Kôlôh 3 - Nau Brah Ndu Ngơi 2023

Nau nkah ma nau rêh tâm mpôl bunuyh jêh ri rnăk vâl ( 3:1 – 4:18 ) Nau rêh mhe tâm Brah Krist

¹ Pôri tơlah khân may dâk rêh tay jêh ndrel ma Brah Krist, joi hom ndơ tâm trôk, ntŭk Brah Krist gŭ mpeh pa ma Brah Ndu.

² Rvê mĭn hom lĕ ndơ klơ trôk, lơi mĭn rvê ôh lĕ ndơ tâm neh ntu,

³ yorlah khân may khĭt jêh, nau rêh khân may pôn jêh ndrel ma Brah Krist tâm Brah Ndu.

⁴ Tơlah Brah Krist jêng nau rêh khân may tâm mpơl, dôl nây khân may mra tâm mpơl đŏng ndrel ma Păng tâm nau chrêk rmah.

⁵ Pôri nkhĭt lơi lĕ nau kơnh ŭch tâm neh ntu nâm bu nau văng tĭr, nau mâu kloh ueh, nau kơnh nglay săk ŭch, nau ŭch djơh mhĭk jêh ri nau kơnh rlau ir; yor nau kơnh rlau ir jêng tâm ban ma nau mbah rup brah;

⁶ yor lĕ nau nây nau ji nuih Brah Ndu nkhŭt ta klơ phung bunuyh mâu tông bâr.

⁷ Kăl e, khân may hŏ tă rêh tâm lĕ nau nây jêh ri gŭ ngao tâm ban pônây lĕ.

⁸ Ƀiălah aƀaơ, mƀăr lơi hom lĕ rngôch nau nây, nâm bu ntĭt nau ji nuih, nau rngot, nau janh ƀai, nau sưr rlau, jêh ri lĕ nau ngơi bir luh bơh trôm mbung khân may.

⁹ Lơi ngơi mƀruh ndrăng khân may nơm yorlah mƀăr lơi jêh bunuyh ơm ndrel ma lĕ nau kan păng

¹⁰ jêh ri nsoh bunuyh mhe, jêng bunuyh dơi rgâl mhe tâm nau gĭt năl, tĭng nâm rup Nơm rhăk bunuyh nây.

¹¹ Ta aơ mâu hôm tâm nkhah phung Grek, mâu lah phung Yuđa, bunuyh dơn koh ntâu mâu lah mâu dơn koh ntâu, bunuyh bri, mâu lah phung Syth, bunuyh dĭk bu mâu lah kon me; ƀiălah Brah Krist jêng lĕ rngôch jêh ri tâm lĕ rngôch.

¹² Khân may jêng phung bunuyh Brah Ndu săch, jêng phung kloh ueh jêh ri phung Brah Ndu rŏng ngăn ngên. Pôri, nsoh hom nuih n'hâm yô̆ nđach, nuih n'hâm ueh, nau dêh rhêt, nau rdơ̆ rbăn, nau srôih.

¹³ Tơlah du huê tâm khân may geh moh nau ngơi njang bâr đah bunuyh êng, ăn blau ât nuih n'hâm jêh ri tâm yô̆ ndrăng khân may nơm; nâm bu Kôranh Brah hŏ yô̆ an jêh ma khân may tâm ban lĕ, pôri ăn khân may tâm yô̆ an kơt nây lĕ.

¹⁴ Ƀiălah rlau lơn ma nau nây, nsoh hom nau rŏng, yorlah păng jêng rse nau tâm rnglăp tâm nau dŭt ueh ngăn.

¹⁵ Ăn hom nau đăp mpăn bơh Brah Krist chiă uănh tâm nuih n'hâm khân may, jêng nau đăp mpăn khân may hŏ dơi kuăl tât tâm du săk jăn, jêh ri mpơl hom nuih n'hâm gĭt lah ueh.

¹⁶ Ăn hom nau ngơi Brah Krist rêh bêng ler tâm nuih n'hâm khân may; sŏk hom lĕ rngôch nau blau mĭn gay ntĭm nti jêh ri tâm nkah ndrăng khân may, sŏk nau mprơ ơm, nau mprơ tâm rnê Kôranh Brah nau mprơ gay mprơ ma Brah Ndu, đah nuih n'hâm lah ueh.

¹⁷ Ăp ntil nau khân may ngơi mâu lah ƀư, ƀư hom lĕ rngôch nau tâm amoh Kôranh Brah jêng Brah Yêsu, yor tă Păng he lah ueh Brah Ndu, jêng Brah Ndu Mbơ̆.

Nau kan tâm rnăk vâl

¹⁸ Hơi phung jêng ur, tông hom ma sai khân ay nơm, kơt nĕ mơ tâm di jêng bunuyh gŭ tâm Kôranh Brah.

¹⁹ Hơi phung sai, rŏng hom ma ur khân may nơm, lơi ƀư nau djơh mhĭk ma păng.

²⁰ Hơi phung kon, tông hom ma mê̆ mbơ̆ khân may nơm tâm lĕ ntil nau, yorlah nau aơ ueh nuih n'hâm Kôranh Brah.

²¹ Hơi phung mbơ̆, lơi lŏk lôr phung kon khân may nơm, klach lah khân păng rdja nuih n'hâm.

²² Hơi phung ƀư dĭk bu, tông bâr hom ma kôranh khân may ta neh ntu aơ tâm lĕ rngôch ndơ, mâu knŏng tông bâr tra năp măt khân păng, nâm bu nơm srôih ƀư maak nuih n'hâm bu, ƀiălah yor klach yơk ma Kôranh Brah, tông bâr ndrel ma nuih n'hâm nanê̆.

²³ Moh ntil khân may ƀư, ƀư hom ma lĕ nuih n'hâm, nâm bu ƀư ma Kôranh Brah lĕ, mâu di ƀư ma bunuyh ôh,

²⁴ yor lah khân may gĭt mra dơn drăp ndơn bơh Kôranh Brah jêng nau nkhôm. Khân may dôl pah kan ma Brah Krist jêng Kôranh Brah.

²⁵ Mbu ƀư nau mâu di mra dơn nau plơng tĭng nâm nau mâu di păng hŏ ƀư jêh, mâu gŭ du ding ôh.