Nau Hôr 19 - Nau Brah Ndu Ngơi 2023

¹ Ueh lơn jêng bunuyh o ach gŭ ngao mơih rmên, Rlau lơn jêng bunuyh geh bâr mbung mƀruh, jêng bunuyh rluk.

² Nuih n'hâm pưt nau gĭt rbăng mâu lĕ dơi jêng du ntil nau ueh, Mbu nơm hăn ndal mra geh nau chêh prah.

³ Nau rluk ma du huê bunuyh ƀư rai lơi trong păng nơm, Jêh ri nuih n'hâm păng nduyh rlơ̆ Brah Yêhôva.

⁴ Nau ndrŏng tâm rnglăp âk mĭt jiăng, Bi ma nơm o ach nđâp lah geh đŏng mĭt jiăng bu lĕ du ngai jêh.

⁵ Nơm mbơh mƀruh mâu dơi klaih ôh đah nau tâm rmal, Ma nơm ngơi mƀruh nchơt mâu lĕ mra dơi klaih.

⁶ Geh âk nơm joi nau yô̆ ma bunuyh lŏng, Jêh ri lĕ rngôch bunuyh jêng mĭt jiăng da dê ma nơm vay nta ndơ.

⁷ Lĕ rngôch oh nâu ndŭl deh bunuyh o ach tâm rmot da dê ma păng, Lơ hâu phung mĭt jiăng păng mra du ngai bơh păng! Păng tĭng vơl dăn ma khân păng, Ƀiălah khân păng mâu hôm ôh ta nây!

⁸ Mbu nơm dơi geh nau blau mĭn, rŏng ma huêng păng nơm; Jêh ri mbu mât nau gĭt rbăng, dơi geh nau ueh lăng.

⁹ Nơm mbơh kue mâu mra klaih ôh bơh nau tâm rmal, Mbu nơm ngơi mƀruh mra rai yot.

¹⁰ Nau rêh geh jêng mâu khư ôh ndrel ma nơm rluk, N'hơn lah nuyh dĭk bu chiă uănh rlơ̆ phung kon ndrŏng!

¹¹ Nau blau mĭn bơh du huê bunuyh ƀư ăn păng băt ji nuih, Jêh ri yor nau khưm păng mâu ndăng ôh nau tih bu.

¹² Nau hađăch nuih nâm bu ngrông yau mŭr, Bi nau yô̆ hađăch nâm bu dak ngom klơ gơ̆ nđĭr.

¹³ Kon bu klâu rluk jêng nau mhĭk tât ma mbơ̆ păng, Du huê ur dăng tâm djrel nâm bu ngih truh dak mih hoch mâu bah.

¹⁴ Ngih vâl jêh ri drăp ndơ jêng drăp ndơn chô yau ơm prăp, Bi ma du huê ur blau mĭn yor tă bơh ntŭk Brah Yêhôva de ăn.

¹⁵ Nau ƀlao ƀư ăn khân păng lêt bê̆ch, Jêh ri nơm sa gŭ dơm mâu pah kan mra ji ngot ji hir.

¹⁶ Mbu nơm djôt prăp nau vay ntăm, mât mray huêng păng nơm, Ƀiălah mbu nơm mâu tông trong nau rêh păng mra khĭt.

¹⁷ Mbu nơm gĭt yô̆ ma phung o ach jêng ăn Brah Yêhôva manh, Păng mra mplơ̆ sĭt nau kan ueh nây ăn ma păng.

¹⁸ Nkra hom phung kon may dôl hôm e kâp gân, Ƀiălah lơi ta thăm nkhĭt păng.

¹⁹ Bunuyh gơnh ji nuih mra dơn nau tâm rmal; Yorlah tơlah may rklaih păng, ăt may mra rklaih păng du tơ̆ tay đŏng.

²⁰ Iăt hom nau bu ntĭm jêh ri sŏk dơn nau ntĭm nti, Gay nglĕ dŭt, may dơi geh nau blau mĭn.

²¹ Tâm nuih n'hâm bunuyh geh âk nau nchră, Ƀiălah nau ŭch bơh Brah Yêhôva mra dơi jêng.

²² Nau bu gay ŭch ma du huê bunuyh jêng nuih n'hâm răp jăp, Ueh lơn ƀư bunuyh o ach rlau lơn jêng nơm ngơi mƀruh.

²³ Nau klach yơk Brah Yêhôva njŭn tât nau rêh: Ƀư ăn khân păng dơi geh nau maak, Jêh ri nking lĕ rngôch nau mhĭk.

²⁴ Bunuyh ƀlao nto ti păng tâm ngan, Jêh nây mâu ŭch nsiăm ôh păng tâm trôm mbung păng nơm.

²⁵ Dong ăn nhăl hom bunuyh mưch ri mơ bunuyh rluk mra dơi jêng nau blau ngăn; Nduyh hom bunuyh gĭt vât, bunuyh nây mra ntop nau blau mĭn âk.

²⁶ Mbu nơm ƀư mhĭk ma mbơ̆ păng jêh ri mprơh mê̆ păng du Jêng du huê kon ƀư nau bêk prêng jêh ri suai rak.

²⁷ Hơi kon gâp, lah mâu iăt đŏng nau ntĭm nti, May mra vĭ hêng lĕ nau blau mĭn âk.

²⁸ Nơm mbơh tih mưch ma nau sŏng srăng, Jêh ri mbung nơm mhĭk rvăn nau tih.

²⁹ Nau tâm rmal hŏ prăp rơm jêh ma phung mưch, Mâng rvĕ rpăt ndrăp rơm ăn ma ndŭr kơi phung rluk.