Mathay 9 - Nau Brah Ndu Ngơi 2023

Brah Yêsu ƀư bah du huê bunuyh rvĕn

¹ Brah Yêsu ncho plŭng, rgăn dak mƀŭt gay plơ̆ sĭt ta ƀon Păng nơm.

² Bu tung njŭn ma Păng du huê bunuyh rvĕn gŭ ta sưng bê̆ch. Brah Yêsu saơ nau rnơm phung nây jêh ri lah ma bunuyh rvĕn: “Hơi kon, nâp hom nuih n'hâm, nau tih may yô̆ an jêh.”

³ Dôl nây, geh bar pe kôranh nchih samƀŭt mĭn tâm nuih n'hâm khân păng: “Bunuyh aơ ngơi sưr rlau.”

⁴ Brah Yêsu hŏ gĭt jêh nau mĭn khân păng, Păng lah: “Mâm ƀư khân may geh nau mĭn mhĭk tâm nuih n'hâm kơt nây?

⁵ Tâm bar nau ngơi: ‘Nau tih may yô̆ an jêh,’ mâu lah ‘Dâk hom may jêh ri hăn,’ moh nau dơh lơn?

⁶ Ƀiălah, gay khân may gĭt pô aơ Kon Bunuyh gŭ ta neh ntu geh nau dơi yô̆ an nau tih” — Jêh nây Brah Yêsu lah tay ma bunuyh rvĕn — “Dâk hom, mbăk sưng bê̆ch jêh ri plơ̆ sĭt ta ngih.”

⁷ Bunuyh rvĕn dâk jêh ri hăn sĭt ma ngih.

⁸ Phung ƀon lan saơ nau khlay nây klach da dê, jêh ri tâm rnê Brah Ndu, Nơm hŏ ăn nau dơi kơt nây ma bunuyh.

Brah Yêsu kuăl Y-Mathiơ. – Nau ât sông sa

⁹ Du tă bơh nây, Brah Yêsu saơ du huê bunuyh amoh Y-Mathiơ gŭ ta jrô riu pi; Brah Yêsu lah ma păng: “Tĭng hom Gâp.” Y-Mathiơ dâk, hăn tĭng Păng.

¹⁰ Dôl Brah Yêsu gŭ sông sa tâm ngih Y-Mathiơ, geh âk phung riu pi jêh ri phung geh nau tih hăn gŭ sông sa ndrel ma Brah Yêsu jêh ri phung oh mon Păng.

¹¹ Saơ pônây, phung Pharisi lah ma phung oh mon Brah Yêsu: “Mâm ƀư Kôranh khân may sông sa ndrel ma phung riu pi jêh ri phung tih?”

¹² Nôk tăng nau nây, Brah Yêsu lah: “Bunuyh ueh săk jăn mâu ŭch ôh ma nai dak si, ƀiălah phung ji kuet ŭch dơm.

¹³ Hăn hom, jêh ri nti ăn gĭt nâm bu ntĭt trong aơ: ‘Gâp ŭch nau nuih n'hâm yô̆ nđach, mâu di ndơ ƀư brah ôh.’ Yorlah gâp văch mâu di kuăl bunuyh sŏng srăng ôh, ƀiălah kuăl bunuyh geh nau tih.”

¹⁴ Dôl nây phung oh mon Y-Yôhan văch, ôp Brah Yêsu: “Mâm ƀư hên jêh ri phung Pharisi vay ât sông sa, hôm phung oh mon May mâu ât sông sa ôh?”

¹⁵ Brah Yêsu plơ̆ lah: “Mâm ƀư phung bu jă râng nau nhêt sông tâm nkol ur sai ƀiălah rngot muh măt tâm nôk bu klâu ntơm gŭ ur gŭ ndrel đah khân păng? Ƀiălah tât ta nar bu kuăl bu klâu nây du tă bơh khân păng, nôk nây khân păng mra ât sông sa.

¹⁶ Mâu mâp ôh geh bunuyh jĭm du blah bok mhe lăp ta ao ơm, yorlah blah bok mhe mra ƀư sat ao ơm jêh ri ntŭk sat mra hêk huy lơn.

¹⁷ Mâu lĕ bu troch ndrănh mhe tâm nông ntâu ơm; tơlah ƀư kơt nây, nông mra đang, ndrănh hoch luh, jêh ri nông mra rai. Ƀiălah bu troch ndrănh mhe tâm lăp tâm nông ntâu mhe gay lĕ bar dơi prăp ăn ueh.”

Kon bu ur Y-Jairus jêh ri bu ur ji rih

¹⁸ Dôl Brah Yêsu gŭ ngơi lĕ nau nây, geh du huê kôranh mât uănh ngih rƀŭn văch, chon mon gay vơl dăn: “Kon bu ur gâp mhe khĭt! Dăn Kôranh văch pah ti ta păng ăn păng dơi rêh tay.”

¹⁹ Brah Yêsu dâk, ndrel ma phung oh mon hăn tĭng kôranh mât uănh.

²⁰ Nôk nây, geh du huê bu ur ji rih jât ma bar năm jêh, hăn văch pakơi Păng jêh ri pah ta chiăng ao Păng.

²¹ Yorlah păng mĭn tâm nuih n'hâm pô aơ: “Tơlah knŏng pah ta ao Păng dơm, gâp mra bah ro.”

²² Brah Yêsu n'gĭl uănh, saơ păng jêh ri lah: “Hơi kon, maak hom! Nau chroh ay yơh hŏ rklaih ay jêh.” Mông nây, bu ur nây dơi bah nau ji.

²³ Tơlah Brah Yêsu tât ta ngih kôranh mât uănh ngih rƀŭn, Păng saơ phung uh n'hôm jêh ri phung âk ƀư uh ah,

²⁴ Păng lah: “Rŭch plơ̆ luh hom! Bu ur jê̆ aơ mâu khĭt ôh, ƀiălah păng dôl bê̆ch.” Khân păng mưch gơm ma Păng.

²⁵ Nôk phung âk luh padih jêh, Brah Yêsu hăn lăp, kuăn ti bu ur jê̆ nây jêh ri păng dâk ro.

²⁶ Nau mhe mhan aơ lư lam n'gor nây.

Brah Yêsu ƀư bah âk ntil êng êng

²⁷ Dôl Brah Yêsu du tă bơh ntŭk nây, geh bar hê bunuyh chieh măt tĭng groi Păng, jêh ri nter pô aơ: “Hơi kon Đavit, yô̆ nđach hên!”

²⁸ Pakơi nôk lăp tâm ngih, bar hê bunuyh chieh măt văch dăch Păng. Brah Yêsu lah ma khân păng pô aơ: “Khân may rnơm lĕ Gâp dơi ƀư nau khân may ŭch?” Khân păng lah: “Hơi Kôranh, hên chroh ngăn.”

²⁹ Brah Yêsu pah măt khân păng jêh ri lah: “Ăn nau aơ tât ngăn tĭng nâm nau khân may chroh.”

³⁰ Măt khân păng dơi ang ro. Brah Yêsu buay dăng ngăn ma khân păng: “Njrăng hom, lơi ăn bunuyh êng gĭt ôh nau aơ.”

³¹ Ƀiălah khân păng hăn luh jêh ri mbơh nau lư n'găr Păng lam bri nây.

³² Dôl khân păng luh ntŭk nây, bu njŭn ma Brah Yêsu du huê bunuyh mlo brah mhĭk lơh.

³³ Brah mhĭk hŏ luh jêh ri bunuyh mlo nây blau ngơi. Phung ƀon lan hih rhâl hâu ngăn, lah pô aơ: “Ê hŏ mâp saơ ôh nau kơt nây tâm bri Israel.”

³⁴ Ƀiălah, phung Pharisi lah tay: “Păng mprơh brah mhĭk tâm amoh kôranh brah mhĭk.”

³⁵ Brah Yêsu hăn lam tâm ăp ƀon toyh, ƀon jê̆, nti tâm lĕ ngih rƀŭn, mbơh nkoch Nau Mhe Mhan Ueh ma ƀon bri hađăch klơ trôk jêh ri ƀư bah ăp ntil nau ji.

³⁶ Tơlah saơ phung âk râk, Păng geh nau yô̆ nđach yorlah khân păng rêh ni jêh ri nchah rai nhhơt nâm bu phung biăp mâu geh bunuyh rmăk.

³⁷ Păng lah ma phung oh mon pô aơ: “Yan rek geh âk ba ƀiălah bunuyh rek geh djê̆.

³⁸ Pôri yơh, dăn hom ma Kôranh Brah yan rek njuăl phung rek lăp yan rek Păng.”