Kôranh Oh Mon 21 - Nau Brah Ndu Ngơi 2023

Y-Pôl ta ƀon Tyre

¹ Hên tâm nkhah đah khân păng, hên ncho kumpăn jêh ri n'ho hăn ta kôdak Kôs. Nar ôi taơ, hên hăn tât ta kôdak Rôdês, jêh ri tă bơh nây tât ta ƀon Patara.

² Gŭ ta nây, hên saơ du mlâm kumpăn hăn tât ta n'gor Phênisi, hên ncho kumpăn jêh ri hăn.

³ Tơlah hên saơ kôdak Syprơ, hên hăn rgăn mpeh pa dâng kôdak aơ, hăn sŏng tât ta n'gor Siri jêh ri njơh ta kơh ƀon Tyre, yorlah kumpăn bu njŭr drăp ndơ ta nây.

⁴ Jêh joi saơ phung oh mon, hên gŭ pơh nar ndrel ma khân păng. Brah Huêng Ueh ntrôl khân păng lah ma Y-Pôl, lơi hăn ta ƀon Yêrusalem ôh.

⁵ Tơlah lĕ nar hên gŭ njưh ta nây, hên hăn trong tay. Lĕ rngôch phung oh mon ndrel ma phung ur kon khân păng njŭn hên tât padih ƀon, jêh nây lĕ rngôch hên chon kômâk ta kơh dak mƀŭt jêh ri mbơh sơm.

⁶ Jêh hên tâm nkhah, hên ncho kumpăn jêh ri bi phung oh mon plơ̆ sĭt ta ngih khân păng nơm.

Y-Pôl ta ƀon Pôtôlêmê jêh ri ƀon Sêsarê

⁷ Bơh ƀon Tyre, hên hăn tât ta ƀon Pôtôlêmê, mbah jô̆ khâl phung oh nâu jêh ri gŭ ndrel ma khân păng du nar.

⁸ Nar ôi taơ, hên dâk hăn tât ta ƀon Sêsarê, lăp tâm ngih Y-Philip, nơm mbơh nkoch Nau Mhe Mhan Ueh jêh ri jêng du huê tâm phung pơh nuyh kơl kan, jêh nây gŭ ta nĕ.

⁹ Păng geh puăn nuyh kon bu ur druh, geh nau yô̆ ngơi nau mbơh lor.

¹⁰ Dôl hên gŭ ta nây bar pe nar, geh du huê nơm mbơh lor amoh, păng Y-Agabus hăn jŭr tă bơh n'gor Yuđa.

¹¹ Păng hăn chop khâl hên, sŏk rse bŭt Y-Pôl, chăp jâng ti păng nơm jêh ri lah: “Aơ jêng nau Brah Huêng Ueh lah: ‘Ta ƀon Yêrusalem, phung Yuđa mra chăp bunuyh geh rse bŭt aơ tâm ban pô aơ lĕ jêh ri jao păng ma phung bu năch.’ ”

¹² Nôk tăng nau nây, phung chroh gŭ ta nây jêh ri hên dăn ma Y-Pôl lơi hăn ta ƀon Yêrusalem.

¹³ Ƀiălah Y-Pôl plơ̆ lah: “Mâm ƀư khân may nhĭm jêh ri ƀư ji nuih n'hâm gâp? Yorlah gâp rơm ndrăp jêh mâu di knŏng nau bu chăp ôh, ƀiălah nđâp ma nau khĭt ta ƀon Yêrusalem, yor amoh Brah Yêsu lĕ.”

¹⁴ Dôl saơ păng mâu ŭch dơn nau hên nkah, hên mâu hôm nchâp ôh jêh ri lah: “Ăn nau Kôranh Brah ŭch mra tât.”

Y-Pôl ta ƀon Yêrusalem

¹⁵ Lôch lĕ nar ta nây, hên nkra ndô ndơ hăn ta ƀon Yêrusalem.

¹⁶ Geh ƀaƀă phung oh mon tă bơh ƀon Sêsarê hăn ndrel, njŭn hên ta ngih Y-Manasôn ƀon tơm ta kôdak Syprơ, jêng du huê oh mon jŏ jêh, jêh ri hên njưh ta nây.

¹⁷ Tât hên ta ƀon Yêrusalem, phung oh nâu rom hên ma nau răm maak.

¹⁸ Nar ôi taơ, Y-Pôl hăn ndrel ma hên hăn chop khâl Y-Yakơ. Lĕ rngôch phung bu ranh geh măt ta nây.

¹⁹ Jêh tâm mbah jô̆ khâl, Y-Pôl nkoch bri ăp ntil lĕ nau Brah Ndu ƀư jêh ma phung bu năch tâm nau păng pah kan.

²⁰ Jêh tăng nau nây, khân păng tâm rnê ma Brah Ndu, jêh ri khân păng lah ma Y-Pôl: “Hơi nâu, may saơ nây, geh âk rmưn phung Yuđa hŏ chroh; lĕ rngôch khân păng duh nđơr djôt nau vay.

²¹ Khân păng tăng jêh nau may nti ma lĕ rngôch phung Yuđa gŭ tâm phung bu năch chalơi nau vay Y-Môis, mâu ăn bu koh ntâu ma phung kon khân păng jêh ri mâu lĕ dơi tĭng nau vay ơm khân păng.

²² Pônây, moh mra ƀư? Yorlah nanê̆ ngăn khân păng hŏ gĭt may tât jêh.

²³ Pôri, dăn may ƀư hom tĭng nau hên ntĭnh may: Hên geh puăn nuyh geh nau ton jêh.

²⁴ Njŭn leo hom puăn nuyh aơ ƀư tâm rƀŭn ƀư kloh ndrel ma khân păng, jêh ri may nơm nkhôm bu poih sŏk khân păng. Pôri, lĕ rngôch mra gĭt nau bu nkoch bri may jêng mâu di, jêh ri gĭt may tâm ban lĕ djôt prăp nau vay.

²⁵ Bi phung bu năch chroh jêh, hên nchih samƀŭt ntăm jêh ma khân păng ma nau hên tâm nal, nây jêng: mâu sông sa ndơ ƀư brah ma rup brah, mham, mâu lah mpô mpa khĭt măp jêh ri lơi văng tĭr.”

²⁶ Y-Pôl njŭn leo puăn nuyh nây hăn tĭng jêh ri nar ôi taơ, păng ƀư rƀŭn nau ƀư kloh ndrel ma khân păng; jêh ri păng lăp tâm ngih brah, gay mbơh nar ƀư kloh mra lôch jêh ri ndơ nhhơr ăp nơm tâm khân păng nhhơr.

Nau bu nhŭp Y-Pôl tâm ngih brah

²⁷ Dăch lôch pơh nar, phung Yuđa tă bơh n'gor Asi, saơ Y-Pôl tâm ngih brah, nsônh phung ƀon lan nhŭp Y-Pôl.

²⁸ Khân păng nter huy: “Hơi phung Israel, văch kơl hom hên! Aơ, bunuyh aơ nti lah lam ntŭk, tâm rdâng đah phung ƀon lan, đah nau vay, jêh ri ta ntŭk aơ; rlau lơn ma nĕ, păng njŭn leo phung Grek lăp tâm ngih brah, ƀư ƀơ̆ ntŭk kloh ueh aơ.”

²⁹ Yorlah panăp aơ dơh khân păng saơ Y-Trôphim, bunuyh ƀon Êphêsô, gŭ ndrel ma Y-Pôl tâm ƀon, jêh ri khân păng nđôn Y-Pôl, nơm njŭn leo păng tâm ngih brah.

³⁰ Lĕ ƀon lan jêng uh ah, âk bunuyh nchuăt văch nhŭp Y-Pôl jêh ri têk păng luh tă bơh ngih brah, jêh ri bu nchăng lơi mpông ro.

³¹ Dôl khân păng joi nau dơi nkhĭt păng, kôranh chiă uănh mpôl tahan Rôm tăng lư lĕ ƀon Yêrusalem geh nau uh ah.

³² Ƀât lât, păng sŏk tahan nđâp ma phung kôranh tahan, nchuăt ran ta phung âk. Tơlah saơ kôranh tahan toyh jêh ri phung tahan, khân păng nsrŭng, mâu hôm dong Y-Pôl đŏng ôh.

³³ Kôranh tahan hăn dăch, nhŭp Y-Pôl jêh ri đă bu kât ma bar njăr rse rvăk, jêh ri păng ôp, mbu may jêng jêh ri moh nau may hŏ ƀư.

³⁴ Tâm phung âk nây, ƀaƀă nter lah pô aơ, ƀaƀă nter lah pôri; jêh ri yor nau uh ah, păng mâu dơi gĭt nau ngăn, pôri păng đă bu njŭn leo tâm pôih.

³⁵ Tơlah Y-Pôl chuat hao ta jâng gung, phung tahan chông păng yorlah phung âk ƀư djơh ngăn.

³⁶ Phung âk tĭng groi pakơi nter lah: “Nkhĭt hom păng!”

³⁷ Dôl bơi lăp tâm pôih, Y-Pôl lah ma kôranh chiă uănh: “Dơi lĕ ăn gâp ngơi bar pe tong đah may?” Kôranh chiă uănh ôp: “May blau lĕ ngơi nau ngơi Grek?

³⁸ Pôri may mâu di jêng du huê Êjipt, nơm ƀư nau djơh nôk ri, njŭn leo tâm bri rdah puăn rbăn nuyh phung djơh?”

³⁹ Y-Pôl lah: “Gâp jêng bunuyh Yuđa, ƀon tơm ta ƀon Tars, n'gor Silisi, ƀon lan du ƀon khlay. Dăn ăn gâp dơi ngơi đah phung âk aơ.”

⁴⁰ Dơi ăn jêh, Y-Pôl dâk ta jâng gung, yơr ti gay tâm mpơl ma phung ƀon lan. Nôk lĕ rngôch gŭ klăk, Y-Pôl ngơi nau Hêbrơ pô aơ: