (Sêla)

³⁸ Ƀiălah aƀaơ May chalơi jêh ri mưch păng, Ji nuih ma păng nơm May troch jêh dak ngi.

³⁹ May ƀư rai jêh nau tâm rnglăp đah oh mon May; May ƀư ƀơ̆ đon hađăch păng tâm ndruyh neh.

⁴⁰ May hŏ ƀư cha lôt lĕ jêh mpêr ƀon păng, Ƀư rai lĕ pôih n'gang păng.

⁴¹ Lĕ rngôch phung rgăn pit sŏk păng; Lĕ phung chiau meng ƀư bêk ma păng.

⁴² May n'hao prêh jêh ti ma phung rlăng păng; May ƀư ăn lĕ rngôch phung rlăng đah păng răm maak.

⁴³ May ƀư ăn mpiăt păng plăch lơi, Mâu hôm kơl păng tâm nau tâm lơh toyh.

⁴⁴ May ƀư lôch nau chrêk rmah păng, Klŭp lơi sưng hađăch păng ta neh.

⁴⁵ May ăn gleh nar păng jêng mom, Jêh ri nkŭm păng ma nau bêk, ƀơ̆ ƀơch. (Sêla)

⁴⁶ Ơ Brah Yêhôva! Ndah jŏ May mra pôn măt? Ndah jŏ nau May ji nuih mra hit nâm bu ŭnh?

⁴⁷ Ăn May kah gĭt ma nau rêh bunuyh jêng gleh ngăn! Păng njêng kon bunuyh jêng dơm dam ngăn!

⁴⁸ Mbu jêng bunuyh gŭ rêh jêh ri mâu saơ nau khĭt ôh? Mbu mra tâm rklaih huêng păng nơm bơh nau dơi phung khĭt? (Sêla)

⁴⁹ Ơ Kôranh Brah, nau ueh May sŏk nau răp jăp ton jêh ma Y-Đavit kăl e, Mbah ntŭk aƀaơ?

⁵⁰ Ơ Kôranh Brah, Dăn kah gĭt tay nau bêk phung oh mon May; Nau bêk bah lĕ rngôch bunuyh ƀon lan bun prăp tâm nuih n'hâm gâp.

⁵¹ Ơ Brah Yêhôva, nây jêng nau bêk phung rlăng May dŏng jêh Gay ƀư nau bêk ăp nhuat bunuyh May troch jêh dak ngi.

⁵² Khư mât ton tâm rnê Brah Yêhôva n'ho ro! Amen! Amen!