Nau Kơp Bunuyh 20 - Nau Brah Ndu Ngơi 2023

H'Miriam khĭt

¹ Ta khay nguay, lĕ rngôch phung ƀon lan Israel tâm rƀŭn hăn tât bri rdah Sin jêh ri gŭ njơh ta Kadês. H'Miriam khĭt jêh ri bu tâp brôi păng ta nây.

Lŭ toyh luh dak

² Nôk nây, mâu geh ôh dak ma phung tâm rƀŭn, pôri khân păng rƀŭn ndrel gay tâm rdâng đah Y-Môis jêh ri Y-Arôn.

³ Phung ƀon lan tâm jreh đah Y-Môis jêh ri lah: “Oh nâu hên khân păng hŏ khĭt jêh tanăp Brah Yêhôva; ueh lơn khĭt ndrel ma phung oh nâu hên đŏng!

⁴ Mâm may njŭn jêh phung tâm rƀŭn Brah Yêhôva mŭt tâm bri rdah aơ gay hên jêh ri mpô mpa rong hên khĭt ta aơ?

⁵ Mâm may njŭn hên luh bơh Êjipt jêh nây njŭn hên tât ntŭk dŭt krit kir aơ, jêng ntŭk bu mâu dơi tuch ba ôh, mâu đŏng tăm tơm rvi, tơm krăk ƀâu, tơm pom gra nat ôh jêh ri mâu geh ôh dak nhêt?”

⁶ Y-Môis jêh ri Y-Arôn du tă bơh phung tâm rƀŭn, hăn tât ta mpông Ngih Bok Nau Tâm Rƀŭn jêh ri chŭn muh măt ta neh. Nau chrêk rmah Brah Yêhôva tâm mpơl ma bar hê khân păng.

⁷ Brah Yêhôva lah ma Y-Môis:

⁸ “Sŏk hom mâng, jêh nây may jêh ri nâu may jêng Y-Arôn kuăl rgum phung tâm rƀŭn. Ngơi hom ma lŭ toyh tanăp măt phung tâm rƀŭn gay ma păng luh dak. May mra ƀư ăn dak luh tă bơh lŭ toyh hoch ăn phung tâm rƀŭn jêh ri mpô mpa rong khân păng nhêt.”

⁹ Pônây, Y-Môis djôt mâng tanăp măt Brah Yêhôva nâm Păng hŏ ntĭnh jêh.

¹⁰ Y-Môis jêh ri Y-Arôn kuăl rgum phung tâm rƀŭn hăn tât panăp lŭ toyh jêh ri lah: “Hơi phung tâm rdâng, iăt hom! Hên mra ƀư ăn dak tă bơh lŭ toyh aơ rdŭl luh dak ma khân may dơi lĕ?”

¹¹ Ti Y-Môis djôt mâng yơr jêh ri dong ta lŭ toyh bar tơ̆. Dak luh rdŭl âk râk; phung tâm rƀŭn jêh ri mpô mpa rong khân păng nhêt đŏng.

¹² Ƀiălah Brah Yêhôva lah ma Y-Môis jêh ri Y-Arôn: “Yorlah khân may mâu rnơm ma Gâp gay yơk ma nau kloh ueh Gâp tanăp măt phung ƀon lan Israel, yor nây khân may mâu mra njŭn phung tâm rƀŭn aơ lăp tâm n'gor Gâp ăn jêh ma khân păng.”

¹³ Dak nhêt nây dơi rnha jêng dak nhêt Mêriba, jêng ntŭk phung ƀon lan Israel tâm rlăch đah Brah Yêhôva jêh ri Păng geh nau kloh ueh tanăp măt khân păng.

Hađăch Êđôm mâu ăn phung Israel hăn rgăn n'gor khân păng nơm

¹⁴ Tă bơh Kadês, Y-Môis prơh phung mbơh hăn tâm mâp đah hađăch n'gor Êđôm, lah pô aơ: “Israel jêng oh hađăch, păng lah: Hađăch gĭt jêh lĕ nau rêh ni hŏ tât ma hên

¹⁵ jêh ri nau phung chô yau hên hăn trŭnh hăn jêh ma n'gor Êjipt. Hên hŏ gŭ jêh ta nây jŏ năm; jêh ri phung Êjipt hŏ ƀư nau mhĭk hên jêh ri chô yau hên.

¹⁶ Hên nter ma Brah Yêhôva; Păng hŏ tăng bâr hên jêh ri prơh du huê tông mpăr njŭn hên du luh bơh n'gor Êjipt. Aơ, hên dôl gŭ ta Kadês jêng du ƀon ta n'har đah nkual hađăch.

¹⁷ Dăn ăn hên hăn rgăn n'gor hađăch. Hên mâu mra hăn rgăn tâm lŏ sre mâu lah đang krăk ƀâu ôh, jêh ri hên mâu lĕ mra nhêt dak tă bơh lĕ ntu dak. Hên mra hăn tĭng trong toyh hađăch, hên mâu mra teng pa ma mâu lah pa chiau, kŏ tât nôk hên rgăn lĕ n'gor hađăch.”

¹⁸ Ƀiălah hađăch Êđôm ơh nau: “May mâu dơi hăn rgăn nkual gâp; lah mâu, gâp mra sŏk đao hăn tâm chuă đah may.”

¹⁹ Phung ƀon lan Israel lah tay ma păng: “Hên mra hăn tĭng trong toyh, jêh ri tơlah hên jêh ri mpô mpa rong hên nhêt dak may, hên mra mplơ̆ prăk. Knŏng dăn ăn hên hăn rgăn ta nây, hên mâu ƀư nau êng ôh.”

²⁰ Ƀiălah hađăch Êđôm lah: “May mâu dơi hăn rgăn ôh!” Jêh nây phung Êđôm ndrel ma phung tahan ktang luh du tâm rdâng đah phung ƀon lan Israel.

²¹ Pônây, Êđôm mâu dơi ăn phung ƀon lan Israel hăn rgăn nkual khân păng nơm, pôri phung Israel hăn du ngai bơh khân păng.

Y-Arôn khĭt

²² Lĕ rngôch phung Israel tâm rƀŭn hăn bơh Kadês tât ta yôk Hor.

²³ Brah Yêhôva lah ma Y-Môis jêh ri Y-Arôn ta klơ yôk Hor, dăch ta n'har n'gor Êđôm,

²⁴ “Y-Arôn mra sĭt ma phung chô yau păng nơm; păng mâu dơi lăp ôh tâm n'gor Gâp ăn jêh ma phung ƀon lan Israel, yorlah khân may hŏ ƀư nau tâm rdâng, mâu tông tĭng nau ntăm Gâp ntĭnh ta dak nhêt Mêriba.

²⁵ Djôt leo hom Y-Arôn jêh ri Y-Êlêasar, phung kon bu klâu păng, hăn hao klơ yôk Hor,

²⁶ jêh nây doh lơi kho ao Y-Arôn jêh ri nsoh kho ao nây ma Y-Êlêasar, kon bu klâu păng. Ta nây, Y-Arôn mra dơi sĭt ndrel chô yau jêh ri khĭt.”

²⁷ Pôri, Y-Môis ƀư di tĭng nâm Brah Yêhôva hŏ ntĭnh jêh. Pe bunuyh hăn hao yôk Hor tanăp măt lĕ rngôch phung tâm rƀŭn.

²⁸ Y-Môis doh kho ao Y-Arôn jêh ri nsoh kho ao nây ma Y-Êlêasar, kon bu klâu păng. Y-Arôn khĭt ta nây, ta klơ n'gơn yôk. Jêh nây Y-Môis jêh ri Y-Êlêasar hăn trŭnh tă bơh yôk.

²⁹ Lah saơ Y-Arôn lĕ khĭt jêh, lĕ rngôch phung Israel tâm rƀŭn nhhiăng nhĭm ma Y-Arôn tâm pe jât nar.