Kôranh Oh Mon 20 - Nau Brah Ndu Ngơi 2023

Y-Pôl tâm n'gor Masêđôn jêh ri n'gor Grek

¹ Tơlah nau uh ah hŏ đăp mpăn jêh, Y-Pôl jă phung oh mon văch gay ma n'hao nuih n'hâm khân păng, jêh tâm nkhah đah phung nây jêh ri hăn ta n'gor Masêđôn.

² Păng hăn nsong lam n'gor nây, tâm n'hao nuih phung chroh jêh ri hăn ta n'gor Grek

³ jêh ri păng gŭ ta nây pe khay. Bơi ma ntơm ncho plŭng hăn ta n'gor Siri, phung Yuđa tâm nchră ƀư mhĭk ma Y-Pôl, pôri păng ŭch hăn rgăn ta n'gor Masêđôn gay plơ̆ sĭt.

⁴ Hăn ndrel ma păng geh Y-Sôpatê, kon Y-Piru, ƀon Bêrê; Y-Aristarkus, Y-Sêkundus ƀon Têsalônik; Y-Gaius ƀon Đerbơ; Y-Tikikus jêh ri Y-Trôphim n'gor Asi jêh ri Y-Timôthê.

⁵ Phung bunuyh aơ hăn lor jêh ri gŭ kâp hên ta ƀon Trôas.

⁶ Bi hên, jêh năng rƀŭn Piăng Let Mâu Geh Ndrui, hên ncho plŭng du tă bơh ƀon Philip; prăm nar rlau, hên tâm mâp đah khân păng ta ƀon Trôas, jêh ri gŭ ta ƀon nây pơh nar.

Y-Pôl ta ƀon Trôas

⁷ Nar nguay tâm pơh, dôl hên tâm rƀŭn gay nkê̆ch piăng let. Y-Pôl mbơh nkoch ma phung oh mon; yorlah păng hăn trong nar ôi taơ, pôri păng mbơh nkoch tât klong măng.

⁸ Geh âk ŭnh kađen tâm jrô klơ ta ntŭk hên tâm rƀŭn nây.

⁹ Du huê bu klâu ndăm amoh păng Y-Ơtik, gŭ ta mpông bloh, bê̆ch gui dôl mông Y-Pôl nti lah jŏ ngăn. Yorlah ji bê̆ch hâu ngăn, păng tŭp tă bơh ngih pe tăp; tơlah bu chông păng, păng khĭt jêh.

¹⁰ Ƀiălah Y-Pôl chuat jŭr, kŭnh ut păng tâm ti jêh ri lah: “Lơi rŭng răng ôh, păng ăt hôm rêh!”

¹¹ Y-Pôl hao tay ta jrô klơ nkê̆ch piăng let jêh ri sa; păng ngơi jŏ ngăn tât ôi jêh ri păng hăn trong.

¹² Bu njŭn bu klâu ndăm nây plơ̆ sĭt ta ngih păng; păng ăt hôm rêh, nau nây bonh leng ma lĕ rngôch bunuyh.

Y-Pôl ta ƀon Milêt

¹³ Hên hăn lor, ncho plŭng hăn ta ƀon Asôs, ta nây hên ŭch tâm mâp đah Y-Pôl; yorlah păng ŭch mĭn hăn trong kơh rĭ dĭng dăp lor kơt nây.

¹⁴ Tâm mâp đah păng ta ƀon Asôs, hên chuă vơt păng bơh plŭng jêh ri hên hăn ta ƀon Mitilen.

¹⁵ Tă bơh nây, hên ncho plŭng jêh ri nar ôi taơ hên tât ta kôdak Chiôs. Nar pakơi, hên veh lăp ta kôdak Samôs jêh ri hăn du nar tay đŏng hên tât ta ƀon Milêt.

¹⁶ Yorlah Y-Pôl tâm nal knŏng hăn rgăn ƀon Êphêsô, mâu nsrŭng bah roh mông nar ta n'gor Asi. Păng hăn ndal gay tơlah dơi tât ta ƀon Yêrusalem di nar Pantơkôt.

Y-Pôl mbơh nkoch ma phung bu ranh ta ƀon Êphêsô

¹⁷ Rnôk nây, bơh ƀon Milêt, Y-Pôl njuăl bunuyh ta ƀon Êphêsô kuăl phung kôranh bu ranh tâm Phung Ngih Brah Ndu văch ta nây.

¹⁸ Tơlah phung nây văch, păng lah ma khân păng: “Khân may gĭt jêh, ntơm bơh nar gâp ntơm tât tâm n'gor Asi, mâm ƀư gâp gŭ ngao ndrel ma khân may.

¹⁹ Gâp pah kan ma Kôranh Brah ma nau dêh rhêt, nđâp ma âk dak măt, jêh ri tuy dơn âk nau rlong uănh tă bơh phung Yuđa tâm nchră ƀư mhĭk ma gâp.

²⁰ Gâp nkoch mbơh lĕ nau khlay ma khân may, moh nau prăp tay, jêh ri ntĭm nti ma khân may ta ntŭk phung tâm rƀŭn, mâu lah ntơm bơh ngih aơ tât ta ngih ri;

²¹ gâp mbơh ăn ma phung Yuđa jêh ri phung Grek ma nau rmal nau tih tanăp Brah Ndu jêh ri nau chroh tâm Yêsu Krist, Kôranh Brah he.

²² Ri, aƀaơ aơ Brah Huêng Ueh ntrôl gâp hăn ta ƀon Yêrusalem, mâu gĭt ôh moh nau mra tât ma gâp ta nây;

²³ knŏng Brah Huêng Ueh mbơh lor ma gâp gĭt, tâm ăp ƀon, geh rse rvăk jêh ri nau rêh ni gŭ kâp gâp.

²⁴ Ƀiălah gâp mâu kơp nau rêh gâp khlay ôh, knŏng tơlah lôch jêh nau rlong jêh ri nau pah kan gâp sŏk dơn tă bơh Kôranh Brah jêng Brah Yêsu, ăn gâp mbơh Nau Mhe Mhan Ueh ma nau yô̆ Brah Ndu.

²⁵ Aƀaơ, gâp gĭt tâm lĕ rngôch khân may phung gâp mbơh nkoch jêh ma nau ƀon bri hađăch Brah Ndu, mâu du huê nuyh mra saơ muh măt gâp đŏng ôh.

²⁶ Yor nây, nar aơ gâp lah ngăn tanăp khân may, gâp mâu geh nau tih ma mham lĕ rngôch khân may.

²⁷ Yorlah gâp mbơh lĕ nau ŭch bơh Brah Ndu ma khân may, moh nau mâu prăp tay ôh.

²⁸ Khân may njrăng hom ma khân may nơm jêh ri ma lĕ rngôch phung biăp Brah Huêng Ueh hŏ njêng jêh khân may jêng nơm mât uănh, gay chiăp leo Phung Ngih Brah Ndu Kôranh Brah, rvăt jêh ma mham Kon Păng nơm.

²⁹ Gâp gĭt, jêh gâp dâk hăn, mra geh phung so bri janh ktang lăp tâm phung khân may, khân păng mâu geh nau yô̆ ma phung biăp ôh.

³⁰ Tă bơh nklang phung oh nâu khân may mra dâk đŏng bunuyh nti lah âk nau tih mhĭk, gay ma ndơm phung oh mon tĭng ndô̆ khân păng.

³¹ Pôri, rngeh njrăng hom, kah gĭt tay dôl tâm pe năm, măng jêh ri nar, gâp mâu rlu ôh hoch dak măt gay ntĭm nti ma lĕ rngôch bunuyh.

³² Aƀaơ aơ, gâp jao khân may ma Brah Ndu jêh ri ma nau chroh nau yô̆ Păng, jêng nau chroh dơi ndâk jêh ri ăn drăp ndơn ma khân may nđâp ma lĕ rngôch phung bunuyh geh nau kloh ueh.

³³ Gâp mâu kơnh ir ma prăk, mah, mâu lah bok ao bu ôh.

³⁴ Khân may nơm gĭt jêh, bar mpang ti aơ yơh sâm ăn lĕ nau ŭch ma gâp jêh ri ma phung băl ndrel kan đah gâp.

³⁵ Gâp hŏ tă ntĭm nti jêh ma khân may, tâm lĕ nau kan, he gơih ƀư kan kơt nĕ gay sâm kơl phung ji kuet, jêh ri kah gĭt tay Kôranh Brah yơh jêng Brah Yêsu hŏ ntăm jêh: ‘Ăn ma bu jêng nau ueh lơn ma sŏk dơn.’ ”

³⁶ Jêh păng lah pônây, Y-Pôl chon kômâk jêh ri mbơh sơm ndrel ma lĕ rngôch phung nây.

³⁷ Lĕ rngôch khân păng nhĭm da dê jêh ri ut ta trô ko Y-Pôl gay chŭm.

³⁸ Khân păng rngot rvê ngăn yor nau tăng Y-Pôl lah khân păng mâu mra saơ muh măt păng ôh. Jêh ri khân păng njŭn Y-Pôl tât ta kumpăn.