Nau Mprơ Ơm 41 - Nau Brah Ndu Ngơi 2023

Nau mbơh sơm dôl geh nau ji

Nau Mprơ Ơm Y-Đavit, ƀư nchih ma nơm gai mprơ

¹ Ueh maak yơh ma phung mêt uănh ma phung o ach! Tâm nar rêh ni, Brah Yêhôva mra rklaih bunuyh nây.

² Brah Yêhôva mra chiă uănh jêh ri mât mơh nau rêh păng: Bunuyh nây geh nau ueh maak ngăn ta neh ntu. Jêh ri May mâu jao păng ma phung rlăng ŭch ƀư păng.

³ Brah Yêhôva mra kơl bunuyh nây dôl bê̆ch rvĕn ta klơ sưng bê̆ch; Tâm rnôk ji kuet, May mra ƀư bah lĕ rngôch nau ji kuet ma păng.

⁴ Gâp lah ma Kôranh Brah: “Ơ Brah Yêhôva! Dăn yô̆ nđach gâp, Dăn ƀư bah gâp yorlah gâp ƀư tih jêh đah May.”

⁵ Phung rlăng gâp ngơi nau ƀai pô aơ: “Ndah jŏ păng mra khĭt? Ndah jŏ amoh păng mra rai yot?”

⁶ Tơlah khân păng chop gâp, khân păng ngơi lĕ nau mƀruh; Nuih n'hâm khân păng prăp bêng nau mhĭk Jêh ri khân păng hăn nkoch lam ntŭk.

⁷ Lĕ rngôch phung tâm rmot ma gâp ngơi ƀŭk dŭk suyh ƀư ma gâp da dê; Khân păng mĭn ŭch ƀư mhĭk ma gâp jêh ri lah:

⁸ “Păng geh du ntil nau ji hâu ngăn; Păng bê̆ch rvĕn, mâu mra dơi dâk ôh.”

⁹ Nđâp ma mĭt jiăng dăch lơn nuih n'hâm gâp rnơm nsing, Vay sa ƀănh gâp ăt yơk ndơl jâng tâm rdâng đah gâp.

¹⁰ Ơ Brah Yêhôva! Yô̆ nđach ma gâp Jêh ri kuăn rdâng gâp pôri gâp mra plơng ma khân păng.

¹¹ Yorlah phung rlăng mâu dơi lơn ma gâp, Yor nây gâp mra gĭt nau May maak nuih n'hâm ma gâp.

¹² May kuăn rdâng gâp yor nau sŏng gâp; May njêng gâp gŭ nâp tanăp May n'ho ro.

¹³ Mât ton ma Brah Yêhôva Brah Ndu phung Israel, Ntơm bơh rnôk n'ho ro tât rnôk n'ho ro Amen! Amen!