Kôranh Oh Mon 19 - Nau Brah Ndu Ngơi 2023

Y-Pôl ta ƀon Êphêsô

¹ Dôl Y-Apôlôs gŭ ta ƀon Kôrintô, Y-Pôl lĕ hăn trong rgăn n'gor bri, tât ta ƀon Êphêsô. Păng tâm mâp đah bar pe nuyh oh mon gŭ ta nây,

² păng ôp khân păng: “Ntơm bơh khân may chroh, geh sŏk dơn Brah Huêng Ueh lĕ?” Khân păng plơ̆ lah: “Hên mâu mâp tăng ôh bu lah geh Brah Huêng Ueh.”

³ Păng ôp tay: “Moh nau ƀaptem khân may dơn?” Phung nây plơ̆ lah: “Nau ƀaptem bơh Y-Yôhan.”

⁴ Y-Pôl lah: “Y-Yôhan hŏ ƀư ƀaptem ma rmal nau tih, mbơh ma phung ƀon lan ăn chroh ma Nơm mra văch pakơi păng, nâm bu ntĭt chroh ma Brah Yêsu.”

⁵ Jêh tăng nau nây, khân păng dơn ƀaptem ma amoh Kôranh Brah jêng Brah Yêsu.

⁶ Nôk Y-Pôl pah ti ta khân păng, Brah Huêng Ueh jŭr ta khân păng; khân păng ngơi nau bu năch jêh ri nau mbơh lor.

⁷ Lĕ rngôch klăp lah jât ma bar nuyh.

⁸ Y-Pôl lăp tâm ngih rƀŭn, nti lah ma nau nănh, tâm rlăch jêh ri jă bu gŭ iăt ma ƀon bri hađăch Brah Ndu tâm pe khay.

⁹ Ƀiălah geh ƀaƀă bunuyh geh nuih n'hâm dăng, mâu ŭch chroh, ngơi djơh ma nau chroh ma Kôranh Brah tanăp phung ƀon lan, Y-Pôl du ngai bơh khân păng, djôt leo phung oh mon ta ntŭk êng, jêh ri ăp nar tâm nchră tâm ngih nti Y-Tiranus.

¹⁰ Nau kan aơ ƀư tay tâm bar năm, kŏ tât lĕ rngôch bunuyh ta n'gor Asi, nđâp ma phung Yuđa, phung Grek, iăt Nau Brah Ndu Ngơi da dê.

¹¹ Brah Ndu dŏng ti Y-Pôl ƀư nau mbên khlay toyh ngăn,

¹² kŏ tât bu sŏk bok jêh ri ao rjai păng hŏ nsoh, dơm ta klơ phung ji kuet, nau ji kuet dơi bah jêh ri mprơh lơi huêng djơh tă bơh khân păng.

Phung kon bu klâu Y-Sêvas nsot lơi brah mhĭk

¹³ Rnôk nây geh ƀaƀă nơm n'hŭm phung Yuđa hăn ntơm bơh ntŭk nây tât ntŭk êng, rlong uănh lah dŏng amoh Kôranh Brah jêng Brah Yêsu gay ma mprơh huêng djơh tă bơh phung bunuyh brah mhĭk lơh. Khân păng lah: “Gâp ntrŭnh nau ntăm ma khân may tâm amoh Kôranh Brah jêng Brah Yêsu, Nơm Y-Pôl mbơh nkoch nây.”

¹⁴ Phung ƀư nau nây jêng pơh nuyh kon bu klâu Y-Sêvas jêng kôranh ƀư brah toyh lơn phung Yuđa.

¹⁵ Ƀiălah brah mhĭk lah đah khân păng: “Gâp gĭt jêh Brah Yêsu jêh ri gĭt rah vah Y-Pôl đŏng, ƀiălah mbu moh khân may jêng?”

¹⁶ Bunuyh brah mhĭk lơh nchuăt ran ta khân păng, rduh lăp jêh ri dơi ƀư ma phung khân păng kŏ tât khân păng nchuăt du tă bơh ngih, rhôk rhak jêh ri sôt găt da dê.

¹⁷ Lĕ rngôch phung bunuyh gŭ ta ƀon Êphêsô, nđâp ma phung Yuđa jêh ri phung Grek tăng lư nau nây, khân păng klach ngăn; amoh Brah Yêsu lơ hô bu yơk.

¹⁸ Âk bunuyh hŏ chroh jêh, văch mbơh nau tih jêh ri mpơl ma lĕ nau khân păng ƀư jêh.

¹⁹ Geh ƀaƀă phung ƀư n'hŭm kăl e, djôt su lơi ndrom samƀŭt khân păng tanăp lĕ rngôch bunuyh. Rnoh khlay ndrom samƀŭt nây prăm jât rbăn rlat prăk.

²⁰ Pôri, ma nau brah Kôranh Brah, nau chroh ma Kôranh Brah lơ hâu ma hao jêh ri ƀrư̆ nar nâp ktang lơn.

Y-Dêmêtrus ƀư uh ah

²¹ Jêh lôch nau nây, Y-Pôl mĭn ŭch hăn ta ƀon Yêrusalem, rgăn n'gor Masêđôn jêh ri n'gor Akai. Păng lah: “Tơlah gâp tât ta nây, gâp mra khâl lĕ ƀon Rôm.”

²² Păng njuăl bar hê nơm kâp kơl păng, Y-Timôthê jêh ri Y-Êrastus, hăn ta n'gor Masêđôn; bi păng nơm gŭ tay ta n'gor Asi ƀât lât đŏng.

²³ Tâm nôk nây, geh nau rŭng răng toyh ngăn tât ma nau chroh tâm Kôranh Brah.

²⁴ Du huê bunuyh chiăr prăk, amoh păng Y-Dêmêtrius, ƀư rup ngih brah H'Dian ma prăk. Nau nây ăn phung pah kan sa prăk âk.

²⁵ Păng tâm rgum phung blau nây nđâp ma phung kan ndrel jêh ri lah: “Hơi phung oh nâu, khân may gĭt jêh he geh nau ndrŏng yor ma kan aơ.

²⁶ Tâm ban khân may saơ jêh ri tăng, mâu knŏng ta ƀon Êphêsô ôh, ƀiălah bơi ma lĕ n'gor Asi, Y-Pôl aơ nsŭk bu jêh ri ƀư âk bunuyh vĭ. Păng lah ma lĕ rup brah ti bunuyh ƀư mâu di brah ngăn ôh.

²⁷ Pônây, mâu knŏng nau tăch drăp he roh nau bu yơk, jêh ri ngih brah bu ur brah toyh H'Dian geh nau bu mưch rmot; jêh nây nau dŭt toyh bu ur brah geh nau bu yơk tâm lam n'gor Asi jêh ri lam neh ntu mra rai yot tâm ban lĕ.”

²⁸ Tăng nau nây, khân păng ji nuih ngăn, nter huy: “Bu ur brah H'Dian phung Êphêsô, dŭt toyh ngăn!”

²⁹ Lĕ ƀon nây geh nau uh ah; khân păng nchuăt ndrel lăp ta ngih bu mprơ, têk Y-Gaius, Y-Aristarkus, bunuyh n'gor Masêđôn, jêng phung hăn nsong ndrel ma Y-Pôl.

³⁰ Y-Pôl ŭch mpơl păng nơm tanăp ƀon lan, ƀiălah phung oh mon mâu ăn ôh.

³¹ Geh phung kôranh chiă uănh n'gor Asi, jêng phung mĭt jiăng đah păng, njuăl bunuyh hăn lah ma păng, lơi hăn ta ngih bu mprơ ôh.

³² Tâm nôk nây, phung âk uh ah ngăn: bunuyh nter pô aơ, ƀaƀă nter pôri, yorlah âk bunuyh mâu gĭt mâm ƀư khân păng gŭ tâm rƀŭn ta aơ.

³³ Phung Yuđa ntrôl Y-Aleksandrơ luh panăp jêh ri bar pe nuyh tâm phung âk đă păng hao ngơi. Y-Aleksandrơ yơr ti ŭch koh dŏng tanăp phung ƀon lan.

³⁴ Ƀiălah tơlah phung âk gĭt năl păng jêng bunuyh Yuđa, lĕ rngôch phung bunuyh nter du bâr ndrel n'grŭp tâm bar mông: “Bu ur brah H'Dian phung Êphêsô, dŭt toyh ngăn!”

³⁵ Rnôk nây, kôranh nchih samƀŭt ƀon nây đă phung ƀon lan gŭ rklăk jêh ri lah: “Hơi phung oh nâu Êphêsô, mbu nơm mâu gĭt ma ƀon Êphêsô jêng phung kâp gak ngih brah bu ur brah toyh H'Dian jêh ri rup păng jŭr tă bơh trôk?

³⁶ Bu mâu dơi dun ôh lĕ nau nây, pôri ăn khân may gŭ rklăk hom, lơi ndal ƀư nau uh ah.

³⁷ Yorlah phung bunuyh khân may njŭn leo jêh ta aơ mâu geh ntŭng ndơ kloh ueh mâu lah ngơi sưr rlau ma bu ur brah he ôh.

³⁸ Pôri, tơlah Y-Dêmêtrius jêh ri phung blau rhăk păng geh nau phong dôih ma bu, geh lĕ ntŭk ngih phat dôih jêh ri phung kôranh n'gor, ăn khân păng tâm ngơi dôih ndrăng khân păng nơm.

³⁹ Bi tơlah khân may dăn đă du nau êng, mra dơi dăp nkra ta mpôl kôranh phat dôih tĭng nâm nau vay.

⁴⁰ Yorlah klach lah bu phong he yor nau uh ah nar aơ, jêh ri he mâu dơi joi mâm nau ngơi gay ma n'gang ma nau rgum băl ƀư nau uh ah aơ.”

⁴¹ Jêh păng ngơi pônây, păng đă phung tâm rƀŭn sĭt.