Nau Mprơ Ơm 118 - Nau Brah Ndu Ngơi 2023

Tâm rnê ma Brah Ndu yor nuih n'hâm ueh Păng hôm ƀaƀơ n'ho ro

¹ Tâm rnê hom ma Brah Yêhôva yorlah Păng jêng ueh; Yorlah nuih n'hâm ueh Păng hôm ƀaƀơ n'ho ro.

² Ăn phung Israel lah pô aơ: “Nau nuih n'hâm ueh Păng hôm ƀaƀơ n'ho ro.”

³ Ăn ngih Y-Arôn lah pô aơ: “Nuih n'hâm ueh Păng hôm ƀaƀơ n'ho ro.”

⁴ Ăn phung klach yơk ma Brah Yêhôva lah pô aơ: “Nuih n'hâm ueh Păng gŭ ƀaƀơ n'ho ro.”

⁵ Ta nklang nau rêh ni, gâp kuăl mbơh sơm ma Brah Yêhôva; Brah Yêhôva hŏ plơ̆ lah jêh ma gâp, jêh ri dơm gâp tâm ntŭk huy,

⁶ Brah Yêhôva gŭ koh dŏng gâp, gâp mâu mra klach ôh, Moh bunuyh dơi mra ƀư ma gâp?

⁷ Brah Yêhôva koh dŏng gâp; Păng jêng Nơm kơl gâp. Gâp mra saơ nau roh rai ma phung tâm rmot ma gâp.

⁸ Ueh lơn nde krap tâm Brah Yêhôva Đah rnơm ma kon bunuyh.

⁹ Ueh lơn nde krap tâm Brah Yêhôva, Đah rnơm nsing ma phung kon hađăch.

¹⁰ Lĕ bri dak nchueng jŭm gâp; Ma amoh Brah Yêhôva gâp ƀư rai khân păng!

¹¹ Khân păng gŭ jŭm gâp, nchueng jŭm gâp puăn mpeh; Ma amoh Brah Yêhôva gâp ƀư rai khân păng!

¹² Khân păng gŭ jŭm gâp nâm bu me sŭt; Ƀiălah bu su khân păng nâm bu ŭnh sa lok; Ma amoh Brah Yêhôva gâp ƀư rai khân păng!

¹³ May nklơ̆ gâp gay ma gâp cha lôt, Ƀiălah Brah Yêhôva koh dŏng jêh gâp.

¹⁴ Brah Yêhôva jêng nau ktang gâp jêh ri nau mprơ gâp; Păng yơh jêng nau tâm rklaih gâp.

¹⁵ Tâm ngih bok phung sŏng srăng geh nteh răm maak ma nau tâm rklaih: “Ti ma Brah Yêhôva ƀư lĕ kan toyh;

¹⁶ Ti ma Brah Yêhôva yơr prêh jêh; Ti ma Brah Yêhôva ƀư lĕ kan toyh!”

¹⁷ Gâp mâu mra khĭt ôh ƀiălah dơi rêh Gay gâp mra mbơh lĕ kan Brah Yêhôva.

¹⁸ Brah Yêhôva hŏ nduyh nkra gâp, Ƀiălah Păng mâu jao gâp ma nau khĭt ôh.

¹⁹ Pơk an ma gâp lĕ mpông pêr nau sŏng srăng, Gâp mra hăn lăp gay tâm rnê ma Brah Yêhôva.

²⁰ Aơ jêng mpông pêr Brah Yêhôva; Phung sŏng srăng mra lăp ta nây.

²¹ Gâp mra tâm rnê ma May yorlah May lŏ plơ̆ lah jêh ma gâp Jêh ri May jêng nau tâm rklaih gâp.

²² Lŭ phung ƀư ngih mƀăr lơi jêh Hŏ jêng jêh lŭ ta njônh ngih.

²³ Aơ jêng kan Kôranh Brah ƀư, Jêng kan khlay ngăn tanăp măt hên.

²⁴ Aơ jêng nar Brah Yêhôva ƀư jêh; Hên mra răm jêh ri maak ta nar nây.

²⁵ Ơ Brah Yêhôva! tâm rklaih hên ƀă; Ơ Brah Yêhôva! Ăn ma hên nau geh chăt jêng.

²⁶ Khư mprơ tâm rnê ma Nơm văch tâm amoh Brah Yêhôva! Bơh ngih Brah Yêhôva hên tâm rnê ma May.

²⁷ Yêhôva jêng Brah Ndu, May hŏ ăn nau ang ma hên. Kât mpa ƀư brah ma rse Ta lĕ nke nơng ƀư brah.

²⁸ May jêng Brah Ndu gâp, gâp mra tâm rnê ma May; May jêng Brah Ndu gâp, gâp mra yơk ma May.

²⁹ Tâm rnê hom ma Brah Yêhôva yorlah Păng jêng ueh; Nuih n'hâm ueh Păng hôm ƀaƀơ n'ho ro.