Nau Kơp Bunuyh 11 - Nau Brah Ndu Ngơi 2023

Phung ƀon lan ngơi ƀrôk

¹ Aƀaơ, phung ƀon lan ngơi ƀrôk jêh ri nau nây ƀư Brah Yêhôva mâu di nuih. Brah Yêhôva tăng jêh ri Păng hao ji nuih. Ŭnh Brah Yêhôva su ta nklang phung ƀon lan jêh ri su ma ŭnh ta pĭt ntŭk rmlak tahan.

² Phung ƀon lan kuăl ma Y-Môis. Y-Môis mbơh sơm ma Brah Yêhôva jêh ri ŭnh rngơt ro.

³ Bu ntơ ntŭk nây jêng Tabêra yorlah ŭnh Brah Yêhôva hŏ su ta nklang phung ƀon lan.

⁴ Phung bu năch gŭ ta nklang phung Israel geh nau ŭch kơnh ndơ sông sa kŏ tât phung ƀon lan Israel nhĭm đŏng pô aơ: “Mbu sâm ăn ma hên sa puăch?

⁵ Hên kah gĭt ma ka hên sa mâu rvăt ma prăk ta Êjipt, nđâp ma rpŭng, rpŭng tôk, kdĭm, jiăm jêh ri toi.

⁶ Aƀaơ, săk jăn hên huănh hươi jêh, mâu geh du ntil ndơ sa, knŏng saơ mana dơm.”

⁷ Mana tâm ban ma bu găr kôriander, uănh nâm bu dak ƀlĭt n'ho.

⁸ Phung ƀon lan hăn bra, dônh djôt sĭt jêh ri kĭn đah mpăl rvah mâu lah juh ma mpăl, jêh ri gâm păng tâm glah mâu lah ƀư ƀănh. Ƀâu kah păng nâm bu sa ƀănh pot dak ngi.

⁹ Tơlah dak ngom tŭp dôl măng ta klơ rmlak tahan, pôri mana ăt tŭp đŏng.

¹⁰ Y-Môis tăng phung ndŭl mpôl nhĭm nhhiăng, lĕ rngôch bunuyh nhĭm da dê ta mpông ngih bok khân păng. Brah Yêhôva hao ji nuih duh ngăn jêh ri Y-Môis rngot ngăn ma nau nây.

¹¹ Y-Môis lah ma Brah Yêhôva: “Mâm May ƀư rêh ni ma oh mon May? Nâm bu gâp mâu geh nau yô̆ ôh tanăp măt May? Mâm May ăn tŭp nau jâk lĕ rngôch phung ƀon lan aơ ta gâp?

¹² Gâp hĕ bă ntreo ma lĕ rngôch phung ƀon lan aơ? Gâp hĕ deh ma khân păng, May lah ma gâp: ‘Chông hom phung ƀon lan aơ ta ntang ntơh may nâm bunuyh sâm mpu chông kon se hôm e pu, kŏ tât nôk khân păng lăp tâm n'gor May hŏ sơm ton jêh gay ăn ma phung chô yau khân păng?’

¹³ Ta ntŭk gâp sŏk puăch gay ăn ma lĕ rngôch phung ƀon lan aơ? Yorlah khân păng kuăl nhĭm tanăp gâp jêh ri lah: ‘Ăn ma hên sa puăch.’

¹⁴ Du huê gâp mâu dơi anh êng lĕ rngôch phung ƀon lan aơ yorlah khân păng jêng kan jâk ir ma gâp!

¹⁵ Tơlah Kôranh Brah ƀư pô aơ ma gâp jêh ri tơlah gâp geh nau yô̆ tanăp măt Kôranh Brah, dăn nkhĭt hom gâp gay gâp mâu saơ ôh nau rêh ni gâp!”

Săch pơh jât kôranh bu ranh

¹⁶ Brah Yêhôva lah ma Y-Môis: “Rgum hom pơh jât nuyh tâm phung kôranh bu ranh Israel, jêng phung may gĭt năl jêh jêng kôranh bu ranh jêh ri kôranh chiă uănh phung ƀon lan. Njŭn leo hom khân păng tât ta Ngih Bok Nau Tâm Rƀŭn, jêh ri ăn khân păng dâk ndrel ma may ta nây.

¹⁷ Gâp mra jŭr jêh ri ngơi ndrel đah may ta nây. Gâp mra sŏk Huêng Gâp gŭ ta klơ may gay ăn ma khân păng, jêh ri khân păng mra anh nau kan jâk phung ƀon lan aơ ndrel ma may, mâu di du huê may anh nau jâk nây.

¹⁸ Ăn may lah ma phung ƀon lan pô aơ: ‘Ôi taơ, ndrăp ăn kloh hom khân may nơm jêh ri khân may mra sa puăch. Yorlah tôr Brah Yêhôva tăng khân may nhĭm nhhiăng pô aơ “Mbu mra ăn ma hên puăch sa” yorlah hên hŏ gŭ rêh jêh ueh jêh ta Êjipt. Yor ri, Brah Yêhôva mra ăn puăch ma khân may jêh ri khân may mra sa puăch.

¹⁹ Khân may mra sa puăch mâu di ôh knŏng du nar, bar nar, prăm nar, jât nar mâu lah bar jât nar,

²⁰ ƀiălah sa lĕ du khay, kŏ tât dôl puăch nây luh du ta trôm muh jêh ri tâm rmot ma ndơ, yorlah khân may dun jêh ma Brah Yêhôva Nơm dôl gŭ ta nklang khân may, jêh ri nhĭm tanăp Păng pô aơ: “Mâm ƀư hên dĭng du luh tă bơh Êjipt?”’”

²¹ Y-Môis ơh: “Gâp dôl dâk ta nklang phung ƀon lan geh prao rhiăng rbăn bu klâu jêh ri May lah pô aơ: ‘Gâp mra ăn puăch ma khân păng sa lĕ du khay.’

²² Tơlah bu nkhĭt lĕ biăp jêh ri ndrôk, tŏng ma khân păng lĕ? Tơlah bu nhŭp lĕ ka tâm dak rlai, tŏng ma khân păng lĕ?”

²³ Brah Yêhôva lah ma Y-Môis: “Ti Brah Yêhôva jêng gleh ir lĕ? Ăn may kâp uănh nau Gâp ngơi jêh ma may mra dơi jêng nau ngăn mâu lah mâu!”

²⁴ Y-Môis hăn luh jêh ri nkoch tay nau ngơi Brah Yêhôva ma phung ƀon lan jêh ri rgum pơh jât nuyh phung bu ranh tâm phung ƀon lan khân păng gŭ jŭm Ngih Bok Nau Tâm Rƀŭn.

²⁵ Brah Yêhôva jŭr tâm ndâr tŭk jêh ri ngơi ma Y-Môis. Păng sŏk Huêng Brah gŭ ta klơ Y-Môis jêh ri ăn ma pơh jât kôranh bu ranh. Nôk Huêng Brah gŭ ta klơ pơh jât kôranh bu ranh, khân păng mbơh lor. Ƀiălah khân păng mâu hôm mbơh lor đŏng.

²⁶ Geh bar hê hôm e gŭ tâm rmlak tahan, du huê amoh jêng Y-Eldat, jêh ri du huê amoh jêng Y-Mêdat. Huêng gŭ ta klơ bar hê aơ. Khân păng geh amoh tâm phung bu nchih săk kôranh bu ranh ƀiălah khân păng mâu hăn tât ta Ngih Bok Nau Tâm Rƀŭn. Pônây khân păng mbơh lor tâm rmlak tahan.

²⁷ Du huê bu klâu ndăm nchuăt tât mbơh nau nây ma Y-Môis pô aơ: “Y-Eldat jêh ri Y-Mêdat gŭ ngơi mbơh lor tâm rmlak tahan.”

²⁸ Y-Yôsuê, kon bu klâu Y-Nun, jêng oh mon Y-Môis tă bơh rnôk hôm ndăm năm, păng lah: “Ơh Y-Môis, kôranh gâp, buay hom khân păng!”

²⁹ Y-Môis ơh nau: “Di lĕ may nach yor ma gâp? Vư! Ŭch ma lĕ rngôch phung ƀon lan Brah Yêhôva jêng phung nơm mbơh lor jêh ri Brah Yêhôva ăn ma Huêng Brah Păng ma khân păng!”

³⁰ Y-Môis jêh ri phung bu ranh phung Israel plơ̆ sĭt ma rmlak tahan.

Sĭm gôi

³¹ Rnôk nây, Brah Yêhôva ăn du rôn sial khôm sĭm gôi tă bơh dak mƀŭt tât ta rmlak tahan jêh ri leo phung sĭm gôi jŭm rmlak tahan, ăp mpeh dĭ du nar hăn trong jêh ri tă bơh klơ neh plơ̆ klơ mbâl klăp lah du met.

³² Phung ƀon lan dâk hăn dônh phung sĭm gôi tâm nar nây, măng nây jêh ri du nar ôi taơ. Mbu dônh djê̆ lơn đŏng geh jât hômer. Khân păng ih sĭm gôi jŭm rmlak tahan.

³³ Tâm nôk puăch sĭm ăt hôm ta sêk khân păng, ê hŏ rvăn ôh, Brah Yêhôva ji hao duh nuih ma phung ƀon lan jêh ri Brah Yêhôva rmal phung ƀon lan ma nau mhĭk toyh.

³⁴ Bu ntơ amoh ntŭk nây jêng Kibrôt-Hatava, yorlah ta nây bu tâp brôi phung ƀon lan geh nuih n'hâm kơnh sa.

³⁵ Ntơm bơh Kibrôt-Hatava, phung ƀon lan dâk hăn tât Hasêrôt jêh ri khân păng dơi rlu ta nây.