Kôranh Oh Mon 13 - Nau Brah Ndu Ngơi 2023

II. Nau Mhe Mhan Ueh mbơh nkoch ma phung bu năch ( 13:1 – 28:31 ) Nau njuăl Y-Pôl jêh ri Y-Ƀarnaƀas mbơh nkoch

¹ Tâm Phung Ngih Brah Ndu ta ƀon Antiôs geh phung nơm mbơh lor jêh ri phung kôranh nơm nti: Y-Ƀarnaƀas, Y-Simêôn, ntơ amoh Y-Niger, Y-Lusius, bunuyh Siren, Y-Manahem jêng oh mât rong hađăch Hêrôt, jêh ri Y-Sôl.

² Dôl khân păng yơk mbah ma Kôranh Brah jêh ri ât sông sa, Brah Huêng Ueh lah: “Prăp êng hom Y-Ƀarnaƀas jêh ri Y-Sôl ma kan Gâp hŏ kuăl khân păng.”

³ Jêh khân păng ât sông sa jêh ri mbơh sơm, khân păng pah ti ma phung nây jêh ri njuăl phung nây hăn.

Y-Pôl jêh ri Y-Ƀarnaƀas tâm kôdak Syprơ. – Y-Serjus Pôlus sĭt chroh

⁴ Pôri Brah Huêng Ueh njuăl hăn, Y-Sôl ndrel ma Y-Ƀarnaƀas jŭr ta ƀon Sêlusi, tă bơh nây khân păng ncho kumpăn hăn ta kôdak Syprơ.

⁵ Tât ta ƀon Salamis, khân păng mbơh nau ngơi Brah Ndu tâm lĕ ngih rƀŭn phung Yuđa; geh đŏng Y-Yôhan kơl kan.

⁶ Nôk hăn lam kôdak nây tât ta ƀon Paphôs, ta aơ khân păng mâp du huê phung ƀŭk rƀên jêng nơm mbơh lor nklă phung Yuđa, amoh păng Y-Bar-Yêsu;

⁷ păng gŭ ndrel ma kôranh n'gor, amoh păng Y-Serjus Pôlus, jêng bunuyh blau mĭn. Kôranh n'gor đă bu kuăl Y-Ƀarnaƀas jêh ri Y-Sôl văch, yorlah păng ŭch iăt nau ngơi Brah Ndu.

⁸ Ƀiălah nơm ƀŭk rƀên nây, amoh Grek jêng Y-Êlimas, tâm rdâng đah bar hê khân păng, joi lĕ rngôch nau buay kôranh n'gor nây chroh Kôranh Brah.

⁹ Rnôk nây, Y-Sôl tâm amoh păng Y-Pôl, bêng ma Brah Huêng Ueh, uănh thâng ta nơm ƀŭk rƀên nây jêh ri lah:

¹⁰ “May jêng kon brah mhĭk, nơm rlăng ma lĕ nau sŏng, bêng ma ndơm jêh ri janh ƀai! May ƀư kue trong sŏng Kôranh Brah mro ƀơh?

¹¹ Aơ, aƀaơ aơ ti Kôranh Brah rmal may; may mra chieh măt, mâu saơ nar tâm jŏ đê̆.” Ƀât lât, nau chieh măt, nau ngo tŭp ta Y-Êlimas; păng hăn but bi, joi bunuyh kuăn ti gay ma njŭn păng nơm hăn.

¹² Kôranh n'gor saơ nau tât nây chroh ro, yor păng hih rhâl ngăn ma nau nti tă bơh Kôranh Brah.

Nau Y-Pôl nti lah ta ƀon Antiôs n'gor Pisidi

¹³ Y-Pôl jêh ri phung băl păng jŭr ncho kumpăn ta ƀon Paphôs hăn tât ta ƀon Pergi tâm n'gor Pamphili. Ƀiălah Y-Yôhan tâm nkhah đah khân păng, plơ̆ sĭt ta ƀon Yêrusalem.

¹⁴ Tă bơh ƀon Pergi khân păng n'ho hăn tât ta ƀon Antiôs, n'gor Pisidi. Tât nar saƀat, khân păng lăp gŭ tâm ngih rƀŭn.

¹⁵ Jêh ri bu rŏ ndrom samƀŭt nau vay jêh ri nau mbơh lor, phung kôranh mât uănh ngih rƀŭn njuăl bu lah ma khân păng: “Hơi phung oh nâu, tơlah khân may geh nau n'hao nuih n'hâm ma ƀon lan, ngơi hom.”

¹⁶ Y-Pôl gŭ dâk, yơr ti vơch tâm nal jêh ri lah: “Hơi phung kon Israel jêh ri phung bunuyh klach yơk ma Brah Ndu, gŭ iăt hom:

¹⁷ Brah Ndu phung Israel săch jêh phung chô yau he, ƀư ăn phung ƀon lan aơ chăt jêng dôl gŭ njưh tâm n'gor Êjipt; Păng sŏk ti nau brah njŭn leo khân păng luh tă bơh n'gor nây.

¹⁸ Păng ŭn nuih phung nây klăp lah puăn jât năm tâm bri rdah.

¹⁹ Jêh ƀư rai pơh phung mpôl băl tâm n'gor Kanaan, Păng ăn n'gor nây ma khân păng

²⁰ klăp lah tâm puăn rhiăng prăm jât năm. Jêh nây, Păng ăn ma khân păng phung kôranh phat dôih kŏ tât rnôk nơm mbơh lor Y-Samuel.

²¹ Rnôk nây phung Israel dăn du huê hađăch, Brah Ndu ăn ma khân păng Y-Sôl, kon bu klâu Y-Kis, bơh ndŭl mpôl Benjamin, chiă uănh khân păng tâm puăn jât năm.

²² Jêh Brah Ndu chalơi hađăch Y-Sôl, njêng Y-Đavit hađăch. Păng mbơh nkoch ma păng pô aơ: ‘Gâp saơ jêh Y-Đavit, kon bu klâu Y-Yêsê, nơm ƀư maak nuih n'hâm Gâp, nơm mra ƀư lĕ nau Gâp ŭch.’

²³ Ntơm bơh noi deh Y-Đavit, Brah Ndu hŏ n'hao ma phung Israel du huê Nơm Tâm Rklaih, nây jêng Brah Yêsu tâm ban Păng hŏ ton jêh.

²⁴ Êlor ma Brah Yêsu văch, Y-Yôhan mbơh nkoch nau ƀư ƀaptem rmal nau tih ăn ma lĕ rngôch phung Israel.

²⁵ Bơi ma lôch jêh kan păng nơm, Y-Yôhan lah: ‘Mbu moh khân may mĭn gâp? Gâp mâu di Nơm khân may mĭn ôh, ƀiălah ri, geh Nơm văch pakơi gâp, gâp mâu khư ôh doh rse ntâu jot Păng ôh.’

²⁶ Hơi phung oh nâu jêng phung kon sau Y-Abraham, jêh ri phung bunuyh klach yơk ma Brah Ndu, nau mbơh ma nau tâm rklaih aơ njuăl ma he yơh.

²⁷ Yorlah phung ƀon lan jêh ri phung kôranh chiă uănh khân păng ta ƀon Yêrusalem, mâu gĭt năl ôh Brah Yêsu, mâu đŏng gĭt rbăng lĕ nau mbơh lor vay rŏ ăp nar saƀat. Ƀiălah, dôl phat dôih Păng, khân păng hŏ ƀư jêh ma nau mbơh lor nây tât di ngăn.

²⁸ Nđâp tơlah mâu saơ nau tih gay ma dơi rmal nkhĭt, khân păng ăt dăn ma Pilat nkhĭt Păng.

²⁹ Tơlah khân păng hŏ ƀư tât di ngăn lĕ nau nchih ma Păng, jêh nây khân păng njŭr Păng tă bơh si tâm rkăng jêh ri tâp tâm môch.

³⁰ Ƀiălah Brah Ndu hŏ ƀư ăn Păng dâk rêh tay tă bơh nau khĭt.

³¹ Tâm âk nar, Păng hŏ tâm mpơl jêh ma phung hăn tĭng Păng ntơm bơh n'gor Galilê tât ta ƀon Yêrusalem; aƀaơ aơ khân păng mbơh nkoch Păng ma phung ƀon lan.

³² Bi hên nkoch mbơh ma khân may Nau Mhe Mhan Ueh Brah Ndu ton jêh ma phung chô yau he

³³ pô aơ Brah Ndu hŏ ƀư tât di ngăn nau ton nây ma he, jêng phung kon sau khân păng, yor Păng ƀư ăn Brah Yêsu dâk rêh tay, nâm bu hŏ nchih jêh tâm Nau Mprơ Ơm mrô bar: ‘May jêng kon Gâp, nar aơ Gâp hŏ deh ma May.’

³⁴ Brah Ndu hŏ ƀư ăn Brah Yêsu dâk rêh tay tă bơh nau khĭt, mâu hôm sĭt ma nau ôm rai ôh, nâm nau Păng hŏ ntăm jêh: ‘Gâp mra ăn ma khân may nau ueh lăng kloh ueh jêh ri nanê̆ ngăn, Păng hŏ ton jêh ma Y-Đavit.’

³⁵ Yor nây, du Nau Mprơ Ơm êng geh nau ngơi: ‘Kôranh Brah mâu đŏng ăn Nơm Kloh Ueh May saơ nau ôm rai ôh.’

³⁶ Ƀiălah jêh pah kan ma nau Brah Ndu ŭch tâm rnôk rô̆ păng nơm, hađăch Đavit lĕ khĭt jêh, bu tâp păng êp ta meng phung chô yau păng nơm jêh ri păng hŏ saơ nau ôm rai jêh;

³⁷ ƀiălah Nơm Brah Ndu ƀư ăn dâk rêh tay ri mơ mâu dơi saơ nau ôm rai ôh.

³⁸ Pôri, hơi phung oh nâu, gĭt năl hom tă bơh Nơm nây nau yô̆ an ma nau tih dơi mbơh ma phung oh nâu;

³⁹ bơh Păng yơh, lĕ rngôch phung chroh dơi kơp sŏng srăng ma lĕ ntil ƀiălah nau vay Y-Môis mâu dơi kơp sŏng srăng.

⁴⁰ Pôri, njrăng hom, lơi ăn văk di đah nau phung nơm mbơh lor hŏ mbơh:

⁴¹ ‘Hơi phung dăng mưch! Klach krit hom jêh ri du roh hom! Yorlah tâm rnôk khân may, Gâp mra ƀư du ntil kan, Nđâp tơlah bu nkoch bri, khân may mâu chroh đŏng ôh!’”

⁴² Dôl Y-Pôl jêh ri Y-Ƀarnaƀas du luh, khân păng ŭch dăn bar hê khân păng ăt nti lah lĕ nau nây tâm nar saƀat jêh aơ taơ.

⁴³ Tơlah lôch nau tâm rƀŭn, geh âk phung Yuđa jêh ri phung bu năch tĭng nau phung Yuđa chroh hăn tĭng Y-Pôl jêh ri Y-Ƀarnaƀas. Bar hê khân păng nkoch bri jêh ri n'hao nuih n'hâm khân păng gŭ nâp tâm nau yô̆ Brah Ndu.

⁴⁴ Nar saƀat pakơi, phung ƀon lan ƀon nây tâm rƀŭn ŭch iăt Nau Brah Ndu Ngơi.

⁴⁵ Ƀiălah dôl saơ phung bunuyh nây phung Yuđa bêng ma nuih n'hâm mâu nach, tâm rdâng đah nau Y-Pôl nti lah jêh ri suai rak ma păng.

⁴⁶ Ƀiălah Y-Pôl jêh ri Y-Ƀarnaƀas lah ma khân păng ma nau janh ktang: “Ăn lor lơn nkoch mbơh nau ngơi Brah Ndu ma khân may; ƀiălah yorlah khân may hŏ dun, jêh ri kơp êng khân may nơm mâu khư dơn nau rêh n'ho ro, yor ri aƀaơ aơ hên rle ma phung bu năch.

⁴⁷ Yorlah Kôranh Brah ntĭnh ntăm jêh ma hên: ‘Gâp njêng jêh may jêng nau ang ma phung mpôl băl bunuyh, gay ma njŭn leo nau tâm rklaih tât ta nglĕ dŭt rplay neh.’ ”

⁴⁸ Nôk tăng nau nây, phung bu năch răm maak, tâm rnê nau chroh ma Brah Ndu; phung bunuyh Brah Ndu tâm nal ma nau rêh n'ho ro chroh da dê.

⁴⁹ Nau ngơi Kôranh bêng ăp n'gor nây.

⁵⁰ Ƀiălah phung Yuđa nsŭk phung bu ur sŏng srăng tâm phung bu yơk jêh ri phung kôranh chiă uănh tâm ƀon, nsŭk khân păng ƀư djơh ma Y-Pôl jêh ri Y-Ƀarnaƀas, mprơh lơi bar hê khân păng luh bơh n'gor khân păng.

⁵¹ Bar hê khân păng rtuh neh muy ta jâng khân păng gay dun khân păng, jêh ri hăn ta ƀon Ikôni.

⁵² Bi phung oh mon bêng ler ma nau răm maak jêh ri Brah Huêng Ueh.