Nau Hôr 29 - Nau Brah Ndu Ngơi 2023

¹ Bunuyh bu nduyh ƀaƀơ lơ hô ƀư dăng ko, Mra rai yot ƀât lât dơm, mâu hôm geh trong dơi săm ôh.

² Lah bunuyh sŏng srăng bĭk rơ̆ phung ƀon lan răm rhơn, Ƀiălah nôk phung djơh chiă uănh, phung ƀon lan lŭng nter.

³ Mbu nơm rŏng ma nau blau mĭn ƀư ăn mbơ̆ răm maak, Bi ma nơm ƀư băl đah phung bu ur văng tĭr, ƀư rai drăp ndơ.

⁴ Ma nau sŏng, hađăch ƀư ăn bri dak dơi nâp, Ƀiălah mbu nơm sŏk dơn drăp bu blŏl, ƀư rai bri dak.

⁵ Mbu nơm ngơi njĭp phung chiau meng, Jêng drăng nhuăl tâm dâng jâng păng nơm.

⁶ Tâm nau tih bơh phung mhĭk geh du mlâm dăk, Ƀiălah bunuyh sŏng srăng mprơ răm maak.

⁷ Bunuyh sŏng srăng gĭt nau di ma phung o ach, Bi phung mhĭk mâu gĭt rbăng ôh nau blau mĭn âk.

⁸ Phung dăng mưch mpoh ŭnh ăn ƀon toyh roh rai, Ƀiălah bunuyh blau mĭn ƀư ăn djoh nau ji nuih.

⁹ Tơlah bunuyh blau mĭn tâm rlăch đah bunuyh rluk, Nđâp tơlah păng nuih mâu lah gơm mâu geh ôh nau đăp mpăn.

¹⁰ Bunuyh ji hir mham tâm rmot ma bunuyh mâu geh ôh nau tih, Ƀiălah phung sŏng mra mât njrăng nau rêh nơm nây.

¹¹ Bunuyh rluk mpơl lĕ nau ji nuih păng nơm, Bi bunuyh blau mĭn nsrôih ât nau nuih păng.

¹² Tơlah kôranh chiă uănh iăt nau ngơi mƀruh, Pôri lĕ rngôch phung oh mon păng jêng djơh.

¹³ Bunuyh o ach jêh ri nơm tŭn jot tâm mâp ndrel ta ntŭk aơ: Brah Yêhôva ăn nau ang ma bar đah măt ma lĕ bar hê.

¹⁴ Mbu moh hađăch phat dôih sŏng ăn phung o ach, Pôri sưng hađăch mra dơi nâp n'ho ro.

¹⁵ Mâng rvĕ jêh ri nau nduyh ăn ma nau blau mĭn, Bi du huê kon brơl ƀư bêk mê̆ păng.

¹⁶ Lah phung djơh hao bĭk, pôri nau tih lơ bĭk rơ̆, Ƀiălah phung sŏng srăng mra saơ nau roh rai khân păng.

¹⁷ Nduyh nkra hom kon may, păng mra ăn may dơi geh nau đăp mpăn, Jêh ri ƀư ăn nuih n'hâm may răm maak.

¹⁸ Ta ntŭk mâu geh ôh nau tâm saơ, phung ƀon lan brơl dah ŭch, Ƀiălah ueh maak ăn bunuyh blau djôt prăp nau vay!

¹⁹ Lơi nduyh nkra oh mon đah nau ngơi dơm ôh, Yorlah nđâp lah păng rbăng, kŏ mâu tông đŏng.

²⁰ May saơ lĕ nơm ngơi ndal ir tâm nau ngơi păng? Du huê nơm rluk hôm e geh nau kâp gân lơn ma păng.

²¹ Mbu nơm rnơh ir oh mon păng ntơm bơh jê̆, Kêng dŭt păng mra jêng du huê nơm dăng bôk.

²² Bunuyh mơng nuih ƀư nau tâm djrel, Bunuyh duh nuih ƀư âk nau tih ngăn.

²³ Nau sưr bơh du huê bunuyh mra ntrŭnh lơi nơm nây, Ƀiălah mbu nơm geh nuih n'hâm dêh rhêt mra geh nau yơk.

²⁴ Mbu nơm tâm rnglăp ndrel bunuyh ntŭng jêng rlăng đah huêng păng nơm; Păng tăng nau rak rtăp ƀiălah mâu mpơl ôh du ntil nau.

²⁵ Rvê klach kon bunuyh jêng du mlâm dăk sân, Ƀiălah mbu nơm nsing ma Brah Yêhôva mơ dơi geh nau mpăn.

²⁶ Âk bunuyh tĭng joi nau yô̆ bơh phung kôranh chiă uănh, Ƀiălah nau di ăn kon bunuyh tă bơh Brah Yêhôva.

²⁷ Phung kue jêng nau tâm rmot đah bunuyh sŏng, Ƀiălah bunuyh rêh sŏng jêng tâm rmot ăn phung mhĭk.