Mathay 4 - Nau Brah Ndu Ngơi 2023

Brah mhĭk mplư ndơm

¹ Jêh nây, Brah Huêng Ueh njŭn leo Brah Yêsu tâm bri rdah gay ăn brah mhĭk ndơm Păng.

² Jêh ât sông sa puăn jât nar jêh ri puăn jât măng, Păng ji ngot.

³ Nơm ndơm hăn dăch, lah ma Păng: “Tơlah may jêng Kon Brah Ndu, đă hom lŭ aơ plăch jêng piăng let.”

⁴ Brah Yêsu plơ̆ lah: “Geh nau nchih pô aơ: ‘Bunuyh gŭ rêh mâu di ôh knŏng bơh piăng let dơm, ƀiălah ăt geh đŏng bơh lĕ nau ngơi luh bơh bâr mbung Brah Ndu.’ ”

⁵ Brah mhĭk njŭn leo Păng tât ta ƀon kloh ueh, n'gân Păng ta klơ chor ngih brah,

⁶ jêh ri lah: “Tơlah may jêng Kon Brah Ndu, ntŭp hom may nơm hăn trŭnh, yorlah geh nau nchih: ‘Kôranh Brah mra ntăm ma phung tông mpăr, Phung nây mra kơl rđâng may tâm ti, Klach lah jâng may chêh ta lŭ.’ ”

⁷ Brah Yêsu lah: “Geh đŏng nau nchih: ‘May lơi rlong uănh Kôranh Brah, jêng Brah Ndu may ôh.’ ”

⁸ Brah mhĭk djôt leo Păng ta klơ n'glơn yôk prêh, nchŏng ma Păng saơ lĕ rngôch ƀon bri hađăch ta neh ntu ndrel ma nau chrêk rmah khân păng,

⁹ jêh ri păng lah: “Tơlah may chon mon yơk mbah ma gâp, gâp mra ăn ma may lĕ rngôch ndơ aơ.”

¹⁰ Brah Yêsu lah ma păng: “Hơi Satan, rŭch plơ̆ hom! Yorlah geh nau nchih jêh pô aơ: ‘Ăn may yơk mbah ma Kôranh Brah jêng Brah Ndu may, jêh ri knŏng pah kan knŏng du huê Păng dơm yơh.’ ”

¹¹ Brah mhĭk du bơh Păng, jêh ri ri, geh phung tông mpăr hăn tât gay pah kan Păng.

Nau pah kan Kôranh Brah Yêsu tâm n'gor Galilê ( 4:12 – 18:35 ) Phung oh mon lor lơn

¹² Tơlah Brah Yêsu gĭt jêh bu krŭng Y-Yôhan, Păng plơ̆ sĭt ta n'gor Galilê.

¹³ Păng lơi ƀon Nasaret, hăn gŭ ta ƀon Kapernum êp dak mƀŭt, ta nkual neh Sabulôn jêh ri Naptali,

¹⁴ gay n'hêl nanê̆ jêh lĕ nau kôranh nơm mbơh lor Y-Êsai hŏ lah:

¹⁵ “Bri Sabulôn jêh ri Naptali, Trong hăn ta dak mƀŭt, mpeh kăl tê̆ dak krong Yurdan, N'gor Galilê ma phung bu năch.

¹⁶ Phung bunuyh ƀon lan nây gŭ tâm nau ngo. Hŏ saơ jêh nau ang toyh; Jêh ri phung bunuyh gŭ tâm ntŭk gui nau khĭt nkŭm, Hŏ saơ nau ang nchrat.”

¹⁷ Ntơm nôk nây, Brah Yêsu ntơm mbơh nkoch pô aơ: “Rmal hom nau tih khân ay may, yorlah ƀon bri hađăch klơ trôk dăch tât jêh.”

¹⁸ Dôl Brah Yêsu hăn njŏ tĭng kơh dak mƀŭt Galilê, Păng saơ bar hê nâu oh ri jêng Y-Simôn, kuăl đŏng jêng Y-Pêtrôs, jêh ri oh păng jêng Y-Andrê dôl seng jal tâm dak mƀŭt, yorlah khân păng jêng bunuyh vay seng jal.

¹⁹ Brah Yêsu lah khân păng: “Tĭng hom Gâp, Gâp mra ƀư ăn khân may plơ̆ jêng nơm seng jal bunuyh.”

²⁰ Khân păng chalơi jal gơnh ro, hăn tĭng Păng.

²¹ Mra hăn đŏng, Păng saơ bar hê nâu oh êng jêng Y-Yakơ, kon Y-Sêƀêđê, jêh ri oh păng jêng Y-Yôhan dôl gŭ jĭm jal tâm plŭng ndrel ma mbơ̆ khân păng. Brah Yêsu kuăl khân păng.

²² Khân păng mƀăr lơi plŭng jêh ri ma mbơ̆ khân păng gay hăn tĭng Brah Yêsu ro.

²³ Brah Yêsu hăn lam n'gor Galilê, nti tâm ngih rƀŭn, mbơh nkoch Nau Mhe Mhan Ueh ma ƀon bri hađăch klơ trôk, jêh ri Păng ƀư bah ăp ntil nau ji kuet tâm phung ƀon lan.

²⁴ Lư n'găr ma Păng lam n'gor Siri. Bu njŭn leo ma Păng lĕ phung bunuyh ji kuet, geh nau ji kuet êng êng, bunuyh brah mhĭk lơh, phung brŭt rluk, phung rvĕn, jêh ri Păng ƀư bah lĕ rngôch.

²⁵ Geh âk bunuyh hăn tĭng Păng tă bơh n'gor Galilê, ƀon Đêkapôlis, ƀon Yêrusalem, n'gor Yuđa jêh ri tă bơh bri kăl tê̆ dak krong Yurdan hăn tĭng Păng.