Nau Kơp Bunuyh 24 - Nau Brah Ndu Ngơi 2023

Nau mbơh lor tal pe Y-Balaam

¹ Tơlah Y-Balaam saơ rah vah Brah Yêhôva ŭch ăn nau ueh uĭn ma phung Israel, păng mâu hôm joi kô̆ n'hŭm pol nâm ăp tơ̆ lor, ƀiălah păng rle muh măt păng mpeh bri rdah.

² Y-Balaam n'gơr uănh, păng saơ Israel ndâk ngih bok tĭng nâm ăp ndŭl mpôl, Huêng Brah Brah Ndu văch gŭ ta păng

³ jêh ri păng ngơi mpơl lor pô aơ: “Nau mbơh lor Y-Balaam, kon bu klâu Y-Bêôr, Nau mbơh lor ma nơm geh măt lin,

⁴ Nau mbơh lor tă bơh nơm tăng jêh nau Brah Ndu ngơi, Jêng nơm saơ jêh nau tâm saơ bơh Nơm Geh Lĕ Nau Brah, Păng cha lôt jêh ri măt lin jêh:

⁵ Hơi Y-Yakôb! Ueh ngăn ngih bok may! Hơi Y-Israel! Ueh ngăn ntŭk may gŭ!

⁶ Nâm bu rlŭng lĭ lam, Nâm bu n'gar trao ta meng kơh dak krong, Nâm bu tơm si alôê Brah Yêhôva hŏ tăm, Nâm bu tơm si sêdar ta meng n'hor dak.

⁷ Dak mra ler padih tă trôm thŭng dâng khân păng, Găr ntil khân păng mra gŭ tâm âk ntŭk geh dak tŏ, Hađăch khân păng mra jêng toyh lơn ma Y-Agak, Ƀon bri hađăch khân păng mra dơi tâm rnê.

⁸ Brah Ndu hŏ njŭn jêh khân păng luh bơh n'gor Êjipt; Khân păng geh nau ktang nâm ndrôk bri, Mra rvăn lĕ bri dak rlăng ma khân păng, Nkê̆ch lơi jêh nting khân păng jêng âk gâl, Jêh ri pănh ma hăr ƀư rai khân păng.

⁹ Khân păng bê̆ch, păn nâm bu du mlâm yau mŭr nkuăng Jêh ri nâm bu du mlâm yau mŭr me. Mbu nơm mra rbĭch khân păng? Ngăn ăn nau ueh uĭn ma mbu nơm mra ăn nau ueh uĭn ma may, Rtăp rah hom ma mbu nơm mra rak rtăp ma may.”

Y-Balak mprơh Y-Balaam

¹⁰ Dôl nây, Y-Balak hao ji nuih ma Y-Balaam, bar ti mbang lăp ndrăng jêh ri lah ma Y-Balaam: “Gâp kuăl jêh may gay ăn may rak rtăp ma phung rlăng gâp, ƀiălah may ăn nau ueh uĭn ma khân păng pe tơ̆ jêh!

¹¹ Yor nây aƀaơ dâk hăn hom may rlet ma n'gor may nơm! Gâp ton mra ăn nkhôm ma may nanê̆ ngăn, ƀiălah Brah Yêhôva mâu ăn ma may sŏk dơn.”

¹² Y-Balaam lah ma Y-Balak pô aơ: “Gâp mâu hĕ geh lah ma phung mbơh may hŏ prơh tât jêh:

¹³ ‘Nđâp tơlah Y-Balak ăn ma gâp ngih toyh geh bêng ma prăk jêh ri mah, gâp mâu dơi ƀư rlau ir ôh ma nau ntăm bơh Brah Yêhôva ngơi jêh, ŭch ƀư nau ueh mâu lah ƀư nau mhĭk tĭng gâp nơm ŭch?’ Gâp knŏng ngơi moh nau Brah Yêhôva ntĭnh jêh!

¹⁴ Aơ, aƀaơ gâp plơ̆ sĭt ma phung ƀon lan gâp nơm. Ƀiălah văch hom, gâp mra mbơh ma may gĭt moh nau phung ƀon lan aơ mra ƀư ma phung ƀon lan may tâm lĕ nar kăndơ̆.”

Nau mbơh lor tal puăn Y-Balaam

¹⁵ Y-Balaam ngơi mbơh lor pô aơ: “Nau mbơh lor Y-Balaam kon bu klâu Y-Bêôr ngơi, Nau mbơh lor tă bơh bunuyh geh măt lin jêh,

¹⁶ Nau mbơh lor tă bơh nơm iăt nau Brah Ndu ngơi, Gĭt nau gĭt rbăng Nơm Dŭt Prêh, Saơ nau tâm saơ tă bơh Nơm Geh Lĕ Nau Brah, Cha lôt ro jêh ri geh măt lin jêh:

¹⁷ Gâp saơ Păng, ƀiălah mâu di aƀaơ ôh; Gâp uănh Păng, ƀiălah mâu di gŭ dăch ôh; Du mănh mbing mra luh bơh phung Yakôb, Du mlâm mâng jra hađăch mra luh bơh phung Israel; Păng mra ƀư rlâm lơi rho ndăr kleng n'gor Môap Jêh ri đon hađăch tă bơh noi deh Set.

¹⁸ Bu mra pit sŏk Êđôm, Sêir jêng phung rlăng, bu mra tŭn jot, Ƀiălah Israel mra dơi ma nau janh ktang.

¹⁹ Nơm luh tă bơh Yakôb mra chiă uănh; Păng mra ƀư rai lĕ bunuyh hôm rêh klen bơh ƀon.”

²⁰ Y-Balaam saơ ma phung ƀon lan Y-Amalek jêh ri ngơi mpơl lor pô aơ: “Amalek jêng mrô nguay tâm lĕ bri dak, Ƀiălah nau lôch dŭt păng mra rai lôch lĕ.”

²¹ Jêh nây, Y-Balaam saơ ma phung Kênit jêh ri ngơi nau mbơh lor pô aơ: “Ntŭk may gŭ jêng nâp, May ƀư rsuăn may nơm tâm lŭ.

²² Ƀiălah may, phung Kênit, mra rai Nôk phung Asur njŭn leo mra jêng bu nă.”

²³ Y-Balaam ngơi nau mbơh lor pô aơ: “Vư! Tơlah Brah Ndu ƀư nau aơ, Mbu jêng lĕ phung rƀŭn ndrel mpeh bơh lơ?

²⁴ Nĕ jêng lĕ bunuyh tă bơh kơh dak mƀŭt Kitim Ƀư nau mhĭk ma Asur jêh ri Êber. Ƀiălah jêh nây khân păng nơm đŏng mra rai lôch lĕ.”

²⁵ Jêh nây, Y-Balaam dâk plơ̆ sĭt ma n'gor păng nơm jêh ri tâm ban đŏng Y-Balak hăn trong păng nơm.