Nau Hôr 25 - Nau Brah Ndu Ngơi 2023

Ndrom tal bar rgum tay lĕ nau hôr bơh Y-Salômôn

¹ Aơ tâm ban đŏng jêng lĕ nau hôr Y-Salômôn bơh phung oh mon Y-Hêsêkia, hađăch Yuđa, nchih tay đŏng:

² Nau chrêk ma lơp bơh Brah Ndu pôn ndâp du ntil nau, Ƀiălah nau chrêk ma lơp bơh phung hađăch jêng joi saơ du ntil nau nây.

³ Khân păng mâu dơi chrâng ôh lĕ nau prêh trôk jêh ri nau jru rplay neh nâm kơt nây, Pôri mâu lĕ dơi chrâng đŏng nuih n'hâm phung hađăch nâm pônây.

⁴ Sŏk hom mƀum luh bơh prăk, Ri mơ kôranh chiăr prăk dơi geh ndơ dŏng;

⁵ Ngluh lơi phung ƀai bơh măt hađăch Pôri sưng hađăch mra dơi ndâk nâp klơ mbon nau sŏng srăng.

⁶ Lơi n'hao êng may nơm tanăp măt hađăch, Mâu lĕ gŭ ta ntŭk bunuyh geh nau lư n'găr,

⁷ Yorlah ueh lơn bu lah đah may pô aơ: “Hao hom ta aơ,” Rlau lơn ntrŭnh may nơm tanăp măt phung kôranh may hŏ saơ jêh.

⁸ Lơi ir ndal ƀư nau phat dôih, Klach lah phung chiau meng may ƀư ma may bêk prêng Pôri nglĕ dŭt mâu hôm gĭt moh may mra ƀư.

⁹ Tâm thâng hom ndrel nơm chiau meng may, Ƀiălah lơi ta mpơl nau kan ndâp ma bu êng;

¹⁰ Klach lah nôk bu tăng nau nây mra ƀư bêk may, Jêh ri nau lư mhĭk may mâu dơi ndâp đŏng ôh.

¹¹ Nau ngơi nôk di mông Nâm bu play mandragôr đah mah geh lĭr prăk.

¹² Ma đah tôr gĭt iăt, nau nduyh bơh bunuyh blau mĭn Nâm bu du mlâm rgên mah, du ndơ nkrơ̆ đah mah chrêk.

¹³ Nơm ntuh bâr răp jăp ndrel ma nơm đă păng hăn Nâm bu pler nđik rngêt tâm nar yan rek, Yorlah păng ntop n'hâm suan ma huêng kôranh păng nơm.

¹⁴ Mbu nơm ntưih săk mƀruh nchơt ma ndơ păng nơm nhhơr Nâm bu geh tŭk, geh sial, mâu geh mih.

¹⁵ Băt ji nuih ƀaƀơ ri mơ dơi ntrôl kôranh chiă uănh; Bi ma mpiăt rdơ̆ rbăn nkê̆ch pă nting nđăng.

¹⁶ Tơlah may dơi joi dak sŭt, sa hom man mpay, Klach lah dôl sa hơm ir may mra hok đŏng.

¹⁷ Lơi ƀaƀơ nhuat jâng tât ngih phung chiau meng may, Klach lah păng dĭl đah may jêh ri nuih ma may đŏng.

¹⁸ Nơm ngơi nchơt tâm rdâng đah phung chiau meng păng Nâm bu du mlâm me nôp, du mlâm đao, chiông hăr mplanh.

¹⁹ Rnơm nsing ma nơm ƀlăch ƀlêr tâm nar uh ah Nâm bu sêk pă, nâm bu jâng glet.

²⁰ Mbu nơm mprơ ăn ma bunuyh geh nuih n'hâm rngot iăt Nâm bu nơm doh ao păng nơm tâm nar ji kăt, Jêh ri nâm bu dak srat nkhŭt ta klơ ntŭk sôt.

²¹ Tơlah phung rlăng may ji ngot, ăn păng sa hom; Tơlah păng ji hir, ăn nhêt hom;

²² Yorlah nâm bu pônây, may bun sa ônh rnga ta klơ bôk păng, Jêh ri Brah Yêhôva mra nkhôm ma may.

²³ Sial nđik jêng mih, Bi mpiăt ngơi kek ma nau ndâp ƀư ăn muh măt ji nuih hâu ngăn.

²⁴ Ueh lơn gŭ du njônh ta klơ chor ngih Rlau lơn jêng gŭ nsum du ngih ndrel ma bu ur mơng tâm djrel.

²⁵ Nau mhe mhan ueh bơh bri ngai tât Nâm bu dak nđik rngêt ăn ma bunuyh dôl ji hir.

²⁶ Bunuyh sŏng srăng prah tanăp măt bunuyh djơh mhĭk Nâm bu du n'hor dak ƀư rkhăl, du tu dak ƀơ̆ ƀơch.

²⁷ Sa dak sŭt âk ir mâu ueh ôh, Rvê ir tĭng joi nau chrêk rmah ăn păng nơm nâm bu pônây lĕ.

²⁸ Mbu nơm mâu blau chiă uănh nuih n'hâm păng nơm Nâm bu du rplay ƀon toyh lĕ rlâm, mpêr mâu nâp.