Mathay 21 - Nau Brah Ndu Ngơi 2023

Brah Yêsu lăp ta ƀon Yêrusalem

¹ Tơlah Brah Yêsu jêh ri phung oh mon dăch tât ta ƀon Yêrusalem, nôk hăn lăp ta Bêtphajê, êp yôk Ôlive, Păng njuăl bar hê oh mon hăn,

² jêh ri ntĭnh ntăm pô aơ: “Hăn lăp hom ta ƀon jê̆ tanăp, khân may mra saơ ro du mlâm seh bri me bu kât, êp ta meng geh du kon seh bri. Doh hom rse seh bri nây jêh ri têk njŭn lĕ bar ma Gâp.

³ Tơlah bu lah moh nau, ăn khân may plơ̆ lah pô aơ: ‘Kôranh Brah ŭch dŏng bar mlâm seh bri aơ’, bu mra ăn khân may têk seh bri ro.”

⁴ Nau nây tât geh di ngăn nau nơm mbơh lor ngơi jêh pô aơ:

⁵ “Lah hom ma kon bu ur ƀon Siôn pô aơ: Aơ, hađăch may văch ma may, Rdơ̆ rbăn, ncho seh bri, Jêh ri gŭ klơ kon seh bri jêng kon seh bri me.”

⁶ Phung oh mon hăn jêh ri ƀư di nâm nau Brah Yêsu ntăm jêh.

⁷ Khân păng têk seh bri me jêh ri kon seh bri, lăk ao khân păng ta klơ ndŭr seh bri nây, jêh nây ăn Brah Yêsu ncho.

⁸ Âk râk ngăn bunuyh tâm phung ƀon lan lăk ao khân păng nơm ta trong, ƀaƀă sreh n'gĭng si jêh ri sui rŏ trong.

⁹ Phung bunuyh, nơm hăn panăp, bunuyh hăn tĭng pakơi troh huy ktang da dê: “Hôsana ma Kon Y-Đavit! Tâm rnê ma Nơm văch tâm amoh Kôranh Brah! Hôsana ta ntŭk dŭt prêh!”

¹⁰ Tơlah Păng lăp jêh tâm ƀon Yêrusalem, lĕ rngôch bunuyh tâm ƀon ndrŏt nuih n'hâm, lah pô aơ: “Mbu nơm aơ?”

¹¹ Phung bunuyh plơ̆ lah: “Nây jêng Nơm mbơh lor Yêsu gŭ ta ƀon Nasaret, tâm n'gor Galilê.”

Nau Brah Yêsu ƀư kloh ngih brah

¹² Brah Yêsu lăp tâm ngih brah Brah Ndu. Păng mprơh lĕ rngôch bunuyh tăch, bunuyh rvăt ndơ tâm ngih brah, nklơ̆ sưng phung tâm rgâl prăk jêh ri nklơ̆ rnơl phung tăch plŭk.

¹³ Păng lah ma khân păng: “Geh nau nchih jêh: ‘Ngih Gâp mra kuăl jêng ngih mbơh sơm’, Ƀiălah khân may plăch ntŭk nây jêng trôm nau tâm ntŭng.”

¹⁴ Phung bunuyh chieh măt jêh ri rvĕn văch ta Păng tâm ngih brah, Păng ƀư bah da dê.

¹⁵ Ƀiălah phung kôranh ƀư brah toyh jêh ri phung kôranh nchih samƀŭt saơ lĕ nau mbên khlay Păng ƀư, jêh ri tăng phung kon se nter ktang tâm ngih brah: “Hôsana ma Kon Y-Đavit,” khân păng ji nuih ngăn

¹⁶ jêh ri lah ma Brah Yêsu pô aơ: “May tăng lĕ nau phung kon se aơ lah?” Brah Yêsu plơ̆ lah: “Ơ, khân may mâu mâp uănh hĕ nau nchih jêh pô aơ: May geh jêh nau tâm rnê tă bơh trôm mbung kon se jê̆ jêh ri kon se dôl pu?”

¹⁷ Jêh ri păng chalơi phung nây, luh du hăn ta ƀon Bêthani rlu ta nây.

Tơm rvi dơn nau rak rtăp

¹⁸ Tât ơm ôi taơ, dôl Păng plơ̆ ta ƀon toyh, Păng ji ngot.

¹⁹ Saơ du tơm rvi ta trong, Păng hăn dăch tơm nây, ƀiălah mâu saơ play knŏng n'ha dơm. Păng lah ma tơm play nây: “May mâu mra hôm play đŏng ôh!” Tơm rvi kro ro.

²⁰ Saơ kơt nây, Phung oh mon hih rhâl, lah pô aơ: “Mâm ƀư tơm rvi aơ kro ro kơt nây?”

²¹ Brah Yêsu plơ̆ lah: “Nanê̆, Gâp mbơh ma khân may, tơlah khân may geh nau chroh jêh ri mâu đing ôh, ri mơ mâu knŏng khân may dơi ƀư nau Gâp hŏ ƀư jêh ma tơm rvi ôh, ƀiălah nđâp ma khân may dơi lah ma yôk aơ: ‘Pư hom bơh ntŭk aơ jêh ri nsăt tâm dak mƀŭt’ nau nây mra tât geh ro.

²² Tâm dôl mbơh sơm, lĕ rngôch nau khân may dăn ma nau chroh mra sŏk dơn lĕ.”

Nau ôp ma nau dơi Brah Yêsu

²³ Brah Yêsu lăp tâm ngih brah; dôl Păng nti lah, phung kôranh ƀư brah toyh jêh ri phung kôranh bu ranh tâm phung ƀon lan văch gay ôp: “Moh nau dơi May ƀư lĕ nau nây, jêh ri mbu nơm ăn ma May nau dơi nây?”

²⁴ Brah Yêsu plơ̆ lah: “Gâp ŭch ôp ma khân may du trong, tơlah khân may dơi plơ̆ lah, Gâp mra lah ma khân may gĭt tă bơh nau dơi Gâp ƀư nau aơ.

²⁵ Mbah tă luh nau ƀaptem Y-Yôhan? Tă bơh trôk mâu lah tă bơh kon bunuyh?” Khân păng tâm nchră ndrăng khân păng: “Tơlah he lah: ‘Tă bơh trôk’ păng mra lah đah he: ‘Pôri, mâm ƀư khân may mâu chroh Y-Yôhan?’

²⁶ Bi tơlah he lah: ‘Tă bơh kon bunuyh’ he klach ma phung ƀon lan, yorlah lĕ rngôch bunuyh uănh ma Y-Yôhan jêng du huê nơm mbơh lor.”

²⁷ Yor ri, khân păng plơ̆ lah ma Brah Yêsu: “Hên mâu gĭt ôh.” Păng lah ma khân păng: “Gâp mâu mra lah đŏng ma khân may moh tă bơh nau dơi Gâp dơi ƀư lĕ nau aơ.”

Nau hôr ma bar hê kon bu klâu

²⁸ “Mâm khân may mĭn? Du huê bunuyh geh bar huê kon bu klâu; păng lah ma du huê kon tal nguay: ‘Ơ nâu, nar aơ may hăn pah kan tâm đang krăk ƀâu.’

²⁹ Păng plơ̆ lah: ‘Gâp mâu hăn ôh,’ ƀiălah pakơi păng rmal nau tih, jêh nây hăn.

³⁰ Mbơ̆ hăn lah ma du huê kon rơh bar jêh ri lah tâm ban lĕ. Nơm aơ ơh: ‘Ơ, gâp hăn,’ ƀiălah păng mâu hăn ôh.

³¹ Tâm phung bar hê aơ, mbu nơm ƀư tĭng nâm nau mbơ̆ păng ŭch?” Khân păng plơ̆ lah: “Nơm tal nguay.” Brah Yêsu lah ma khân păng pô aơ: “Nanê̆, Gâp lah ma khân may, phung riu pi jêh ri bu ur ka n'hong mra dơi lăp tâm ƀon bri hađăch Brah Ndu lor lơn ma khân may.

³² Yorlah Y-Yôhan văch gay ntĭm ma khân may tâm trong nau sŏng srăng, ƀiălah khân may mâu chroh ôh; bi phung riu pi jêh ri bu ur văng tĭr chroh jêh ma păng, nđâp dôl khân may saơ kơt nây, khân may ăt mâu rmal nau tih jêh ri chroh ma păng ôh.”

Nau hôr ma phung mât mir play krăk ƀâu

³³ “Iăt hom nau hôr êng. Geh du huê bunuyh tăm du đang krăk ƀâu, ƀư n'gar jŭm mir, tâm trôm păng kuyh du ntu mpet ndrănh, ƀư du ngih tŭm gak, jêh ri ăn lĕ bunuyh tăm krăk ƀâu nkhôm, jêh nây păng hăn du bri êng.

³⁴ Tât yan pĕ play krăk ƀâu, kôranh njuăl phung oh mon văch ta lĕ bunuyh tăm krăk ƀâu gay sŏk kao play.

³⁵ Ƀiălah khân păng nhŭp phung oh mon, lơh bunuyh aơ, nkhĭt bunuyh ri, jêh ri klŭp lŭ ma bunuyh tê̆.

³⁶ Kôranh njuăl tay phung oh mon êng, âk lơn lor, ƀiălah khân păng ƀư tâm ban lĕ ma khân păng.

³⁷ Nglĕ dŭt, kôranh njuăl kon păng nơm văch ta phung nây, yor păng mĭn pô aơ: ‘Khân păng mra yơk ma kon gâp.’

³⁸ Ƀiălah tơlah phung tăm krăk ƀâu saơ kon bu klâu păng, phung nây tâm nchră ndrăng khân păng nơm: ‘Aơ jêng nơm ndơn drăp. Kay lŏng, nkhĭt lơi hom păng jêh ri sŏk drăp ndơ păng.’

³⁹ Khân păng nhŭp kon nây, klŭp lơi luh padih đang krăk ƀâu jêh ri nkhĭt lơi.

⁴⁰ Pôri, tơlah kôranh đang krăk ƀâu tât, mâm păng mra ƀư ma phung tăm krăk ƀâu nây?”

⁴¹ Khân păng plơ̆ lah: “Păng mra nkhĭt khĭt phung djơh mhĭk nây ma nau rêh ni ji klâng, jêh ri păng ăn ma phung tăm krăk ƀâu êng nkhôm, jêng phung mra chê̆ kao play ma păng di yan pĕ play.”

⁴² Brah Yêsu lah ma khân păng: “Khân may ê hŏ mâp geh rŏ nau aơ tâm Nau Brah Ndu Ngơi: ‘Glo lŭ phung ƀư ngih mƀăr lơi jêh Hŏ jêng lŭ njônh ngih; Aơ jêng kan Kôranh Brah ƀư, Jêh ri nây jêng nau khlay ngăn tanăp măt he’?

⁴³ Yor ri, Gâp lah ma khân may, ƀon bri hađăch Brah Ndu mra sŏk lơi tă bơh khân may jêh ri ăn ma ndŭl mpôl êng mra djôt kao play ma ƀon bri hađăch nây.

⁴⁴ Mbu nơm prah jŭr ta klơ lŭ nây mra nchah rai, ƀiălah lŭ aơ tŭp di tâm mbu nơm mra rchiăt hăch bunuyh nây.”

⁴⁵ Phung kan kôranh ƀư brah toyh jêh ri phung Pharisi tăng lĕ nau hôr nây, khân păng gĭt năl Păng dôl ngơi di ma khân păng nơm.

⁴⁶ Khân păng joi nau ŭch nhŭp Păng, ƀiălah khân păng klach ma phung ƀon lan, yorlah lĕ rngôch bunuyh uănh dơn ma Brah Yêsu jêng du huê Nơm mbơh lor.