Nau Hôr 1 - Nau Brah Ndu Ngơi 2023

Nau lor lơn: Nau ŭch jêh ri nau khlay

¹ Nau hôr Y-Salômôn, kon bu klâu Y-Đavit, hađăch phung Israel:

² Gay nti gĭt nau blau mĭn jêh ri nau ntĭm nti, Gay gĭt vât ma nau gĭt rbăng,

³ Gay sŏk dơn nau ntĭm nti rah vah, Gay gŭ rêh nau sŏng, nau di jêh ri nau n'hêl nanê̆;

⁴ Kơl an ma phung mleh plơ̆ jêng nau blau ngăn, Phung mom ntop nau gĭt rbăng jêh ri nau blau njrăng.

⁵ Phung blau mĭn mra gŭ iăt jêh ri ntop nau gĭt blau lơn, Phung gĭt rbăng mra dơi joi nau bu ntĭm,

⁶ Gay gĭt rbăng nau hôr, nau ntĭt, Nau ngơi bơh phung blau mĭn jêh ri nau nchroh ndâp tă khân păng.

⁷ Nau klach yơk ma Brah Yêhôva jêng tơm ma nau gĭt rbăng, Bi phung rluk tâm rmot ma nau blau mĭn jêh ri nau ntĭm nti.

⁸ Hơi kon gâp, iăt hom nau mbơ̆ ntĭm nti, Lơi ta dun ôh nau mê̆ may nti;

⁹ Yorlah lĕ nau nây mra jêng nâm bu du rvang kao ueh ta klơ bôk may, Nâm bu rse văn ueh ndơ nkrơ̆ ta trô ko may.

Nkah der phung djơh mhĭk

¹⁰ Hơi kon gâp, tơlah phung tih nsŭk ndơm may, Lơi ta may iăt.

¹¹ Tơlah khân păng lah: “Văch hom ndrel ma hên, gay kâp dâp ƀư nkhŭt mham păng, Rmoch gay ƀư rai bunuyh mâu geh nau tih;

¹² Phung he mra rvăn rêh khân păng nâm bu ƀon phung khĭt, Jêh ri rvăn glŏm nâm bu phung hăn trŭnh ma ntu môch;

¹³ Phung he mra dơi geh ăp ntil drăp khlay, Ngih he mra bêng ndơ pit in;

¹⁴ Phung he nchroh hom tâm pă ndrăng nơm, Lĕ rngôch phung he mra geh nsum du dŭng prăk.”

¹⁵ Hơi kon gâp, lơi ta tĭng ôh trong khân păng, Nkân hom jâng may klaih bơh trong khân păng,

¹⁶ Yorlah jâng khân păng ngăch nchuăt tât ma nau mhĭk, Ndil ndal ƀư nkhŭt mham bunuyh.

¹⁷ Nanê̆ jêng dơm dam dôl drăng nhuăl Tanăp măt phung sĭm;

¹⁸ Ƀiălah khân păng kâp dâp gay ƀư pling mham păng nơm, Rmoch ƀư rai nau rêh păng nơm.

¹⁹ Nây jêng nau ơm nal ma phung kơnh sa drăp ndơ mâu geh nau sŏng; Phung geh drăp ndơ nây mra ƀư roh nau rêh khân păng nơm.

Nau kuăl bơh nau blau mĭn

²⁰ Nau blau mĭn kuăl nter huy rŏ trong ƀon toyh, Nter huy ngăn ta ntŭk nkual nây;

²¹ Nau blau mĭn kuăl drơu drơu ta tơm trong; Ngơi ta ntŭk trong lăp mpông ƀon pô aơ:

²² “Hơi phung rluk, khân may rŏng nau rluk kŏ tât ndah dŭt jŏ? Phung mưch mra rŏng ma nau tâm mưch Jêh ri phung rluk mra tâm rmot ma nau blau mĭn kŏ tât ndah nâm jŏ?

²³ Plơ̆ sĭt hom iăt nau gâp nkra ntĭm, Aơ, gâp mra nkhŭt brah huêng gâp ma khân may; Ƀư ăn ma khân may gĭt rbăng nau gâp nti.

²⁴ Yorlah gâp kuăl ƀiălah khân may mâu ŭch iăt ôh, Gâp yơr ti kŏ mâu geh đŏng bunuyh mĭn rvê ma nau nây;

²⁵ Ƀiălah khân may dun lơi lĕ rngôch nau gâp ntĭm nti, Mâu ŭch sŏk dơn ôh nau gâp nduyh;

²⁶ Yor ri gâp mra gơm nôk khân may mâp nau mhĭk, Jêh ri gâp mra mưch dôl khân may krit klach;

²⁷ Lah nau krit klach toyh tât ndal nâm bu phŭt chuănh, Nau mhĭk tât nâm bu phŭt sial ktang, Jêh ri nau o ach, nau uh ah tât ma khân may.

²⁸ Rnôk nây khân păng mra kuăl gâp, ƀiălah gâp mâu plơ̆ lah ôh; Ơm ôi khân păng mra joi gâp, ƀiălah mâu ôh dơi mâp gâp.

²⁹ Yorlah khân păng tâm rmot jêh ma nau blau mĭn, Mâu săch ôh nau klach yơk ma Brah Yêhôva,

³⁰ Mâu lĕ ŭch tĭng nau gâp ntĭm nti, Jêh ri mưch rmot lĕ nau gâp nduyh;

³¹ Yor nây, khân păng dơn play nau mhĭk tĭng nâm kan khân păng ƀư, Jêh ri dơn sŏk lĕ nau păng mĭn kan,

³² Yor ma nau tâm rdâng bơh phung rluk mra nkhĭt khân păng, Jêh ri nau ueh mpăn bơh phung rluk mra ƀư rai khân păng.

³³ Ƀiălah mbu nơm iăt gâp mra hôm rêh ueh mpăn, Mra dơi geh nau đăp mpăn, mâu klach nau mhĭk ôh.”