Nau Hôr 20 - Nau Brah Ndu Ngơi 2023

¹ Ndrănh ƀư ăn bu tâm mưch, ndơ nhêt nhŭl ƀư ăn nau ngơi drơu drơu; Mbu nơm dŏng păng rlau keh ir mâu di ôh jêng blau mĭn.

² Nau hađăch ji nuih toyh nâm bu yau mŭr rđuh ngrông; Mbu nơm nsônh hađăch ji nuih jêng ƀư nau mhĭk ma nau rêh păng nơm.

³ Bunuyh der bơh nau tâm djrel khư ma nau yơk; Knŏng phung rluk mâl mơ rduh lăp ta nây.

⁴ Bunuyh ƀlao mâu ŭch ôh jik kai mir di yan; Tât yan rek, păng mra dăn sa ƀiălah mâu geh ôh du ntil ndơ.

⁵ Nau nchră tâm nuih n'hâm kon bunuyh nâm bu ntu dak jru, Bunuyh gĭt rbăng mra bâk sŏk ta nây.

⁶ Âk bunuyh ngơi sưr pô aơ lah păng nơm jêng răp jăp, Ƀiălah mbu nơm dơi joi du huê bunuyh răp jăp?

⁷ Bunuyh sŏng srăng gŭ ngao tâm nau ueh; Phung kon sau bunuyh nây geh nau ueh lăng ngăn!

⁸ Hađăch gŭ ta klơ sưng phat dôih, Rle măt păng ôp sek lĕ rngôch nau mhĭk.

⁹ Mbu dơi lah: “Gâp hŏ ƀư kloh jêh nuih n'hâm gâp nơm; Gâp hŏ kloh jêh nau tih”?

¹⁰ Bar ntil rplay njing jêh ri bar ndơ nhueh, Lĕ bar ntil Brah Yêhôva tâm rmot da dê.

¹¹ Kan kon se ƀư, mâu lah nau kloh mâu lah nau di, Tâm mpơl da dê đah nau păng ƀư.

¹² Tôr gay tăng, măt gay saơ, Brah Yêhôva hŏ njêng jêh lĕ bar.

¹³ Lơi lêt bê̆ch, klach lah may plơ̆ jêng ndĭt trơi; Lin hom măt may mra dơi sa ƀănh kŏ tât hơm ngăn.

¹⁴ Bunuyh rvăt ndơ n'ho ngơi lah: “Mhĭk, mhĭk!” Jêh nây luh du rnê êng păng nơm.

¹⁵ Geh mah jêh ri âk lŭ khlay, Ƀiălah mpiăt blau mĭn jêng ndơ khlay ngăn ngên.

¹⁶ Kuăn sŏk hom ao păng yorlah păng hŏ chuai jêh ma bunuyh mâu bên; Mât prăp hom ndơ ƀư nau râng yorlah păng hŏ chuai bu ur bu năch.

¹⁷ Ƀănh yor tă nau ndơm mơ dơi geh, dôl nôk sa jêng kah njŭng, Ƀiălah pakơi nây, trôm mbung mra bêng lŭ chreh.

¹⁸ Yor tă nau tâm nchră, lĕ rngôch nau gŭ mĭn dơi ndâk njêng nâp; Ƀư nau tâm lơh hom đah nau blau mĭn.

¹⁹ Mbu nơm nkoch bri njĭp vay rhi mpơl ro nau dŭt ndâp; Lơi may tâm rnglăp ôh ndrel ma phung vay ngơi âk ir.

²⁰ Ŭnh kađen phung rak rtăp mê̆ mbơ̆ păng, Mra nhhât ta klong măng ngo klĕng.

²¹ Drăp ndơ dơi geh ngăch ndal nôk ntơm dak bôk Mâu mra dơi geh nau ueh uĭn ôh ta nglĕ dŭt.

²² Lơi lah ôh: “Gâp mra har plơng!” Gŭ kâp hom Brah Yêhôva, Păng mra rklaih may.

²³ Bar ntil rplay njing jêng nau ƀơ̆ ƀơch đah Brah Yêhôva da dê, Jêh ri mâng njing mâu di mâu jêng ndơ ueh ôh.

²⁴ Lĕ rngôch nhuat hăn kon bunuyh bơh Brah Yêhôva yơh tâm nal, Mâm ƀư kon bunuyh dơi gĭt rbăng trong păng nơm?

²⁵ Ngơi ma nau ndal ir pô aơ: “Ndơ aơ jêng ndơ kloh!” Jêh ri lah hŏ ton jêh ri mơ mĭn rvê tay đŏng, Nây jêng du mlâm dăk sân njrăng ăn ma kon bunuyh.

²⁶ Hađăch blau mĭn ôp sek phung mhĭk, Jêh ri ăn jâng ndeh njot klơ khân păng.

²⁷ Huêng kon bunuyh jêng ŭnh kađen ma Brah Yêhôva, Treng uănh tât tâm lĕ ntŭk ndâp trôm nuih n'hâm bunuyh.

²⁸ Nau ueh jêh ri nau nanê̆ ngăn king hađăch; Hađăch sŏk nuih n'hâm ueh tâm kơl sưng hađăch bri dak păng.

²⁹ N'hâm suan jêng nau chrêk ma lơp phung bu klâu ndăm, Bi sŏk ndra jêng nau yơk ma bu ranh.

³⁰ Lĕ sôt nau rmanh jêh ri khap ƀư ăn kloh nau mhĭk; Bi mâng rpăt lăp tâm ntŭk jru ndâp trôm nuih n'hâm.