Kôranh Oh Mon 24 - Nau Brah Ndu Ngơi 2023

Y-Pôl tanăp kôranh n'gor Phêlik

¹ Prăm nar jêh nây, kôranh ƀư brah toyh lơn Y-Ananias hăn tât ta ƀon Sêsarê ndrel ma ƀaƀă kôranh bu ranh jêh ri du huê bunuyh blau tâm mbơh dôih, amoh păng Y-Tertulus gay phong Y-Pôl tanăp kôranh n'gor.

² Bu kuăl Y-Pôl văch, Y-Tertulus ntơm phong păng pô aơ:

³ “Hơi kôranh n'gor Phêlik! Yor nau yô̆ may ăn ma hên dơi dơn nau đăp mpăn; yor nau blau mĭn may phung ƀon lan aơ geh âk nau tâm rgâl mhe. Mbah ntŭk jêh ri ndah jŏ, hên sŏk dơn da dê lĕ nau nây đah nuih n'hâm kah gĭt âk ngăn.

⁴ Ƀiălah mâu ŭch ƀư rsuak may jŏ jong ir đŏng, gâp dăn ma may gŭ iăt ma nuih n'hâm ueh may nau hên ngơi bar pe tong.

⁵ N'hêl nanê̆ ngăn, hên mâp bunuyh aơ tâm ban ma nau ji tưp, ƀư uh ah ma lĕ rngôch phung Yuđa lam neh ntu jêh ri jêng kôranh ma mpôl Nasaret.

⁶ Păng ƀư ƀơ̆ ma ngih brah Yuđa, pôri hên nhŭp chăp păng.

⁸ Dăn may nơm sek ôp păng gay ma gĭt lĕ rngôch nau hên phong păng.”

⁹ Phung Yuđa geh tâm di du ai nuih n'hâm đah nau phong nây jêh ri lah nanê̆ di ngăn kơt nây.

¹⁰ Jêh kôranh n'gor nchŏng ti đă Y-Pôl ngơi, păng ơh: “Gâp gĭt jêh may jêng kôranh phat dôih tâm n'gor aơ jŏ năm jêh, pôri gâp răm maak koh dŏng gâp nơm tanăp may.

¹¹ Nâm bu may hŏ dơi gĭt, gâp tât ta ƀon Yêrusalem gay ma yơk mbah ê hŏ dơi jât ma bar nar.

¹² Bu mâu mâp saơ gâp tâm djrel đah bu mâu lah nsŭk nsôr ma phung ƀon lan ƀư nau tâm rdâng, mâu lah ta tâm ngih brah, mâu lah ta ngih rƀŭn, mâu lah ta ƀon toyh.

¹³ Aƀaơ aơ, khân păng mâu dơi mpơl nau mbơh ma nau khân păng phong gâp tanăp may.

¹⁴ Gâp dơn nanê̆ tanăp may pô aơ, gâp tĭng nau chroh khân păng lah jêng du mpôl êng. Gâp yơk mbah ma Brah Ndu phung che hên, chroh lĕ nau nchih jêh tâm ndrom samƀŭt nau vay jêh ri lĕ ndrom samƀŭt mbơh lor.

¹⁵ Gâp geh nau kâp gân tâm Brah Ndu, tâm ban ma khân păng lĕ, nâm bu ntĭt phung sŏng srăng jêh ri phung kue mra geh nau dâk rêh tay.

¹⁶ Yor nây, gâp srôih ƀaƀơ gay geh nuih n'hâm sŏng, mâu geh nau nduyh ôh tanăp Brah Ndu jêh ri tanăp kon bunuyh.

¹⁷ Jŏ năm jêh gŭ ngai, aƀaơ aơ gâp sĭt bri dak gay djôt leo ndơ ŭch kơl jêh ri nhhơr ndơ ƀư brah.

¹⁸ Khân păng saơ gâp ƀư nau rƀŭn ƀư kloh tâm ngih brah, mâu geh tâm rgum phung âk mâu lah ƀư nau uh ah ôh.

¹⁹ Ƀiălah geh ƀaƀă bunuyh Yuđa tă bơh n'gor Asi geh măt ta nây; tơlah khân păng geh nau ŭch phong gâp, ăn khân păng văch tanăp may gay phong.

²⁰ Mâu lah ăn phung gŭ ta aơ mbơh moh nau tih gâp hŏ ƀư, dôl gâp gŭ tanăp Mpôl Kôranh Phat Dôih;

²¹ tơlah geh, knŏng jêng du trong gâp ngơi tâm nklang khân păng: ‘Yor nau phung khĭt dâk rêh tay yơh bu phat dôih gâp tanăp khân may nar aơ.’ ”

²² Phêlik gĭt rah vah jêh ma nau chroh Y-Pôl ngơi nây, pôri păng njong nar phat dôih jêh ri mbơh: “Tơlah kôranh chiă uănh Y-Lysias văch, gâp ŭch lah nau aơ.”

²³ Kôranh n'gor đă kôranh tahan gak njrăng Y-Pôl, ƀiălah ăn nau nơih ma păng, jêh ri mâu buay phung oh nâu păng văch mât mray păng.

²⁴ Bar pe nar pakơi, Phêlik hăn ndrel ma ur păng jêng H'Drusil, bunuyh Yuđa, văch jêh ri đă bu kuăl Y-Pôl gay iăt nau păng lah ma nau chroh tâm Brah Yêsu Krist.

²⁵ Ƀiălah dôl Y-Pôl ngơi ma nau sŏng srăng, ma nau di keh jêh ri ma nau phat dôih tâm nar kăndơ̆, Phêlik klach râm sâr jêh ri lah: “Sĭt hom may aƀaơ ro; tơlah gâp ru, gâp mra kuăl may.”

²⁶ Ndrel rnôk nây, Phêlik kâp gân Y-Pôl mra blŏl prăk ma păng, pôri păng kuăl Y-Pôl văch ƀaƀơ jêh ri ngơi đah păng.

²⁷ Bar năm pakơi, Pôrtus Phêtus ntrok Phêlik. Yorlah Phêlik ŭch ƀư maak ma phung Yuđa, ăt păng ăn bu krŭng Y-Pôl tâm ndrung.