Nau Kơp Bunuyh 27 - Nau Brah Ndu Ngơi 2023

Nau vay ma drăp ndơn

¹ Nôk nây phung kon bu ur Y-Sêlôpêhat, kon bu klâu Y-Hêpher, sau Y-Gilêat, se Y-Makir, săn Y-Manasê, tâm phung ndŭl mpôl Manasê, jêng kon bu klâu Y-Yôsep, hăn dăch. Amoh phung kon bu ur nây jêng: H'Mahla, H'Nôa, H'Hôgla, H'Milka jêh ri H'Tirsa.

² Khân păng tâm mâp ma Y-Môis, kôranh ƀư brah Y-Êlêasar, phung kôranh chiă uănh jêh ri lĕ rngôch phung tâm rƀŭn ta mpông Ngih Bok Nau Tâm Rƀŭn, jêh ri lah:

³ “Mbơ̆ hên khĭt tâm bri rdah. Păng mâu hăn tĭng trong Y-Kôra jêng phung rgum băl tâm rdâng đah Brah Yêhôva, ƀiălah păng hŏ khĭt yor nau tih păng nơm jêh ri păng mâu geh kon bu klâu ôh.

⁴ Mâm amoh mbơ̆ hên bu ăn roh lơi bơh ndŭl mpôl păng, yorlah păng mâu geh kon bu klâu ôh? Ăn ma hên du gâl neh jêng drăp ndơn ta nklang phung oh nâu mbơ̆ hên.”

⁵ Y-Môis djôt leo nau phung kon bu ur nây tât tanăp Brah Yêhôva,

⁶ Brah Yêhôva lah ma Y-Môis pô aơ:

⁷ “Phung kon bu ur Y-Sêlôpêhat lah di. May pă hom ma khân păng du gâl neh jêng drăp ndơn ta nklang phung oh nâu mbơ̆ khân păng jêh ri jao ma khân păng drăp ndơn mbơ̆ khân păng.

⁸ Ăn may lah ma phung ƀon lan Israel pô aơ: ‘Tơlah du huê bunuyh khĭt, mâu geh kon bu klâu ôh, pôri khân may jao hom drăp ndơn păng ăn ma phung kon bu ur păng.

⁹ Tơlah păng mâu geh ôh kon bu ur, khân may jao hom drăp ndơn ma phung oh nâu păng.

¹⁰ Tơlah păng mâu geh ôh oh nâu, khân may jao hom drăp ndơn ma kônh va păng.

¹¹ Jêh ri tơlah păng mâu geh ôh kônh va, khân may jao drăp ndơn păng ma nơm jêng mpôl dăch đah păng, jêh ri păng mra dơn drăp ndơ nây’”. Nau nây mra jêng nau vay dăp ma phung ƀon lan Israel di nâm Brah Yêhôva hŏ ntĭnh jêh ma Y-Môis.

Y-Môis jao nau chiă uănh ma Y-Yôsuê

¹² Brah Yêhôva lah ma Y-Môis: “Hăn hao hom yôk Abarim aơ jêh ri n'gơr uănh n'gor Gâp ăn jêh ma phung ƀon lan Israel.

¹³ Tơlah may uănh saơ n'gor nây jêh, may mra dơi plơ̆ sĭt ma phung chô yau nâm nâu may jêng Y-Arôn,

¹⁴ yorlah ta bri rdah Sin, khân may hŏ tâm rdâng jêh đah nau vay Gâp dôl phung tâm rƀŭn tâm djrel ma dak nhêt jêh ri khân may mâu yơk ôh ma nau kloh ueh Gâp ta tra măt khân păng.” Nây jêng dak ma tâm djrel ta Mêriba Kadês tâm bri rdah Sin.

¹⁵ Y-Môis lah ma Brah Yêhôva:

¹⁶ “Ơ Brah Yêhôva jêng Brah Ndu ma phung huêng lĕ rngôch nglay săk! Dăn Kôranh Brah săch du huê bunuyh ma phung tâm rƀŭn

¹⁷ gay nơm mra hăn luh jêh ri hăn lăp tay panăp khân păng, jêng nơm mra njŭn khân păng hăn luh jêh ri njŭn khân păng hăn lăp; pônây phung tâm rƀŭn Brah Yêhôva mâu mra nâm biăp mâu geh nơm chiăp.”

¹⁸ Brah Yêhôva lah ma Y-Môis: “Săch hom Y-Yôsuê, kon bu klâu Y-Nun, du huê bunuyh geh Huêng Brah tâm păng, jêh ri pah ti ta klơ păng,

¹⁹ jêh nây leo păng tâm mâp ma kôranh ƀư brah Y-Êlêasar jêh ri lĕ rngôch phung tâm rƀŭn, jêh ri jao nau kan ma păng tanăp măt lĕ rngôch bunuyh.

²⁰ Jao hom ăn ma păng ƀaƀă nau dơi may, gay ma lĕ rngôch phung ƀon lan Israel tâm rƀŭn tông tĭng ma păng.

²¹ Ăn Y-Yôsuê tâm mâp ma kôranh ƀư brah Y-Êlêasar jêh ri yor Y-Yôsuê kôranh ƀư brah mra joi gĭt nau mĭn Brah Yêhôva ma ôp Urim tanăp măt Brah Yêhôva. Tĭng nâm nau ntăm Y-Êlêasar, Y-Yôsuê nđâp lĕ rngôch phung tâm rƀŭn mra hăn luh jêh ri hăn lăp.”

²² Pônây Y-Môis ƀư di tĭng nâm nau Brah Yêhôva ntĭnh ntăm jêh. Păng săch Y-Yôsuê jêh ri leo păng hăn luh tanăp kôranh ƀư brah Y-Êlêasar jêh ri lĕ rngôch phung tâm rƀŭn.

²³ Y-Môis pah ti păng ta klơ Y-Yôsuê jêh ri jao nau kan ma păng di nâm nau Brah Yêhôva ntĭnh jêh ma Y-Môis.