Kôranh Oh Mon 26 - Nau Brah Ndu Ngơi 2023

Y-Pôl tanăp hađăch Agripa

¹ Nôk nây hađăch Agripa lah ma Y-Pôl: “May dơi vay ngơi koh dŏng ma may nơm.” Y-Pôl yơr ti, koh dŏng ma păng nơm pô aơ:

² “Hơi hađăch Agripa, nar aơ gâp ƀŭn lap ngăn gâp dơi koh dŏng ma gâp nơm tanăp hađăch ma lĕ nau phung Yuđa mbơh phong gâp;

³ yorlah khlay ngăn ngên hađăch gĭt rah vah jêh lĕ nau vay phung Yuđa tâm ban đŏng nau khân păng tâm djrel. Pôri, dăn ma hađăch srôih gŭ iăt nau gâp.

⁴ Lĕ rngôch phung Yuđa gĭt da dê jêh nau gâp gŭ rêh ntơm bơh hôm jê̆, tâm nklang phung ndŭl mpôl gâp jêh ri ta ƀon Yêrusalem.

⁵ Tơlah khân păng rơm ndrăp mbơh nkoch ma nau aơ, khân păng hŏ gĭt bơh jŏ jêh gâp hŏ gŭ rêh tĭng mpôl Pharisi, jêng mpôl dăng ngăn tâm nau phung hên chroh.

⁶ Aƀaơ bu phat dôih gâp, yorlah kâp gân nau Brah Ndu ton jêh ma phung che hên.

⁷ Yor nau kâp gân nây yơh, jât ma bar ndŭl mpôl hên nsrôih ngăn yơk mbah ma Brah Ndu măng nâm nar. Hơi hađăch, yor nau kâp gân nây yơh phung Yuđa phong gâp.

⁸ Mâm ƀư khân may gŭ ta nây mâu chroh ma Brah Ndu ƀư ăn bunuyh khĭt dâk rêh tay?

⁹ Nanê̆, lor panăp aơ gâp mĭn jêh joi lĕ rngôch nau tâm rdâng đah amoh Brah Yêsu bunuyh Nasaret.

¹⁰ Gâp ƀư jêh pônây ta ƀon Yêrusalem: Nsing nau dơi tă bơh phung kôranh ƀư brah toyh, gâp krŭng âk phung kloh ueh, jêh ri tơlah bu tâm rmal nkhĭt khân păng, gâp ăt dơn du mĭn ndrel phung nây đŏng.

¹¹ Gâp hăn ƀaƀơ lam lĕ ngih rƀŭn gay ma rmal khân păng jêh ri nchâp khân păng dun nau chroh; gâp ji nuih kŏ tât hăn ta ƀon phung bu năch gay ma ƀư djơh khân păng.

¹² Yor nây, gâp hăn ta ƀon Đamas ma nau dơi jêh ri nau ntrŭnh tă bơh phung kôranh ƀư brah toyh.

¹³ Tâm trong hăn, ơ hađăch, nôk nây klăp lah nklang bôk nar, gâp saơ nau ang tă bơh klơ trôk, nchrat ang rlau lơn ma nar, sol nchrat jŭm gâp jêh ri phung hăn ndrel ma gâp.

¹⁴ Nôk nây lĕ rngôch hên cha lôt ta neh da dê, gâp tăng bâr ngơi lah ma gâp tâm nau ngơi Hêbrơ pô aơ: ‘Hơi Y-Sôl, hơi Y-Sôl, mâm ƀư may ƀư mhĭk ma Gâp? Jêr ngăn may chưng loih mplanh.’

¹⁵ Gâp ơh: ‘Ơ Kôranh Brah, mbu May jêng?’ Kôranh Brah plơ̆ lah: ‘Gâp jêng Brah Yêsu, may hŏ ƀư mhĭk.

¹⁶ Ƀiălah dâk hom jêh ri dâk sŏng, yorlah Gâp hŏ tâm mpơl ma may gay ma njêng may jêng oh mon jêh ri nơm mbơh ma lĕ rngôch nau may hŏ saơ jêh ntŭk Gâp, jêh ri nđâp ma lĕ nau Gâp mra tâm mpơl ma may gĭt.

¹⁷ Gâp mra rklaih may tă bơh tâm phung mpôl băl aơ jêh ri phung bu năch jêng ntŭk Gâp mra njuăl may hăn văch

¹⁸ gay ma pơk an măt khân păng, ăn khân păng du bơh nau ngo hăn tâm nau ang, tă bơh nau dơi ktang Satan plơ̆ sĭt ma Brah Ndu; gay ma nau chroh ma Gâp, khân păng dơn nau yô̆ an nau tih jêh ri dơn kô̆ drăp ndơ ndrel ma phung kloh ueh.’

¹⁹ Hơi hađăch Agripa, ntơm bơh nây, gâp mâu janh tâm rdâng đah nau tâm saơ tă bơh klơ trôk ôh;

²⁰ ƀiălah lor lơn, gâp mbơh nkoch ma phung bunuyh ta ƀon Đamas, jêh ta nây ta ƀon Yêrusalem jêh ri lĕ n'gor Yuđa, jêh nây tât ma phung bu năch, ăn khân păng rmal nau tih jêh ri plơ̆ sĭt ma Brah Ndu, pah kan tâm di đah nau tâm rmal ma nau tih.

²¹ Yor nau nây, phung Yuđa hŏ nhŭp gâp tâm ngih brah jêh ri mĭn ŭch nkhĭt gâp.

²² Ƀiălah Brah Ndu king n'gang gâp kŏ tât ta nar aơ, jêh ri pôri, gâp dâk ta aơ mbơh nkoch ma bunuyh jê̆ jêh ri bunuyh toyh, Gâp mâu ngơi moh nau êng rlau lơn jêng nau kôranh nơm mbơh lor jêh ri Y-Môis mbơh lor hŏ geh tât jêh:

²³ nây jêng Brah Krist dơn nau rêh ni, jêh ri jêng nơm dâk rêh tay lor lơn bơh nau khĭt, gay ma nkoch mbơh nau ang ma phung Yuđa tâm ban đŏng ma phung bu năch.”

²⁴ Dôl Y-Pôl ngơi kŏh dŏng ma păng nơm pônây, Phêtus ngơi huy pô aơ: “Hơi Y-Pôl, may roh nau mĭn jêh! May nti âk ngăn tât may jêng rluk!”

²⁵ Ƀiălah Y-Pôl plơ̆ lah: “Ơ kôranh toyh Phêtus, gâp mâu roh nau mĭn ôh, ƀiălah gâp dôl ngơi lĕ nau ngơi nanê̆ ngăn jêh ri kah gĭt săk đŏng.

²⁶ Yorlah hađăch gĭt nanê̆ jêh lĕ nau aơ, rĭ dĭng gâp janh ngơi; yorlah gâp mĭn n'hêl nanê̆ păng gĭt jêh lĕ rngôch nau, yorlah lĕ nau aơ mâu ƀư ma nau ndâp ôh.

²⁷ Hơi hađăch Agripa, may chroh lĕ ma nau phung kôranh nơm mbơh lor? Gâp gĭt ngăn may chroh yơh!”

²⁸ Hađăch Agripa plơ̆ lah ma Y-Pôl: “Lơi ntôn lah knŏng tâm mông gleh, may nsŭk nsôr gâp plơ̆ jêng du huê Phung Brah Krist.”

²⁹ Y-Pôl ngơi: “Nđâp tơlah gŭ jŏ mâu lah gleh, gâp dăn ma Brah Ndu, mâu di knŏng êng hađăch ôh, ƀiălah nđâp ma lĕ rngôch bunuyh phung gŭ iăt gâp nar aơ plơ̆ jêng nâm bu gâp, knŏng mâu geh rse rvăk aơ dơm.”

³⁰ Nôk nây hađăch, kôranh n'gor, H'Bêrênis, jêh ri phung bunuyh gŭ ndrel ma khân păng dâk da dê.

³¹ Dôl khân păng du sĭt, khân păng tâm lah ndrăng nơm: “Bunuyh aơ mâu geh nau tih khư khĭt mâu lah krŭng ôh.”

³² Hađăch Agripa lah ma Phêtus: “Tơlah bunuyh aơ ê hŏ dăn dun nau aơ tanăp Sêsar, năng ai mƀơk ăn păng.”