Kôranh Oh Mon 25 - Nau Brah Ndu Ngơi 2023

Y-Pôl tanăp Phêtus

¹ Jêh pe nar lah bu dơm Phêtus tât ta n'gor, păng tă bơh ƀon Sêsarê hăn hao ta ƀon Yêrusalem.

² Ta nây, phung kôranh ƀư brah toyh jêh ri kôranh chiă uănh tâm phung Yuđa phong Y-Pôl tanăp păng,

³ dăn Phêtus ƀư ueh ma khân păng, ăn têk leo Y-Pôl plơ̆ sĭt ta ƀon Yêrusalem; yorlah khân păng ŭch gŭ kâp nkhĭt Y-Pôl rŏ trong.

⁴ Ƀiălah Phêtus plơ̆ lah pô aơ Y-Pôl bu krŭng ta ƀon Sêsarê jêh ri păng nơm hăn gơnh lĕ ta nây.

⁵ Phêtus lah tay: “Pônây, phung kôranh chiă uănh tâm phung khân may jŭr hom ndrel ma gâp; tơlah bunuyh nây geh nau tih, ăn khân may phong păng.”

⁶ Phêtus gŭ tay ma khân păng klăp lah tâm pham mâu lah jât nar, jêh nây păng hăn trŭnh ta Sêsarê; nar ôi taơ păng gŭ ta ntŭk ngih phat dôih jêh ri đă bu njŭn Y-Pôl ma păng.

⁷ Tơlah Y-Pôl tât, phung Yuđa jŭr tă bơh ƀon Yêrusalem, gŭ jŭm păng jêh ri geh lĕ nau phong âk ngăn gay kât nau tih ma păng, ƀiălah khân păng mâu mpơl nau mbơh rah vah ôh.

⁸ Y-Pôl ngơi koh dŏng păng nơm: “Gâp mâu ƀư tih tâm rdâng đah nau vay phung Yuđa ôh, mâu lah tâm rdâng đah ngih brah Yuđa, mâu lah tâm rdâng đah Sêsar.”

⁹ Ƀiălah Phêtus ŭch ƀư maak ma phung Yuđa, lah ma Y-Pôl: “May ŭch hăn ta ƀon Yêrusalem, gay ma gâp phat dôih ma lĕ nau mbơh kât aơ?”

¹⁰ Y-Pôl ơh: “Gâp dôl gŭ dâk ta ntŭk ngih phat dôih Sêsar jêng ntŭk bu dơi phat dôih gâp; yorlah gâp mâu mâp tih đah phung Yuđa ôh, nâm bu may hŏ gĭt rah vah jêh.

¹¹ Tơlah gâp geh nau kue mâu lah ƀư tih khư nau khĭt, gâp mâu dun nau khĭt ôh; ƀiălah, tơlah khân păng mâu geh nau mbơh gay kât nau tih gâp, mâu geh du huê dơi jao gâp ma khân păng ôh. Gâp ŭch dăn nau aơ tât ta Sêsar.”

¹² Jêh tâm nchră đah phung kôranh kơl nchră, Phêtus plơ̆ lah: “May hŏ dăn dun ma Sêsar, may mra hăn ta Sêsar.”

Y-Pôl tanăp Agripa

¹³ Bar pe nar pakơi, hađăch Agripa jêh ri H'Bêrênis tât ta ƀon Sêsarê gay ma tâm khâl Phêtus.

¹⁴ Yorlah khân păng gŭ jŏ nar ta nây, Phêtus nkoch mbơh nau Y-Pôl ăn ma hađăch, păng lah pô aơ: “Ta aơ geh du huê bu nă kôranh n'gor Phêlik ê hŏ phat dôih.

¹⁵ Dôl gâp gŭ ta ƀon Yêrusalem, phung kôranh ƀư brah toyh jêh ri phung kôranh bu ranh tâm phung Yuđa phong nau tih păng jêh ri dăn ma gâp rmal păng.

¹⁶ Gâp plơ̆ lah ma khân păng pô aơ phung Rôm mâu geh vay ôh jao du huê bunuyh bu rmal, êlor păng geh nau tâm ngơi tanăp phung phong păng, gay ma păng koh dŏng ma nau phong nau tih tâm rdâng đah păng.

¹⁷ Yor nây, nôk khân păng văch ta aơ, gay mâu roh mông, gâp gŭ ta ntŭk ngih phat dôih ta nar ôi taơ jêh ri đă bu njŭn păng ro.

¹⁸ Phung phong gŭ ta ntŭk phat dôih ri da dê, ƀiălah mâu dơi phong du ntil nau tih tâm ban ma gâp mĭn ôh.

¹⁹ Khân păng knŏng rlăch nchră ma ƀaƀă nau tâm nau chroh êng phung khân păng jêh ri ma du huê Yêsu, khĭt jêh, ƀiălah Y-Pôl mbơh ngăn ma nau păng hôm gŭ rêh.

²⁰ Yorlah ê hŏ gĭt hĕ mâm ma nau nây, pôri gâp ôp Y-Pôl, păng ŭch hăn ta ƀon Yêrusalem gay ma phat dôih nau nây ta nây mâu lah mâu.

²¹ Ƀiălah dôl Y-Pôl dăn dun, ăn prăp nau nây ma hađăch phat dôih, pôri gâp đă bu krŭng păng ăn tât nar njŭn leo jao ma Sêsar.”

²² Agripa lah ma Phêtus: “Gâp ŭch iăt nau păng lĕ.” Phêtus ơh: “Nar ôi taơ may mra tăng nau păng ngơi.”

²³ Pôri, nar ôi taơ hađăch Agripa jêh ri H'Bêrênis văch ma nau khưm rnam, lăp tâm jrô phat dôih ndrel ma phung kôranh chiă uănh jêh ri phung kôranh tâm ƀon nây. Phêtus đă bu njŭn leo Y-Pôl ta nây.

²⁴ Phêtus lah: “Hơi hađăch Agripa jêh ri lĕ rngôch phung gŭ tâm aơ: Khân may saơ bunuyh aơ yor păng yơh lĕ rngôch phung Yuđa ta ƀon Yêrusalem, nđâp ta ƀon aơ vơl dăn gâp jêh ri nter mâu dơi ăn păng gŭ rêh ôh.

²⁵ Ƀiălah gâp mâu saơ păng mâu ƀư moh nau khư nau khĭt ôh; yorlah păng nơm lĕ dăn dun ma nau aơ tât ta Sêsar, pôri gâp ŭch njŭn leo jao păng ta nây.

²⁶ Ƀiălah yor gâp mâu geh moh nau nanê̆ ngăn gay ma mbơh ma hađăch, pôri gâp đă bu njŭn leo păng tanăp khân may, lor lơn jêng tanăp hađăch Agripa, jêh nau sek uănh lôch jêh, gâp mra geh nau gay ma blau nchih tâm samƀŭt.

²⁷ Yorlah gâp mĭn têk leo du huê bu nă ƀiălah mâu mbơh rah vah moh ntil nau bu phong păng, nanê̆ ngăn jêng mâu di.”