Nau Mprơ Ơm 78 - Nau Brah Ndu Ngơi 2023

Nau răp jăp Brah Ndu nđâp lah phung ƀon lan Păng mâu răp jăp

Nau mprơ nti Y-Asap

¹ Hơi phung ƀon lan gâp, gŭ iăt hom nau gâp ntĭm nti; Rkêng hom tôr iăt nau tă bơh trôm mbung gâp.

² Gâp mra hă mbung gay ngơi lĕ nau hôr, Gâp mra mpơl nau ndâp bơh rnôk kăl e,

³ Jêng lĕ nau he tăng gĭt jêh, Jêh ri phung chô yau hŏ nkoch jêh ma he.

⁴ He mâu mra pôn ôh lĕ nau nây ma phung kon sau he, Ƀiălah mra nkoch ma phung pakơi tâm nar kăndơ̆ Nau chrêk rmah Brah Yêhôva ndrel nau brah Păng Jêh ri lĕ nau kan khlay Păng ƀư jêh.

⁵ Păng njêng jêh nau ntĭnh ma Yakôb, Dơm du nau vay tâm phung Israel, Jêh ri ntrŭnh nau ntăm ma phung chô yau he Ntĭm nti tay hom ma phung kon sau khân păng;

⁶ Gay ma phung kăndơ̆, Nây jêng phung kon sau bu mra deh, gĭt nau nây, Jêh ri tât rơh khân păng, khân păng mra nkoch ma kon sau khân păng,

⁷ Gay ma kon sau khân păng geh nuih n'hâm rnơm nsing tâm Brah Ndu, Mâu chuêl ôh lĕ kan Păng, Ƀiălah djôt prăp lĕ nau vay Păng ntăm;

⁸ Jêh ri ăn khân păng mâu tâm ban ôh ma phung chô yau khân păng, Jêng ndŭl mpôl dăng bôk jêh ri uh ah, Du ndŭl mpôl mâu geh nuih n'hâm nâp Jêh ri mâu geh răp jăp đah Brah Ndu.

⁹ Kon sau Êphraim geh nau ndrăp ma hăr jêh ri na Ƀiălah rle ndŭr kơi tâm nar tâm lơh.

¹⁰ Khân păng mâu djôt prăp ôh nau Brah Ndu tâm rnglăp, Dun đŏng tĭng nâm nau vay Păng.

¹¹ Khân păng chuêl lĕ kan Păng ƀư jêh Jêh ri lĕ nau kan khlay Păng tâm mpơl jêh ma khân păng saơ.

¹² Tâm n'gor Êjipt, tâm bri Sôan. Păng ƀư lĕ nau mbên khlay tanăp phung chô yau khân păng.

¹³ Păng rnglah dak mƀŭt jêh ri ăn khân păng hăn rgăn ta nây, Ăn dak gŭ nâm bu mpir.

¹⁴ Păng njŭn khân păng nôk nar ma ndâr tŭk, Jêh ri lĕ dôl măng ma ŭnh ang.

¹⁵ Păng rlah lŭ tâm bri rdah Jêh ri ăn khân păng nhêt dak mpay nau ŭch tâm ban ma tă bơh brŏng jru.

¹⁶ Păng ăn n'hor dak brul luh tă bơh lŭ toyh Jêh ri ăn dak hoch nâm bu dak krong.

¹⁷ Nđâp tơlah pônây khân păng ăt ƀư tih đah Păng, Ƀư nau tâm rdâng đah Nơm Dŭt Prêh tâm bri rdah.

¹⁸ Khân păng ndra ma rlong uănh Brah Ndu, Gay ma geh ndơ sông sa tĭng nâm khân păng ŭch.

¹⁹ Khân păng ngơi tâm rdâng đah Brah Ndu pô aơ: “Dơi lĕ Brah Ndu nkra sưng sông sa tâm bri rdah?

²⁰ Nđâp tơlah Păng dong jêh lŭ toyh Ăn luh dak rdŭl luh jêng dak n'hor, Dơi lĕ Păng ăn ƀănh? Jêh ri ăn puăch ma phung ƀon lan Păng lĕ?”

²¹ Tăng pônây, Brah Yêhôva păng ji nuih; Geh ŭnh su ta phung Yakôb, Jêh ri nau ji nuih hao nuih ma phung Israel.

²² Yorlah khân păng mâu chroh ma Brah Ndu ôh, Mâu lĕ rnơm ma nau Păng tâm rklaih.

²³ Ƀiălah, Păng ntăm ăn ma lĕ ndâr tŭk prêh ta klơ Jêh ri pơk lĕ mpông ta klơ trôk,

²⁴ Ăn dak mih ma na jŭr ma khân păng sa, Jêh ri ăn ndơ sông sa ma khân păng tă bơh trôk.

²⁵ Phung bunuyh nglay săk dơi sa ƀănh phung tông mpăr; Păng ăn ma khân păng ndơ sông sa rmeh ler.

²⁶ Tă bơh trôk, Păng ăn sial khôm văch bơh luh nar, Sŏk ma nau brah leo sial sĭt pa dâng.

²⁷ Păng nkhŭt dak mih puăch ta khân păng âk nâm bu ndruyh neh, Jêh ri sĭm mpăr văch âk nâm bu choih tâm dak mƀŭt;

²⁸ Păng ăn lĕ ndơ nây tŭp ta nklang ngih bok, Văr jŭm ntŭk khân păng gŭ.

²⁹ Tâm ban pônây khân păng dơi sa hơm mpay nau ŭch, Brah Ndu ăn ma khân păng ntil nau khân păng ŭch.

³⁰ Ƀiălah êlor khân păng mpay nau ŭch kơnh, Ndơ sa ăt hôm tâm trôm mbung khân păng,

³¹ Nôk nây Brah Ndu ji nuih ma khân păng; Păng nkhĭt phung lay ktang lơn lĕ rngôch, Păng dong phung bu klâu mom Israel.

³² Nđâp tơlah lĕ nau nây, khân păng ăt hôm ƀư tih, Mâu chroh ôh ma nau mbên khlay Păng.

³³ Yor ri, Brah Ndu ƀư roh nar khân păng tâm nau n'hâm nsôr, Năm khay khân păng nglĕ dŭt tâm nau klach ngăn.

³⁴ Tơlah Brah Ndu nkhĭt khân păng, ri mơ khân păng kuăl ôp Păng; Khân păng plơ̆ tay jêh ri joi Brah Ndu ma lĕ nuih n'hâm.

³⁵ Khân păng kah gĭt pô aơ Brah Ndu jêng lŭ toyh ma khân păng, Brah Ndu Dŭt Prêh jêng Nơm tâm chuai khân păng.

³⁶ Ƀiălah khân păng sŏk trôm mbung ngơi rnê ma Brah Ndu, Dŏng mpiăt ngơi mƀruh Păng.

³⁷ Nuih n'hâm khân păng mâu jêng nâp ôh đah Brah Ndu, Khân păng mâu đŏng gŭ răp jăp đah nau Brah Ndu tâm rnglăp.

³⁸ Ƀiălah yor nau Păng yô̆ nđach, Păng yô̆ an nau tih mhĭk Jêh ri mâu ƀư rai khân păng ôh; Âk tơ̆ Păng nkân nau ji nuih, Mâu ăn nau ji nuih hao toyh ôh.

³⁹ Păng kah gĭt pô aơ khân păng knŏng jêng nglay săk, Du n'hâm ƀât lât rgăn, mâu plơ̆ tay ôh.

⁴⁰ Âk tơ̆ jêh khân păng ƀư nau tâm rdâng đah Brah Ndu tâm bri rdah, Jêh ri ƀư rngot ma Brah Ndu tâm ntŭk rngol!

⁴¹ Khân păng ƀaƀơ nau rlong uănh Brah Ndu, Ƀư rmanh Nơm Kloh Ueh Israel.

⁴² Khân păng mâu kah gĭt ôh nau brah Păng Tâm nar Păng tâm rklaih păng bơh phung rlăng;

⁴³ Jêng dôl Păng ƀư lĕ nau mbên tâm bri Êjipt Jêh ri lĕ kan khlay tâm ndrêch gơ̆ Sôan.

⁴⁴ Păng njêng lĕ dak krong khân păng jêng mham, Lĕ dak n'hor nây mâu dơi nhêt.

⁴⁵ Păng njuăl phung rhuay kăp rvăn khân păng, Jêh ri kĭt ƀư rai khân păng;

⁴⁶ Păng ăn kao play khân păng ma krah ndrach, Ăn ndô ndơ khân păng ma krah.

⁴⁷ Păng ƀư rai mir tơm krăk ƀâu khân păng ma mih pler, Ƀư rai mir sikamôr ma pler nđik toyh.

⁴⁸ Păng jao mpa rong khân păng ma mih pler, Jao phung biăp khân păng ma nglaih.

⁴⁹ Păng nkhŭt ta klơ khân păng ŭnh ji nuih ktang, Nau ji nuih, nau suai rak jêh ri nau mhĭk tât, Nây jêng lĕ rngôch du phung tông mpăr dơi njuăl văch gay ƀư rai.

⁵⁰ Păng pơk trong ma nau Păng ji nuih; Mâu yô̆ ôh ma khân păng bơh nau khĭt, Ƀiălah jao nau rêh khân păng ma nau ji tưp.

⁵¹ Păng lơh khĭt lĕ rngôch kon bôk rah tâm n'gor Êjipt, Nây jêng nau ueh nau ktang tâm lĕ ngih bok Cham.

⁵² Lôch nây Păng djôt phung ƀon lan Păng hăn du nâm bu biăp, Njŭn leo khân păng tâm bri rdah nâm bu phung biăp.

⁵³ Brah Ndu njŭn leo khân păng ma nau đăp mpăn, khân păng mâu klach ôh; Ƀiălah dak mƀŭt nkŭm brôi phung rlăng khân păng.

⁵⁴ Brah Ndu njŭn khân păng tât ntŭk kloh ueh Păng, Nây jêng tât ta yôk ti ma păng hŏ njêng jêh.

⁵⁵ Brah Ndu mprơh lĕ phung bu năch bơh nklang khân păng; Tâm nchroh tâm pă neh ƀư drăp ndơn, Njŭn phung mpôl băl Israel gŭ tâm ngih bok phung nây.

⁵⁶ Nđâp lah pônây khân păng ăt rlong uănh Jêh ri tâm rdâng đah Brah Ndu Nơm Dŭt Prêh, Mâu tĭng djôt prăp ôh nau Brah Ndu ntĭnh.

⁵⁷ Ƀiălah khân păng rŭch jêh ri mâu răp jăp nâm bu phung chô yau khân păng; Khân păng kue kuăt nâm bu na geh nau kue.

⁵⁸ Khân păng nsônh nuih Kôranh Brah yor lĕ ntŭk prêh, Ƀư ma Păng ji nuih yor lĕ rup trah.

⁵⁹ Tăng nau nây, Brah Ndu ji nuih; Păng tâm rmot chalơi ngăn ma phung Israel.

⁶⁰ Păng chalơi ngih bok ta ƀon Silô Nây jêng ngih bok, ntŭk Păng gŭ ta nklang bunuyh;

⁶¹ Nau ktang Păng jao ma nau jêng bu nă, Nau chrêk rmah Păng jao tâm ti phung rlăng.

⁶² Păng jao phung ƀon lan Păng ma đao, Jêh ri ji nuih ma drăp ndơn păng.

⁶³ Ŭnh sa phung bu klâu ndăm khân păng, Phung bu ur druh khân păng mâu hôm tăng mprơ tâm nkol ôh.

⁶⁴ Phung Kôranh ƀư brah cha lôt prah yor đao, Ƀiălah phung bu ur ndrô khân păng mâu nhĭm nhhiăng ôh.

⁶⁵ Aƀaơ aơ, Kôranh Brah nâm bu bunuyh kah rngăl bê̆ch, Nâm bu du huê janh ktang dơi đah nhŭl ndrănh.

⁶⁶ Păng dong phung rlăng plơ̆ nchuăt du; Ƀư bêk ma khân păng n'ho ro.

⁶⁷ Jêh nây Păng chalơi ngih bok Yôsep, Mâu lĕ săch mpôl băl Êphraim;

⁶⁸ Ƀiălah Păng săch mpôl băl Yuđa, Jêng yôk Siôn jêng yôk Păng rŏng.

⁶⁹ Păng ndâk ngih brah kloh ueh tâm ban ma ngih ta klơ trôk, Tâm ban ma neh ntu Păng hŏ ƀư nâp n'ho ro.

⁷⁰ Păng săch đŏng Y-Đavit ƀư oh mon Păng, Nhŭp păng tă bơh lĕ n'gar biăp;

⁷¹ Păng djôt Y-Đavit luh bơh phung biăp hôm pu Gay ma păng mât chiăp Y-Yakôb jêng phung ƀon lan Păng, Jêh ri Israel jêng drăp ndơn Păng.

⁷² Y-Đavit mât chiăp khân păng ma nuih n'hâm sŏng, Njŭn leo khân păng ma ti gĭt blau.