Kôranh Oh Mon 18 - Nau Brah Ndu Ngơi 2023

Y-Pôl ta ƀon Kôrintô

¹ Jêh nau nây, Y-Pôl luh tă bơh ƀon Athen hăn ta ƀon Kôrintô.

² Ta nây, păng tâm mâp đah du huê bunuyh Yuđa amoh păng Y-Akilas, tă bơh n'gor Pôntus, mhe văch ta aơ tă bơh n'gor Italy ndrel ma ur păng rnha H'Phrisil, yorlah hađăch Klôt hŏ ntăm ăn lĕ rngôch phung Yuđa luh du tă bơh ƀon Rôm. Y-Pôl hăn chop khâl khân păng;

³ yorlah tâm ban nau kan tanh bok ƀư ngih, yor ri Y-Pôl gŭ ndrel ma bar hê khân păng gay pah kan ndrel.

⁴ Ăp nar saƀat, Y-Pôl mbơh nkoch tâm ngih rƀŭn, srôih jă phung Yuđa jêh ri phung Grek.

⁵ Tơlah Y-Silas jêh ri Y-Timôthê văch tă bơh n'gor Masêđôn, Y-Pôl knŏng mĭn ma kan nti lah, mpơl ma phung Yuđa ma nau Brah Yêsu jêng Brah Krist.

⁶ Ƀiălah yorlah khân păng tâm rdâng jêh ri ngơi sưr rlau ma păng, păng rtuh bok ao păng jêh ri lah pô aơ: “Ăn mham khân may tŭp ta bôk khân may nơm! Bi gâp mâu geh nau tih. Ntơm bơh aƀaơ aơ, gâp mra hăn ta phung bu năch.”

⁷ Y-Pôl luh tă bơh ntŭk nây, lăp tâm ngih du huê amoh păng Y-Titus-Yustus, bunuyh yơk mbah ma Brah Ndu; ngih păng dăch ta ngih rƀŭn.

⁸ Rnôk nây Y-Krispus, kôranh mât uănh ngih rƀŭn, ndrel ma lĕ rngôch ngih păng chroh ma Kôranh Brah. Geh đŏng âk phung Kôrintô iăt nau Y-Pôl nti lah, chroh jêh ri dơn nau ƀaptem.

⁹ Dôl măng, Kôranh Brah lah ma Y-Pôl tâm nau tâm saơ: “Lơi klach ôh! Ƀiălah ngơi hom jêh ri lơi gŭ rklăk ôh;

¹⁰ Gâp gŭ ndrel ma may, mâu geh du huê tâm rdâng, ƀư djơh ma may ôh, yorlah Gâp geh âk bunuyh tâm ƀon aơ.”

¹¹ Y-Pôl gŭ ta nây du năm prao khay, nti nau ngơi Brah Ndu ma khân păng.

¹² Ƀiălah dôl Y-Galiôn jêng kôranh toyh chiă uănh n'gor Akai, phung Yuđa du ai nau tâm rdâng đah Y-Pôl jêh ri njŭn leo păng ta ntŭk ngih phat dôih.

¹³ Khân păng phong: “Bunuyh aơ nsŭk nsôr phung ƀon lan yơk mbah Brah Ndu ma nau tih đah nau vay.”

¹⁴ Dôl Y-Pôl bơi hă ngơi gay ma plơ̆ lah, Y-Galiôn đă ma phung Yuđa: “Hơi phung Yuđa, tơlah geh nau ƀư tih mâu lah nau tih mhĭk, nanê̆ gâp mra srôih iăt nau khân may.

¹⁵ Ƀiălah yorlah aơ jêng nau tâm rlăch ma rplay ngơi, ma amoh bunuyh jêh ri ma nau vay êng khân may nơm, phat dôih êng ndrăng khân may nơm; gâp mâu ŭch phat dôih nau nây ôh.”

¹⁶ Jêh Y-Galiôn mprơh khân păng bơh ngih phat dôih.

¹⁷ Rnôk nây, khân păng nhŭp Y-Sôsthen, kôranh mât uănh ngih rƀŭn, dong păng tanăp ntŭk ngih phat dôih, ƀiălah Y-Galiôn mâu chrê ma nau nây ôh.

Plơ̆ sĭt ta ƀon Antiôs

¹⁸ Y-Pôl gŭ jŏ nar ta ƀon Kôrintô, jêh ri tâm nkhah đah phung oh nâu, ncho kumpăn hăn ta n'gor Siri ndrel ma H'Phrisil jêh ri Y-Akilas. Ta ƀon Senkrê, Păng poih lĕ sŏk păng yorlah păng geh nau ton jêh.

¹⁹ Khân păng tât ta ƀon Êphêsô, Y-Pôl tâm nkhah băl păng ta nây, lăp tâm ngih rƀŭn tâm rlăch đah phung Yuđa.

²⁰ Khân păng jă păng gŭ jŏ lơn, ƀiălah păng mâu ŭch ôh.

²¹ Păng tâm nkhah đah khân păng jêh ri lah: “Tơlah Brah Ndu ŭch, gâp mra plơ̆ văch ma khân ay may.” Jêh nây păng ncho kumpăn luh tă bơh ƀon Êphêsô.

²² Nôk tât ta ƀon Sêsarê, păng hăn hao ta ƀon Yêrusalem ŭch jô̆ khâl ma Phung Ngih Brah Ndu, jêh nây hăn jŭr ta ƀon Antiôs.

²³ Tơlah păng gŭ jŏ oi jêh ta nây, păng hăn, nsong lam lĕ n'gor Galati jêh ri n'gor Phriji, ƀư ăn nâp ktang lĕ rngôch phung oh mon.

Y-Apôlôs ta ƀon Êphêsô jêh ri ƀon Kôrintô

²⁴ Nôk nây, geh du huê bunuyh Yuđa, amoh păng Y-Apôlôs, tă bơh ƀon Aleksandrơ, tât ta ƀon Êphêsô. Păng blau nau ngơi jêh ri gĭt rbăng Nau Brah Ndu Ngơi.

²⁵ Păng nti jêh nau chroh Kôranh Brah, geh nuih n'hâm duh nđơr gay ma mbơh nkoch jêh ri ntĭm nti ăn di lĕ nau Brah Yêsu, nđâp lah păng gĭt knŏng nau Y-Yôhan ƀaptem dơm.

²⁶ Păng ntơm mbơh nkoch ma nau janh ktang tâm ngih rƀŭn. Nôk H'Phrisil jêh ri Y-Akilas iăt nau păng nti lah jêh, khân păng jă păng gŭ ndrel, rblang kloh rah vah nau chroh tâm Brah Ndu ma păng nanê̆ lơn.

²⁷ Tơlah Y-Apôlôs ŭch hăn rgăn ta n'gor Akai, phung oh nâu n'hao nuih n'hâm păng jêh ri nchih samƀŭt ntĭnh ma phung oh mon ăn rom păng ma nau ueh. Tơlah păng tât jêh, tâm nau yô̆ păng sâm kơl âk ngăn ma phung chroh ma Kôranh Brah,

²⁸ yorlah păng mpơl lĕ tâm rlăch ktang ngăn đah phung Yuđa, sŏk Nau Brah Ndu Ngơi mpơl rah vah Brah Yêsu jêng Brah Krist.