Mathay 16 - Nau Brah Ndu Ngơi 2023

Dăn nau mbên khlay tă bơh trôk

¹ Phung Pharisi jêh ri phung Sađusê văch ta Brah Yêsu, jêh ri rlong uănh Păng ma nau dăn Brah Yêsu ăn ma khân păng uănh du ntil nau mbên khlay tă bơh trôk.

² Ƀiălah Brah Yêsu plơ̆ lah: “Lah kêng măng, khân may lah: ‘Nar ôi taơ mra prăng, yorlah trôk chăng.’

³ Bi tâm ơm ôi, khân may lah: ‘Nar aơ mra geh mih sial, yorlah trôk chăng jêh ri geh n'hâm tŭk.’ Khân may gĭt năl tâm nkhah rah vah moh trôk jêng, ƀiălah khân may mâu tâm nkhah dơi ôh nau mbên năm khay.

⁴ Rnôk djơh mhĭk jêh ri văng tĭr aơ joi du nau mbên khlay; ƀiălah mâu mra geh nau mbên khlay êng ăn ma khân păng ôh, knŏng nau mbên khlay Y-Yôna.” Jêh nây Păng chalơi khân păng jêh ri lŏ hăn.

Ndrui phung Pharisi

⁵ Tơlah phung oh mon hăn rgăn kơh kăl tê̆, khân păng chuêl djôt piăng let.

⁶ Brah Yêsu lah ma khân păng: “Njrăng hom jêh ri uănh njrăng ma ndrui phung Pharisi jêh ri phung Sađusê.”

⁷ Phung oh mon nchră ndrăng khân păng jêh ri lah: “Yorlah he mâu geh piăng let.”

⁸ Brah Yêsu gĭt nau nây lah ma khân păng: “Hơi phung geh djê̆ nau chroh, mâm ƀư khân may nchră ndrăng khân may ma nau khân may mâu geh piăng let hĕ?

⁹ Khân may ê hŏ gĭt rbăng hĕ? Khân may mâu kah gĭt ma prăm mlâm piăng let ma prăm rbăn bunuyh, jêh ri ndah âk bĭ khân may dônh bĭ piăng let rmeh?

¹⁰ Mâu lah pơh mlâm piăng let ăn puăn rbăn bunuyh, jêh ri ndah bĭ khân may djôt sĭt bĭ piăng let rmeh?

¹¹ Mâm ƀư khân may mâu gĭt rbăng pô aơ Gâp mâu ŭch ngơi ma piăng let ôh? Njrăng hom ma ndrui phung Pharisi jêh ri phung Sađusê.”

¹² Nôk nây, phung oh mon gĭt rbăng pô aơ Păng mâu đă khân păng njrăng ndrui ƀư piăng let, ƀiălah ma nau phung Pharisi jêh ri phung Sađusê ntĭm nti.

Nau Y-Pêtrôs mbơh nkoch

¹³ Tơlah lăp tâm n'gor Sêsarê Philip, Brah Yêsu ôp ma phung oh mon pô aơ: “Tĭng nâm nau bu lah, mbu amoh Kon Bunuyh jêng?”

¹⁴ Phung oh mon ơh: “Ƀaƀă phung lah jêng Y-Yôhan-Ƀaptist, ƀaƀă phung êng lah jêng Y-Êli, ƀaƀă phung êng đŏng lah jêng Y-Yêrêmi mâu lah du huê tâm phung nơm mbơh lor.”

¹⁵ Păng lah pô aơ: “Mbu Gâp jêng khân may lah?”

¹⁶ Y-Simôn Pêtrôs ơh: “May jêng Brah Krist, Kon Brah Ndu gŭ rêh mro mrăng.”

¹⁷ Brah Yêsu lah ma păng: “Hơi Y-Simôn kon Y-Yôna, ueh maak ngăn ma may! Yor ri mâu di nglay săk jêh ri mham mpơl nau nây ma may ôh, ƀiălah jêng Mbơ̆ Gâp gŭ ta klơ trôk yơh.

¹⁸ Bi ma, Gâp mbơh ma may pô aơ: May jêng Y-Pêtrôs, Gâp mra rdâk Phung Ngih Brah Ndu Gâp ta klơ lŭ aơ, lĕ mpông ƀon phung khĭt mâu dơi đah Phung nây ôh.

¹⁹ Gâp mra ăn keh khuă ƀon bri hađăch klơ trôk ma may; moh nau may mra kât ta neh ntu mra kât đŏng tâm trôk, jêh ri moh nau may mra pơk ta neh ntu ăt mra pơk đŏng tâm trôk.”

²⁰ Jêh nây Păng buay phung oh mon lơi lah ma bu gĭt Păng jêng Brah Krist ôh.

Brah Yêsu lah lor ma Păng khĭt jêh ri dâk rêh tay

²¹ Ntơm bơh nar nây, Brah Yêsu ntơm mbơh ma phung oh mon gĭt pô aơ Păng mra hăn tâm ƀon Yêrusalem, tuy dơn âk nau rêh ni tă bơh phung kôranh bu ranh, phung kôranh ƀư brah toyh ndrel ma phung kôranh nchih samƀŭt, phung nây mra nkhĭt Păng, ta nar tal pe Păng dâk rêh tay.

²² Y-Pêtrôs jă Brah Yêsu hăn ntŭk êng, jêh ri buay king Păng pô aơ: “Ơ Kôranh Brah, ăn Brah Ndu buay lơi nau nây! Nau nây mâu mra tât ma May ôh!”

²³ Ƀiălah Brah Yêsu rle măt uănh ta Y-Pêtrôs jêh ri lah: “Hơi Satan, rŭch plơ̆ hom pakơi Gâp! May ŭch ƀư tŭp Gâp; yorlah may mâu mĭn ma kan Brah Ndu, ƀiălah knŏng mĭn ma kan kon bunuyh.”

²⁴ Jêh nây Brah Yêsu lah ma phung oh mon pô aơ: “Tơlah mbu nơm ŭch tĭng Gâp, ăn păng dun khân păng nơm, tuy si tâm rkăng khân păng nơm gay tĭng Gâp.

²⁵ Yorlah mbu nơm joi nau rêh păng nơm mra roh; ƀiălah mbu nơm yor Gâp roh nau rêh păng nơm mra joi dơi đŏng.

²⁶ Moh nau khlay tơlah du huê bunuyh geh lĕ neh ntu ƀiălah roh huêng păng nơm? Moh ndơ bunuyh nây mra sŏk gay rgâl huêng păng nơm?

²⁷ Yorlah Kon Bunuyh mra văch tâm nau chrêk rmah Mbơ̆ Păng ndrel ma phung tông mpăr. Nôk nây, Păng mra ăn nau nkhôm ma ăp nơm, tĭng nâm nau kan păng hŏ pah jêh.

²⁸ Nanê̆ ngăn, Gâp lah ma khân may, geh ƀaƀă bunuyh gŭ ta aơ mâu mra khĭt ôh lor saơ Kon Bunuyh văch tâm ƀon bri hađăch Păng.”