Kôranh Oh Mon 14 - Nau Brah Ndu Ngơi 2023

Y-Pôl jêh ri Y-Ƀarnaƀas ta ƀon Ikôni

¹ Ta ƀon Ikôni, Y-Pôl jêh ri Y-Ƀarnaƀas lăp ndrel tâm ngih rƀŭn Yuđa jêh ri mbơh nkoch, ƀư ăn âk phung Yuđa jêh ri phung Grek chroh ma Kôranh Brah.

² Ƀiălah phung Yuđa mâu chroh nsônh, ƀư djơh ma nau mĭn phung bu năch geh nau nuih ma phung oh nâu.

³ Nđâp lah pônây, bar hê kôranh oh mon gŭ ta nây jŏ nar, mbơh nkoch Kôranh Brah ma nau nănh; Kôranh Brah dŏng ti khân păng ƀư lĕ nau mbên khlay jêh ri nau khlay gay ma mbơh nau chroh ma nau Păng yô̆.

⁴ Ƀiălah phung ƀon lan tâm ƀon tâm nkhah mpôl, du phung tĭng phung Yuđa, phung ri tĭng bar hê kôranh oh mon.

⁵ Nôk nây, phung bu năch jêh ri phung Yuđa ndrel ma phung kôranh chiă uănh khân păng tâm nchră ƀư djơh jêh ri klŭp bar hê kôranh oh mon ma lŭ.

⁶ Gĭt nau nây, bar hê kôranh oh mon du nchuăt rgăn ta ƀon Listrơ jêh ri ƀon Đerbơ jêng lĕ ƀon tâm n'gor Likaoni jêh ri nkual văr jŭm,

⁷ jêh nây mbơh nkoch Nau Mhe Mhan Ueh ta nây.

Y-Pôl jêh ri Y-Ƀarnaƀas ta ƀon Listrơ

⁸ Ta ƀon Listrơ geh du huê bunuyh rvĕn bar đah jâng; păng rvĕn ntơm nôk luh bơh ndŭl mê̆, jêh ri ê hŏ mâp hăn.

⁹ Păng gŭ iăt Y-Pôl nti. Y-Pôl uănh nge nger ta păng jêh ri saơ păng geh nau chroh dơi ƀư bah

¹⁰ rĭ dĭng ngơi huy: “Dâk ăn sŏng hom jâng may!” Păng ntalơ̆ klơ jêh ri chuat hăn.

¹¹ Phung ƀon lan saơ nau Y-Pôl hŏ ƀư, nter huy ma nau ngơi phung Likaoni: “Phung brah hŏ sŏk rup bunuyh tâm mpơl jŭr jêh ndrel he!”

¹² Khân păng kuăl Ƀarnaƀas jêng brah Yupitê, bi Y-Pôl jêng brah Merkurơ yorlah păng yơh jêng nơm mbơh nkoch.

¹³ Kôranh ƀư brah ma brah Yupitê geh ngih brah ta padih ƀon, têk leo ndrôk nkuăng jêh ri rvang kao tanăp bôk mpông, ŭch ndrel ma phung ƀon lan nhhơr ndơ ƀư brah ma phung kôranh oh mon.

¹⁴ Ƀiălah bar hê kôranh oh mon jêng Y-Ƀarnaƀas jêh ri Y-Pôl gĭt nau nây, khân păng nkhêk ao khân păng nơm, rduh lăp tâm nklang phung âk jêh ri ngơi huy:

¹⁵ “Hơi phung bunuyh! Mâm ƀư khân may ƀư pônây? Hên knŏng jêng kon bunuyh, tâm ban ma khân may lĕ. Hên mbơh nkoch Nau Mhe Mhan Ueh gay ma khân may chalơi phung brah dơm dam ri jêh ri plơ̆ sĭt ma Brah Ndu rêh mro mrăng, jêng Nơm rhăk njêng trôk, neh ntu, dak mƀŭt, jêh ri lĕ rngôch mpa tâm nây.

¹⁶ Tâm rnôk kăl e, Păng ăn ma lĕ rngôch mpôl băl bunuyh hăn tĭng trong khân păng nơm.

¹⁷ Nđâp lah pônây, Păng vay nkoch ƀaƀơ ma Păng nơm dôl Păng ăn nau ueh uĭn, ăn dak mih jŭr tă bơh klơ trôk, ăn ma yan geh play âk, ndơ sông sa âk rmeh, ƀư ma nuih n'hâm khân may bêng ma nau răm maak.”

¹⁸ Nđâp lah ngơi lĕ nau, phung kôranh oh mon jêr jŏt ngăn gay ma buay phung ƀon lan nhhơr ndơ ƀư brah ma khân păng.

¹⁹ Rnôk nây, geh phung Yuđa văch tă bơh ƀon Antiôs jêh ri ƀon Ikôni văch gay nsŭk phung ƀon lan. Khân păng klŭp Y-Pôl ma lŭ; nđôn lah Y-Pôl khĭt jêh, khân păng têk păng luh padih ƀon.

²⁰ Ƀiălah dôl phung oh mon gŭ rƀŭn jŭm Y-Pôl, păng dâk jêh ri hăn lăp tâm ƀon. Ơm ôi taơ, Y-Pôl hăn ndrel ma Y-Ƀarnaƀas tât ta ƀon Đerbơ.

Y-Pôl plơ̆ sĭt ta ƀon Antiôs

²¹ Nôk bar hê kôranh oh mon mbơh nkoch Nau Mhe Mhan Ueh tâm ƀon nây jêh ri geh âk bunuyh chroh ma Kôranh Brah Yêsu, khân păng plơ̆ sĭt ta ƀon Listrơ, ƀon Ikôni, jêh ri ƀon Antiôs.

²² Bar hê khân păng ƀư nâp nuih n'hâm phung oh mon, n'hao nuih khân păng djôt nâp nau chroh, jêh ri đă pô aơ: “He găn âk nau rêh ni, ri mơ dơi lăp tâm ƀon bri hađăch Brah Ndu.”

²³ Jêh khân păng săch phung kôranh bu ranh tâm ăp Phung Ngih Brah Ndu, bar hê kôranh oh mon mbơh sơm, ât sông sa, jêh ri jao phung nây ma Kôranh Brah jêng Nơm khân păng rnơm nsing.

²⁴ Bar hê kôranh oh mon rgăn n'gor Pisidi, tât ta n'gor Pamphili;

²⁵ jêh mbơh nkoch nau ngơi ta ƀon Pergi, khân păng jŭr ta ƀon Atali.

²⁶ Ntơm bơh nây, khân păng ncho plŭng plơ̆ sĭt ta Antiôs, ntŭk kăl e bu jao khân păng ma nau yô̆ Brah Ndu gay ƀư nau pah kan khân păng mhe ƀư lôch jêh.

²⁷ Nôk tât ta nây, Y-Pôl jêh ri Y-Ƀarnaƀas kuăl rgum Phung Ngih Brah Ndu, nkoch bri lĕ kan Brah Ndu đă khân păng ƀư, jêh ri nau Păng pơk jêh mpông nau chroh ma phung bu năch.

²⁸ Bar hê khân păng gŭ jŏ ngăn ta nây ndrel ma phung oh mon.