Mathay 6 - Nau Brah Ndu Ngơi 2023

Nau ăn ndơ yô̆, mbơh sơm jêh ri ât sông sa

¹ “Njrăng hom, lơi ntưih ôh nau ăn ndơ yô̆ tra năp lĕ rngôch bunuyh. Tơlah khân may ƀư pôri, khân may mâu geh ôh nau nkhôm tă bơh Mbơ̆ khân may gŭ ta klơ trôk.

² Pôri, tơlah may ƀư kan nau ăn ndơ yô̆, lơi uh nŭng tra năp may ôh nâm bu phung bunuyh nuih n'hâm nklă ƀư tâm ngih rƀŭn jêh ri rŏ trong sâng gay ma bu rnê. Nanê̆, Gâp lah ma khân may, phung nây hŏ dơn jêh nau nkhôm ma khân păng.

³ Ƀiălah tơlah may ƀư kan nau ăn ndơ yô̆, lơi ăn ti chiau gĭt moh nau ti ma ƀư

⁴ gay nau ăn ndơ yô̆ jêng ndâp; jêh ri Mbơ̆ may, Nơm saơ tâm ntŭk ndâp, mra ăn nau nkhôm ma may.

⁵ Tơlah khân may mbơh sơm, lơi jêng ôh nâm bu phung bunuyh nuih n'hâm nklă; yorlah khân păng ŭch dâk mbơh sơm tâm ngih rƀŭn jêh ri ta meng trong gay ma bu saơ. Nanê̆, Gâp lah ma khân may, phung nây khân păng hŏ dơn jêh nau nkhôm ma khân păng.

⁶ Ƀiălah tơlah may mbơh sơm, lăp hom tâm jrô may, nchăng hom mpông, jêh nây mbơh sơm ma Mbơ̆ may, Nơm gŭ tâm ntŭk ndâp; jêh ri Mbơ̆ may, Nơm saơ tâm ntŭk ndâp, mra ăn nau nkhôm ma may.

⁷ Tơlah khân may mbơh sơm, lơi răk rlŏk ƀaƀơ ôh du ntil nau nây nâm bu phung padih; yorlah khân păng mĭn tơlah ngơi âk ri mơ Brah Ndu mra dơn.

⁸ Lơi kơt ôh nâm bu khân păng, yorlah Mbơ̆ khân may gĭt jêh moh nau khân may ŭch êlor ma khân may dăn ndơ nây ma Păng.

⁹ Pôri, ăn khân may mbơh sơm pô aơ: ‘Ơ Mbơ̆ hên gŭ tâm trôk ơi; Ăn amoh May bu yơk ma nau kloh ueh.

¹⁰ Ăn ƀon bri hađăch Mbơ̆ gơnh tât, Ăn nau May ŭch mra jêng, ta neh ntu tâm ban ma ta klơ trôk!

¹¹ Ăn ma hên ndơ sông sa nar aơ ăn tŏng;

¹² Yô̆ an ma nau tih hên, Tâm ban ma hên yô̆ an jêh ma bunuyh ƀư tih đah hên;

¹³ Lơi ta njŭn leo hên tâm nau ndơm ôh, Ƀiălah ăn May rklaih hên bơh nơm tih mhĭk! [Yor ma ƀon bri hađăch, nau brah, nau chrêk rmah jêng ndơ mbơ̆ n'ho ro. Amen.]’

¹⁴ Tơlah khân may yô̆ an nau tih ma bu, Mbơ̆ khân may klơ trôk mra yô̆ an khân may tâm ban đŏng.

¹⁵ Ƀiălah tơlah khân may mâu yô̆ an nau tih ma bu, Mbơ̆ khân may mâu mra yô̆ an đŏng nau tih khân may.

¹⁶ Tơlah khân may ât sông sa, lơi ƀư ôh muh măt rngot nâm bu phung bunuyh geh nuih n'hâm nklă, yorlah khân păng jan ƀư muh măt rngot gay lĕ rngôch bunuyh gĭt ma khân păng ât sông sa. Nanê̆, Gâp lah ma khân may, phung nây hŏ dơn jêh nau nkhôm ma khân păng.

¹⁷ Ƀiălah tơlah may ât sông sa, mhĭng dak ƀâu kah ta klơ bôk, jêh ri pach muh măt,

¹⁸ gay ma bunuyh mâu gĭt ôh may dôl ât sông sa, ƀiălah knŏng Mbơ̆ may, jêng Nơm gŭ tâm ntŭk ndâp dơm gĭt, jêh ri Mbơ̆ may, Nơm saơ tâm ntŭk ndâp mra ăn nau nkhôm ma may.”

Jay ndơ khlay ngăn

¹⁹ “Lơi khân may bun prăp drăp ndơ ta neh ntu aơ, ntŭk geh nchiăr mbon, geh ek găm ƀư rai, jêh ri geh bunuyh ntŭng kuyh ntơng mpông, lôk mpir lăp ntŭng.

²⁰ Ƀiălah ăn bun prăp drăp ndơ ta klơ trôk, jêng ntŭk mâu geh ôh nchiăr mbon, ek găm ƀư rai, mâu lĕ geh bunuyh ntŭng kuyh ntơng mpông, lôk mpir lăp ntŭng.

²¹ Yorlah ta ntŭk drăp ndơ khân may gŭ, nuih n'hâm khân may gŭ ta nây lĕ.”

Nau ang tâm săk jăn

²² “Măt jêng kađen ma săk jăn. Tơlah măt may ueh lĕ săk jăn may mra bêng nau ang,

²³ ƀiălah tơlah măt may chieh, lĕ săk jăn may mra jêng nau ngo. Pôri, tơlah nau ang tâm may knŏng jêng nau ngo ri mơ nau ngo nây mra toyh ngăn yơh!”

Nau rngot rvê

²⁴ “Mâu geh mbu nơm dơi pah kan ma bar hê kôranh; yorlah mra tâm rmot ma kôranh aơ jêh ri rŏng ma kôranh ri, mâu lah yơk ma kôranh aơ jêh ri mưch ma kôranh êng. Khân may mâu dơi ôh pah kan ƀă ma Brah Ndu jêh ri pah kan ƀă ma prăk ndô ndơ ôh.

²⁵ Yor ri, Gâp lah ma khân may: Lơi yor ma nau rêh rvê ir moh ndơ mra sông sa, mâu lah nhêt; lơi yor ma săk jăn rvê ir moh ndơ khân may mra nsoh n'gut. Di lĕ nau rêh khlay lơn ma ndơ sông sa, săk jăn khlay lơn ma bok ao?

²⁶ Uănh hom ma phung sĭm tâm trôk: mâu mâp tăm, mâu lĕ mâp rek, mâu lĕ bun prăp tâm jay, ƀiălah Mbơ̆ khân may ta klơ trôk siăm khân păng. Di lĕ khân may khlay lơn ma phung sĭm?

²⁷ Rlau lơn ma nĕ, mbu nơm tâm phung khân may yor rvê ƀư ma nau rêh păng nơm jong ntop du ƀât lât mâu lah mâu?

²⁸ Bi ma bok ao, mâm ƀư khân may rvê ir? Uănh hom ma kao si ueh tâm mir mâm khân păng chăt hon; khân păng mâu rgănh pah kan, mâu lĕ rui brai;

²⁹ ƀiălah Gâp lah ma khân may, nđâp tơlah hađăch Salômôn lĕ nau chrêk rmah, mâu dơi đŏng nsoh ueh tâm ban nguay ma phung kao si ueh aơ.

³⁰ Pôri, hơi phung bunuyh geh djê̆ nau chroh, tơlah kao gơ̆ tâm mir, nar aơ hôm rêh, ôi taơ bu mra mƀăr păng tâm ŭnh năk, ƀiălah Brah Ndu hôm ăn păng nsoh ueh kơt nĕ, rlau lơn ma khân may?

³¹ Yor ri, lơi khân may rvê ir ôh jêh ri ôp êng: ‘Moh ndơ hên mra sông sa?’ ‘Moh ndơ nhêt?’ ‘Moh ndơ nsoh?’

³² Yorlah lĕ rngôch ndơ nây phung bu năch tĭng joi đŏng, jêh ri Mbơ̆ khân may klơ trôk gĭt jêh moh ndơ khân may ŭch.

³³ Ƀiălah lor lơn, ăn khân may joi ƀon bri hađăch Brah Ndu jêh ri nau sŏng srăng Păng, ri mơ Păng mra ăn ntop lĕ rngôch ndơ nây ma khân may đŏng.

³⁴ Pôri, lơi rvê ôh ma nar ôi taơ, yorlah nar ôi taơ mra rvê nar ôi taơ. Ăp nar mra geh nau jêr tâm ăp nar.”