Kôranh Oh Mon 28 - Nau Brah Ndu Ngơi 2023

Y-Pôl ta gôl dak Maltơ

¹ Jêh hên lĕ klaih jêh, hên gĭt năl kôdak nây rnha Maltơ.

² Phung bunuyh gŭ ta bri nây rom hên ma nau ueh. Yorlah trôk ntơm mih jêh ri ji kăt, khân păng sŭnh ŭnh ăn hên njâr jêh ri vơt rom lĕ rngôch hên.

³ Y-Pôl dônh du nchăp long klŭp mƀăr tâm ŭnh, geh du mlâm bêh vǐt tă bơh tâm nchăp long hung luh yorlah duh ŭnh, jêh ri băr krêp ta ti păng.

⁴ Tơlah phung ƀon tơm nây saơ bêh krêp ta ti Y-Pôl, khân păng tâm lah drăng nơm pô aơ: “Nanê̆ nơm nây jêng du huê nkhĭt bunuyh! Pôri klaih jêh tă bơh dak mƀŭt kđôi lĕ nau di mâu ăn păng gŭ rêh ôh!”

⁵ Ƀiălah Y-Pôl rteh lơi bêh vǐt nây tâm ŭnh jêh ri păng mâu geh nau ji ôh.

⁶ Khân păng ntôn lah păng môr săk jăn mâu lah cha lôt khĭt ro; ƀiălah jŏ jêh khân păng gŭ uănh, mâu saơ geh nau hih rhâl tât geh, khân păng tâm rgâl tay nau mĭn jêh ri lah bunuyh nây jêng du huê brah.

⁷ Dăch tâm ntŭk nây jêng neh Y-Publius, du huê kôranh kôdak nây. Păng jă jêh ri vơt rom hên ueh ngăn tâm pe nar.

⁸ Nôk nây, mbơ̆ Y-Publius lâng bê̆ch ta sưng yor ji kăt jêh ri ji ndŭl. Y-Pôl hăn jô̆ khâl, mbơh sơm, pah ti ta păng jêh ri ƀư bah păng.

⁹ Nôk nau aơ tât jêh, lĕ rngôch phung ji kuet tâm kôdak nây văch tât ta Y-Pôl, jêh ri dơi bah da dê.

¹⁰ Khân păng mpơl nuih n'hâm yơk ma hên hâu ngăn; dôl hên ncho kumpăn, khân păng ăn ndơ ma hên dŏng.

Y-Pôl ta ƀon Rôm

¹¹ Jêh pe khay, hên hăn ncho kumpăn rnha Điôskur văch bơh ƀon Aleksandrơ, jêng kumpăn hŏ njưh ta kôdak nây dôl yan sial puh.

¹² Hên hăn tât ta ƀon Sirakus jêh ri gŭ ta nây pe nar.

¹³ Tă bơh ntŭk nây, hên nchuăt dăr jêh ri tât ta ƀon Rêjơ. Nar ôi taơ, geh sial tă pa dâng, yor ri bar nar pakơi hên hăn tât ta ƀon Puteoli.

¹⁴ Hên tâm mâp đah phung oh nâu ta nây; khân păng jă hên gŭ ndrel khân păng pơh nar. Pôri hên tât ta ƀon Rôm.

¹⁵ Phung oh nâu gŭ ta nây tăng lư hên tât ta Pôrum Apius jêh ri ntŭk Pe Ngih Tăch Drăp gay chuă hên. Y-Pôl saơ phung oh nâu lah ueh ma Brah Ndu jêh ri ntop nau nănh janh.

¹⁶ Tơlah hên tât jêh ta ƀon Rôm, Y-Pôl dơi ăn gŭ ndrel ma du huê tahan gak.

¹⁷ Pe nar Pakơi, Y-Pôl jă phung kôranh chiă uănh phung Yuđa văch; nôk khân păng rgum tay, Y-Pôl ngơi: “Hơi phung oh nâu, nđâp tơlah gâp mâu mâp ƀư moh nau tâm rdâng đah phung ƀon lan mâu lah đah nau vay phung chô yau he, bu hŏ nhŭp gâp ta ƀon Yêrusalem jêh ri jao gâp tâm ti phung Rôm.

¹⁸ Jêh sek ôp gâp, khân păng ŭch mplơ̆ ăn kon me ma gâp, yorlah bu saơ gâp mâu geh nau tih khư khĭt ôh.

¹⁹ Ƀiălah phung Yuđa dun jêh nau nây, pôri gâp nchâp ôp dăn tanăp Sêsar, mâu di gâp ŭch phong ndŭl mpôl gâp ôh!

²⁰ Yor nây yơh, gâp dăn tâm mâp jêh ri ngơi đah khân may; yorlah ma nau phung Israel kâp gân, gâp dơn rse rvăk nkông aơ.”

²¹ Phung nây plơ̆ lah: “Hên mâu mâp dơn ôh samƀŭt njuăl tă bơh n'gor Yuđa nkoch bri ma nau may, jêh ri mâu geh du huê tâm phung oh nâu văch ta aơ mbơh mâu lah ngơi mhĭk ma may đŏng.

²² Ƀiălah, hên ŭch gĭt mâm nau may mĭn, yorlah hên gĭt bu tâm rdâng đah mpôl nây lam ăp ntŭk.”

²³ Jêh tâm nal nar tâm mâp đah păng, khân păng hăn khâl păng ta ngih păng gŭ njưh âk ngăn bunuyh. Ntơm bơh ôi tât mhaơ, Y-Pôl ăt mbơh nkoch jêh ri rblang ƀon bri hađăch Brah Ndu ma khân păng, dŏng nau vay Y-Môis jêh ri lĕ nau mbơh lor srôih nsŭk nsôr khân păng tâm Brah Yêsu.

²⁴ Phung ƀaƀă geh nau nsŭk nsôr tă bơh nau Y-Pôl nti, bi ƀaƀă mâu ŭch chroh ôh.

²⁵ Yor nây, khân păng mâu geh du ai jêh ri du sĭt, Y-Pôl ngơi tay nau aơ: “Brah Huêng Ueh hŏ ntăm jêh nanê̆ di ngăn, nôk Păng dŏng nơm mbơh lor Y-Êsai lah ma phung chô yau pô aơ:

²⁶ ‘Hăn văch hom ma phung ƀon lan aơ jêh ri lah: Khân may iăt ƀiălah mâu gĭt rbăng ôh, Khân may uănh ƀiălah mâu saơ.

²⁷ Yorlah nuih n'hâm phung ƀon lan aơ plơ̆ jêng ngo klĕng, Tôr khân păng rngêl, Măt khân păng nhêp. Klach lah măt khân păng saơ, Tôr khân păng tăng, Nuih n'hâm khân păng gĭt rbăng, Jêh ri khân păng plơ̆ tay, Gay ma Gâp ƀư bah khân păng hĕ.’

²⁸ Pôri, ăn khân may gĭt nau Brah Ndu tâm rklaih hŏ mbơh nkoch jêh ma phung bu năch jêh ri khân păng mra gŭ iăt.”

³⁰ Y-Pôl gŭ bar năm bêng tâm du mlâm ngih păng nkhôm. Păng rom lĕ rngôch bunuyh hăn khâl păng,

³¹ nti lah ma ƀon bri hađăch Brah Ndu, jêh ri nti ma Kôranh Brah jêng Brah Yêsu Krist ma nau kon me, mâu geh nơm buay păng.