Nau Mprơ Ơm 72 - Nau Brah Ndu Ngơi 2023

Hađăch sŏng srăng chiă uănh

Nau Mprơ Ơm Y-Salômôn

¹ Ơ Brah Ndu, dăn ăn nau di May ma hađăch, Jêh ri ăn nau sŏng srăng May ma kon bu klâu hađăch.

² Păng mra phat dôih phung ƀon lan May ma nau sŏng, Phat dôih ma phung o ach ma nau di.

³ Ăn phung yôk dơi geh nau ndrŏng, Jêh ri lĕ dor yôk djôt nau sŏng srăng ma phung ƀon lan.

⁴ Hađăch mra phat dôih phung o ach tâm ƀon lan, Tâm rklaih phung pưt kƀah Jêh ri hađăch mra jot hăch phung tŭn jot.

⁵ Tơlah nar, khay hôm gŭ jŏ Pôri păng mra gŭ rêh jŏ, jêh ri kŏ tât lĕ rngôch rnôk n'ho ro.

⁶ Ăn hađăch mra jêng nâm bu dak mih tŭp tâm gơ̆ bu mhe muyh Tâm ban ma dak mih djrah lam neh ntu.

⁷ Tâm rnôk hađăch chiă uănh, nau sŏng srăng ndrŏng ktang, Jêh ri nau đăp mpăn mra jong kŏ tât khay mâu hôm nchrat ang đŏng ôh.

⁸ Păng mra chiă uănh bơh dak mƀŭt aơ, tât ta dak mƀŭt ri, Bơh Dak Krong kŏ tât dŭt rplay neh.

⁹ Phung gŭ tâm bri rdah mra chon mbah tanăp măt hađăch, Jêh ri phung rlăng hađăch mra ler ndruyh neh.

¹⁰ Phung hađăch n'gor Tarsis jêh ri phung kô dak rlai Mra chê̆ pi ma hađăch. Hađăch bơh Saba jêh ri Sêba Mra djôt ndơ văch ăn ma hađăch.

¹¹ Ăn lĕ rngôch phung hađăch mra chon mon tanăp hađăch; Lĕ rngôch mpôl băl mra pah kan ma hađăch.

¹² Yorlah hađăch mra rklaih phung pưt kƀah nôk khân păng kuăl dăn Jêh ri kơl nơm rêh ni mâu geh nơm kơl.

¹³ Păng mra yô̆ nđach ma phung pưt kƀah jêh ri o ach Jêh ri rklaih nau rêh phung pưt kƀah.

¹⁴ Păng mra rklaih tâm nau rêh khân păng bơh nau tŭn jot jêh ri nau ƀai; Mham khân păng jêng khlay tâm dâng măt păng.

¹⁵ Ăn hađăch dơi gŭ rêh jŏ! Jêh ri lĕ rngôch bunuyh ta ntu mra nhhơr mah bơh Sêba ma hađăch, Ăn bu mra mbơh sơm ma hađăch ƀaƀơ. Jêh ri ăp nar ăn nau ueh uĭn ma hađăch.

¹⁶ Ăn ba mra rmeh ler tâm neh ntu Jêh ri ta klơ lĕ n'gơn yôk; Ăn kao play păng tâm ban ma tơm si Liban, Bi phung gŭ tâm ƀon toyh mra ndrŏng Nâm bu gơ̆ tâm neh.

¹⁷ Ăn amoh Păng mra hôm ƀaƀơ, Ndah hôm jŏ nar pôri amoh hađăch mra hôm gŭ kơt nây lĕ; Bu mra tâm amoh păng jêh ri ăn nau ueh uĭn ndrăng khân păng nơm! Lĕ rngôch mpôl băl bunuyh mra uănh ma hađăch jêng nau ueh maak.

¹⁸ Khư mprơ tâm rnê ma Yêhôva Brah Ndu jêng Brah Ndu phung Israel. Knŏng du huê Păng ƀư lĕ kan khlay ngăn!

¹⁹ Khư mprơ tâm rnê amoh chrêk rmah Păng tât n'ho ro! Ăn lam neh ntu dơi bêng ma nau chrêk rmah Păng! Amen! Amen!

²⁰ Lĕ nau mbơh sơm Y-Đavit kon bu klâu Yêsê lôch dŭt aơ.