Kôranh Oh Mon 22 - Nau Brah Ndu Ngơi 2023

Nau Y-Pôl mbơh nkoch ma phung Yuđa

¹ “Hơi phung nâu, phung mbơ̆ gâp, gŭ iăt hom nau gâp koh dŏng aơ!”

² Tơlah khân păng iăt Y-Pôl ngơi nau Hêbrơ, khân păng gŭ rklăk ngăn. Y-Pôl lah:

³ “Gâp jêng bunuyh Yuđa, deh ta ƀon Tars, n'gor Silisi, ƀiălah bu rong gâp tâm ƀon aơ, gâp nti bơh nơm nti Y-Gamaliel. Gâp geh nau nti di tĭng nâm nau vay phung chô yau, bêng ma nau nsrôih ngăn ma Brah Ndu, tâm ban ma lĕ rngôch phung khân may nar aơ.

⁴ Gâp hŏ tă ƀư mhĭk ma phung chroh aơ kŏ tât nkhĭt; nhŭp chăp jêh ri krŭng nđâp ma bu ur mâu lah bu klâu.

⁵ Ma nau nây, kôranh ƀư brah toyh lơn jêh ri lĕ Mpôl Kôranh mbơh nkoch ma gâp da dê, gâp hŏ dơn jêh tă bơh ti khân păng lĕ samƀŭt njuăl ma phung oh nâu ta ƀon Đamas, jêh ri gâp hŏ hăn tât ta nây gay nhŭp chăp phung chroh, njŭn khân păng ta ƀon Yêrusalem gay ma tâm rmal.

⁶ Dôl gâp hăn rŏ trong dăch tât ta ƀon Đamas, nklang bôk nar, ƀât lât geh nau ang hâu ngăn tă bơh klơ trôk nchrat ang jŭr nkŭm gâp.

⁷ Gâp cha lôt ta neh jêh ri tăng bâr lah ma gâp pô aơ: ‘Hơi Y-Sôl, hơi Y-Sôl, mâm ƀư may ƀư djơh ma Gâp?’

⁸ Gâp plơ̆ lah: ‘Ơ Kôranh Brah, mbu moh May?’ Păng lah: ‘Gâp jêng Brah Yêsu, bunuyh ƀon Nasaret, may ƀư djơh mhĭk.’

⁹ Phung hăn ndrel ma gâp saơ rah vah nau ang nây, ƀiălah khân păng mâu tăng bâr Nơm ngơi đah gâp ôh.

¹⁰ Gâp ơh: ‘Ơ Kôranh Brah, moh gâp mra ƀư?’ Kôranh Brah plơ̆ lah: ‘Dâk hom may, hăn ta ƀon Đamas, ta nây bu mra lah ma may gĭt lĕ nau Gâp hŏ ntĭm ma may ƀư.’

¹¹ Phung hăn ndrel ma gâp têk ta ti jêh ri njŭn gâp ta ƀon Đamas, yorlah gâp mâu hôm dơi saơ yor nau nchrat ang nây.

¹² Ta ƀon nây geh Y-Ananias jêng bunuyh gơih ngăn djôt prăp nau vay, lĕ rngôch phung Yuđa gŭ ta nây mbơh nkoch ueh ma păng.

¹³ Nơm nây văch joi gâp, dâk êp ta meng jêh ri lah: ‘Hơi Y-Sôl, nâu gâp, ăn may saơ ang hom!’ Ƀât lât mông nây, gâp dơi saơ ang jêh ri uănh saơ Y-Ananias.

¹⁴ Jêh ri păng lah: ‘Brah Ndu phung che he săch jêh may ăn gĭt nau Păng ŭch, ăn saơ Nơm Sŏng Srăng, jêh ri ăn iăt nau tă bơh bâr mbung Păng ngơi.

¹⁵ Yorlah may mra mbơh nkoch ma Păng tanăp lĕ rngôch bunuyh lĕ nau may hŏ saơ jêh ri tăng.

¹⁶ Aƀaơ ri, moh ndơ may gŭ kâp? Dâk hom, kuăl mbơh sơm ma amoh Kôranh Brah gay dơn nau ƀaptem jêh ri ƀư kloh nau tih may.’

¹⁷ Gâp plơ̆ sĭt ta ƀon Yêrusalem; dôl gâp gŭ mbơh sơm tâm ngih brah, gâp geh tât ma nau tâm saơ

¹⁸ jêh ri saơ Kôranh Brah ngơi đah gâp pô aơ: ‘Ngăch oi đê̆, luh gơnh tă bơh ƀon Yêrusalem, yorlah khân păng mâu mra dơn ôh, nau may mbơh nkoch bri ma nau Gâp!’

¹⁹ Gâp plơ̆ lah: ‘Ơ Kôranh Brah, khân păng nơm gĭt jêh gâp mâp krŭng jêh ri dong phung chroh ma May tâm lĕ ngih rƀŭn.

²⁰ Jêh ri rnôk Y-Êtiên jêng nơm mbơh ma Kôranh Brah bu ƀư nkhŭt mham păng, gâp gŭ êp ta meng, du ai ndrel ma khân păng jêh ri mât bok ao ma phung nkhĭt păng.’

²¹ Kôranh Brah lah ma gâp: ‘Hăn hom, yorlah Gâp mra njuăl may hăn tât ma phung bu năch ta ntŭk ngai.’ ”

²² Khân păng gŭ iăt nau Y-Pôl, ƀiălah tât ta nau nây, khân păng ntơm nter toyh: “Nkhĭt lơi bunuyh nây bơh neh ntu! Păng mâu khư gŭ rêh ôh.”

²³ Khân păng nter huy ktang, mƀăr bok ao, mbrih ndruyh neh klơ trôk.

²⁴ Kôranh chiă uănh ntrŭnh bu njŭn leo Y-Pôl lăp tâm pôih, dong ma mâng rpăt jêh ri ôp sek gay gĭt mâm ƀư phung ƀon lan nter tâm rdâng ma păng pônây.

²⁵ Dôl bu chăp ŭch dong păng, Y-Pôl lah ma kôranh tahan dôl gŭ dăch ta nây: “Khân may geh nau dơi dong du huê phung Rôm, lah ê hŏ geh nau phat dôih?”

²⁶ Tăng nau Y-Pôl lah pônây, kôranh tahan nây hăn mbơh ma kôranh chiă uănh lah pô aơ: “Moh may mra ƀư? Yor bunuyh nây jêng du huê phung Rôm.”

²⁷ Pôri, kôranh chiă uănh hăn tâm mâp đah Y-Pôl jêh ri ôp: “Lah hom ma gâp gĭt, may jêng phung Rôm ngăn ƀơh?” Y-Pôl plơ̆ lah: “Di yơh.”

²⁸ Kôranh chiă uănh lah: “Gâp rvăt nau dơi jêng phung Rôm nây đah rnoh dŭt âk.” Y-Pôl plơ̆ lah: “Ƀiălah gâp geh nau nây bơh mhe deh.”

²⁹ Ƀât lât, phung nkra ôp sek păng plơ̆ rŭch da dê jêh ri kôranh chiă uănh klach, tơlah păng gĭt bunuyh păng đă chăp nây jêng du huê Rôm.

Y-Pôl tanăp Mpôl Kôranh Phat Dôih

³⁰ Nar ôi taơ, kôranh chiă uănh ŭch gĭt nanê̆ moh nau phung Yuđa phong Y-Pôl, păng đă bu doh lơi nse chăp ma Y-Pôl, jêh ri ntrŭnh ma phung kôranh ƀư brah toyh ndrel ma lĕ rngôch Mpôl kôranh phat dôih tâm rƀŭn, jêh păng njŭn leo Y-Pôl gŭ tanăp khân păng.