Nau Kơp Bunuyh 5 - Nau Brah Ndu Ngơi 2023

Nau vay ma nau kloh

¹ Brah Yêhôva lah ma Y-Môis:

² “Ntăm hom ma phung ƀon lan Israel ăn mprơh lơi lĕ rngôch phung geh phŭng, bunuyh geh nau ji luh jêh ri lĕ bunuyh geh nau ƀơ̆ ƀơch yor pah tât săk jăn khĭt.

³ Mprơh lơi hom khân păng luh bơh rmlak tahan nđâp lah bu klâu mâu lah bu ur, gay khân păng mâu mra ƀư ƀơ̆ ôh rmlak tahan jêng ntŭk Gâp gŭ ta nây.”

⁴ Phung ƀon lan Israel mprơh lơi khân păng luh bơh rmlak tahan tĭng nâm nau Brah Yêhôva lah jêh ma Y-Môis.

Nau vay ma nau ntrok

⁵ Brah Yêhôva lah tay ma Y-Môis:

⁶ “Lah hom ma phung ƀon lan Israel: ‘Tơlah du huê bu klâu mâu lah bu ur ƀư nau mhĭk ma bunuyh êng, jêng ƀư tih mâu răp jăp ôh đah Brah Yêhôva, bunuyh nây jêng tih jêh.

⁷ Ăn bunuyh nây mbơh nau tih jêh ri plơ̆ tay bêng tŏng, Rlau ma nây păng plơ̆ hom ntop du kô̆ tâm prăm ma bunuyh păng hŏ ƀư nau mhĭk.

⁸ Tơlah bunuyh geh nau mhĭk nây mâu hôm jêh ri mâu geh mpôl băl dăch ndŭl deh gay dơn ndơ nây, pôri ndơ nây mra jêng ndơ Brah Yêhôva jêh ri jao ma kôranh ƀư brah, ntop đŏng padih du biăp nkuăng ma ndơ ƀư brah chuai nau tih ma bunuyh geh nau tih nây.

⁹ Lĕ rngôch ndơ ƀư brah kloh ueh tă bơh phung ƀon lan Israel djôt leo ma kôranh ƀư brah mra jêng ndơ păng.

¹⁰ Lĕ ndơ kloh ueh ăp bunuyh nhhơr, mra jêng ndơ kôranh ƀư brah; moh ndơ ăp bunuyh ăn ma kôranh ƀư brah mra jêng ndơ păng đŏng.’”

Nau vay ma nau tâm ntôn

¹¹ Brah Yêhôva lah đŏng ma Y-Môis:

¹² “Lah hom ma phung ƀon lan Israel: ‘Tơlah du huê bu ur geh nau tih jêh ri mâu răp jăp đah sai păng;

¹³ tơlah geh du huê bu klâu bê̆ch ndrel đah bu ur nây, ƀiălah sai păng mâu gĭt jêh ri nau păng ƀư ƀơ̆ păng nơm ê hŏ gĭt (yorlah mâu geh ôh nau mbơh gay phong jêh ri bu mâu geh nhŭp ôh păng dôl păng ƀư),

¹⁴ tơlah sai ntôn ma ur păng yorlah nơm lĕ ƀư ƀơ̆ jêh mâu lah ntôn ur păng nđâp lah ur păng mâu ƀư ƀơ̆ ôh,

¹⁵ nôk nây bu klâu nây njŭn ur păng tât tanăp kôranh ƀư brah jêh ri djôt leo bar lit rnih ba ôrgơ jêng ndơ ƀư brah ma ur păng. Sai mâu nkhŭt ôh dak ngi ma ndơ ƀư brah jêh ri mâu đŏng ăn ndơ ƀâu kah ta klơ ndơ nây, yorlah ndơ nây jêng ndơ ƀư brah rnih môi ma nau tâm ntôn, du ndơ ƀư brah rnih môi gay kah gĭt ma nau tih.

¹⁶ Kôranh ƀư brah mra lah ma bu ur nây hăn dăch jêh ri ăn păng dâk tanăp Brah Yêhôva.

¹⁷ Jêh nĕ, kôranh ƀư brah sŏk dak kloh ueh nkhŭt tâm du yăng neh jêh ri kuak ndruyh neh tă tâm gre Ngih Bok jêh ri ăn păng tâm dak.

¹⁸ Kôranh ƀư brah lah ma bu ur dâk tanăp Brah Yêhôva, rơih lơi sŏk ta klơ bôk bu ur jêh ri dơm ndơ ƀư brah gay kah gĭt tâm mpang ti bu ur, jêng ndơ ƀư brah rnih môi ma nau tâm ntôn. Bi kôranh ƀư brah djôt yăng dak tăng nau rak rtăp tâm ti păng.

¹⁹ Kôranh ƀư brah ăn bu ur nây ton jêh ri lah ma păng: “Tơlah ay mâu mâp geh ôh du huê bu klâu lĕ tă bê̆ch ndrel ay jêh ri tơlah ay mâu geh nau tih ma sai ay jêh ri mâu geh nau ƀơ̆ ôh, pôri dak tăng nau rak rtăp nây mâu mra ƀư mhĭk ma ay.

²⁰ Ƀiălah, tơlah ay hŏ geh sai jêh, ƀiălah ay geh nau tih jêh ri ƀư ƀơ̆ ma du huê bu klâu êng mâu di sai ay...”

²¹ (nôk nây kôranh ƀư brah ăn bu ur ton sơm ma nau rak rtăp) jêh ri lah tay ma bu ur: “Dăn Brah Yêhôva ăn ma ay jêng du ntil ndơ rak rtăp jêh ri ndơ bu suai rak ta nklang phung ƀon lan ay, ƀư ăn ay glet nglu jêh ri ndŭl môr, săk jăn ay kro.

²² Dăn dak tăng nau rak rtăp aơ lăp tâm proch klơm ay ƀư ma ndŭl ay pŭk môr jêh ri glet nglu.” Bu ur nây mra lah pô aơ: “Amen. Amen!”

²³ Jêh nây, kôranh ƀư brah nchih hom lĕ nau rak rtăp aơ tâm du ndrom samƀŭt, jêh ri păng mhĭng ma dak tăng.

²⁴ Kôranh ƀư brah mra ăn bu ur nây nhêt dak tăng nau rak rtăp, jêh ri dak tăng nây mra lăp tâm săk bu ur, ƀư ma păng geh nau ji glăm.

²⁵ Kôranh ƀư brah mra sŏk tă bơh ti bu ur nây ndơ ƀư brah rnih môi ma nau tâm ntôn ryeng pa tê̆ ryeng pa djaơ tanăp Brah Yêhôva jêh ri nhhơr ta klơ nơng ƀư brah.

²⁶ Kôranh ƀư brah sŏk du mbăt rnih ndơ ƀư brah rnih môi ma nau kah gĭt jêh ri gŭch ta klơ nơng ƀư brah, jêh lah ma bu ur nhêt dak tăng.

²⁷ Tơlah kôranh ƀư brah lĕ ăn jêh bu ur nhêt dak tăng, tơlah bu ur nây ƀư ƀơ̆ jêh păng nơm jêh ri mâu gŭ răp jăp ôh đah sai păng, pôri dak tăng nau rak rtăp mra lăp tâm săk păng, ƀư ma păng geh nau rêh ni, rngot, ndŭl păng mra pŭk môr jêh ri glet nglu. Bu ur nây mra jêng nau rak rtăp ta nklang phung ƀon lan păng.

²⁸ Bi tơlah bu ur nây mâu geh ƀư ƀơ̆ ôh păng, ăt hôm jêng kloh nglang, păng mâu geh nau mhĭk jêh ri păng mra deh kon.

²⁹ Nây nau vay ma nau tâm ntôn, tơlah du huê bu ur hŏ geh sai jêh ƀiălah ăt geh nau tih jêh ri ƀư ƀơ̆ păng nơm,

³⁰ mâu lah tơlah sai ntôn ma ur păng. Sai djôt leo hom ur păng tât tanăp Brah Yêhôva jêh ri kôranh ƀư brah mra dŏng lĕ nau vay nây ma bu ur nây.

³¹ Sai păng mâu mra geh tih ôh, ƀiălah ur păng mra anh nau rmal tơlah ur păng ƀư tih.’”