Kan Lêvi 26 - Nau Brah Ndu Ngơi 2023

Nau nkhôm ma nơm tông bâr

¹ “‘Khân may mâu dơi ƀư ôh lĕ rup brah mâu lah ndâk rup trah mâu lah meh lŭ; mâu dơi đŏng ndâk tâm n'gor du mlâm lŭ geh rup gay chon mon yơk mbah tanăp ndơ nây, yorlah Gâp jêng Brah Yêhôva, Brah Ndu khân may.

² Ăn kah gĭt prăp nar saƀat Gâp jêh ri yơk mbah ma ntŭk kloh ueh Gâp. Gâp jêng Brah Yêhôva.

³ Tơlah Khân may hăn tĭng nâm nau vay dăp bơh Gâp, mât mray lĕ nau vay ntăm bơh Gâp jêh ri ƀư tĭng kơt,

⁴ Gâp mra ăn ma khân may dak mih di yan sial di keh, neh mra geh kao play jêh ri tơm si tâm mir mra geh play.

⁵ Yan mprah ba mra nđom jong kŏ tât yan pĕ play krăk ƀâu, yan pĕ play krăk ƀâu mra nđom jong kŏ tât yan tuch tăm. Khân may mra sa piăng let kŏ hơm jêh ri gŭ đăp mpăn tâm n'gor khân may.

⁶ Gâp mra ăn nau đăp mpăn tâm n'gor jêh ri khân may mra bê̆ch, mâu geh nơm nkrit nhhu khân may ôh. Gâp mra mprơh lơi mpa bri janh luh bơh n'gor jêh ri đao gưm mâu mra hăn rgăn ôh tâm n'gor khân may.

⁷ Khân may mra tĭng lơh phung rlăng jêh ri khân păng mra prah ma đao gưm tanăp khân may.

⁸ Prăm nuyh tâm phung khân may mra tĭng lơh du rhiăng nuyh; du rhiăng nuyh khân may mra tĭng lơh du rmưn nuyh, jêh ri phung rlăng đah khân may mra prah cha lôt ma đao gưm tanăp khân may.

⁹ Gâp mra mât mray khân may, ƀư ăn khân may jêng bĭk rơ̆ dŭt âk, jêh ri ƀư nâp nau tâm rnglăp đah khân may.

¹⁰ Khân may dôl hôm sa ba tâm yan ơm, hŏ rep ndrăp ntŭk gay ma bun ba tâm yan mhe.

¹¹ Gâp mra ƀư ntŭk Gâp gŭ ta nklang khân may, nuih n'hâm Gâp mâu mra tâm rmot ma khân may ôh.

¹² Gâp mra hăn ta nklang khân may, jêng Brah Ndu khân may, jêh ri khân may mra jêng phung ƀon lan Gâp.

¹³ Gâp jêng Yêhôva Brah Ndu khân may, Nơm hŏ ngluh jêh khân may luh bơh Êjipt gay ma khân may mâu hôm đŏng ƀư dĭk. Gâp hŏ nkê̆ch lơi jêh mâng mbăk ma khân may gay ma ăn khân may n'gơr prêh bôk gay hăn sŏng.’

Nau tâm rmal ma nơm mâu tông

¹⁴ ‘Ƀiălah tơlah khân may mâu iăt ôh nau Gâp, jêh ri mâu ƀư tĭng lĕ nau vay ntăm aơ,

¹⁵ dun lĕ nau vay dăp bơh Gâp jêh ri nuih n'hâm khân may dĭl khek ma nau Gâp đă, yor nây khân may mâu ƀư tĭng kơt lĕ nau vay ntăm jêh ri ƀư rai lơi nau tâm rnglăp bơh Gâp,

¹⁶ Gâp mra ƀư lĕ nau ma khân may: Gâp mra nkhŭt nau krit kir tât ma khân may, nau ji khô hiăn jêh ri nau ji kăt, ƀư vĭr măt khân may jêh ri ƀư rngot nuih n'hâm khân may. Khân may mra huăr srih ntil yorlah phung rlăng đah khân may mra sa lĕ ndơ nây.

¹⁷ Gâp mra ji nuih đah khân may, khân may mra prah tanăp phung rlăng khân may; phung tâm rmot khân may, khân păng mra chiă uănh khân may jêh ri khân may mra nchuăt du nđâp lah mâu geh nơm hăn tĭng khân may.

¹⁸ Tơlah tât kơt nây, ƀiălah khân may ăt mâu iăt đŏng nau Gâp, Gâp mra tâm rmal khân may pơh tơ̆ âk lơn yor nau tih khân may,

¹⁹ jêh ri nkê̆ch lơi nau sưr jêh ri suan khân may. Gâp mra ăn trôk khân may dăng tâm ban ma loih jêh ri neh tâm n'gor khân may jêng sơh tâm ban ma kông;

²⁰ n'hâm suan khân may mra roh dơm dam, neh tâm n'gor khân may mâu deh kao play ôh, tơm si mâu geh play.

²¹ Tơlah khân may hôm tâm rdâng đah Gâp jêh ri mâu ŭch iăt nau Gâp ôh, Gâp mra nkhŭt nau tât ji tưp pơh tơ̆ âk lơn ma khân may yor nau tih khân may.

²² Gâp mra mƀơk âk mpô mpa bri janh tât jêh ri ntŭng sŏk phung kon khân may, ƀư rai mpô mpa rong jêh ri ƀư ma rnoh bunuyh khân may n'hŭch kŏ tât lĕ trong jêng hŏng.

²³ Lôch jêh lĕ nau kan nây, khân may ăt mâu plơ̆ sĭt đŏng ma Gâp, hôm ma tâm rdâng đah Gâp,

²⁴ Gâp mra tâm rdâng đŏng đah khân may, Gâp nơm yơh mra nkhŭt nau tât ji tưp ma khân may pơh tơ̆ âk lơn yor nau tih khân may.

²⁵ Gâp mra djôt đao gưm tât ma khân may gay mplơ̆ plơng yor khân may ƀư rai nau tâm rnglăp đah Gâp. Dôl khân may tâm rƀŭn tâm ƀon toyh Gâp mra nkhŭt nau ji tưp ta klơ khân may jêh ri khân may mra tŭp tâm ti phung rlăng.

²⁶ Tơlah Gâp ngroh lơi ndơ sông sa ma khân may, jât nuyh bu ur mra gŭch piăng let nsum tâm du rplay năk, jêh ri nhueh piăng let gay pă kô̆; khân may mra sa ƀiălah mâu hơm ôh.

²⁷ Tơlah tât kơt nây jêh, ƀiălah khân may ăt mâu ŭch iăt Gâp, hôm ma tâm rdâng đah Gâp,

²⁸ pôri Gâp mra ji nuih gay tâm rdâng đah khân may, jêh ri Gâp mra rmal khân may pơh tơ̆ âk lơn yor nau tih khân may.

²⁹ Khân may mra sa puăch kon bu klâu kon bu ur khân may nơm;

³⁰ Gâp mra ƀư rai ta lĕ ntŭk prêh khân may, kăl lơi lĕ nơng ƀư brah gŭch ndơ ƀâu kah jêh ri bun săk jăn khĭt khân may ta klơ rup brah khân may. Nuih n'hâm Gâp mra ƀơ̆ ƀơch ma khân may.

³¹ Gâp mra ƀư ma ƀon toyh khân may jêng rngol, lĕ ntŭk kloh ueh jêng rngot rjăp jêh ri Gâp mâu mra dơn ôh n'hôl ƀâu kah bơh ndơ ƀư brah khân may nhhơr.

³² Gâp mra ƀư rai lơi n'gor khân may kŏ tât phung rlăng đah khân may gŭ ta nây mra hih rhâl.

³³ Gâp mra nkhah khân may lam phung ndŭl mpôl bunuyh jêh ri tŏk đao gưm tĭng lơh khân may. Neh khân may mra jêng ntŭk rngol, ƀon toyh khân may mra jêng rngot rklăk.

³⁴ Aƀaơ neh mra dơn lĕ năm saƀat ntrok tay năng nar neh jêng ntŭk rngol nôk khân may gŭ tâm n'gor phung rlăng; kơt nây, neh mra dơi rlu jêh ri dơn lĕ năm saƀat.

³⁵ Tĭng năng nar hŏ chalơi rngot jêh, neh mra geh nau rlu, yorlah neh nây mâu geh ôh rlu, tâm lĕ năm saƀat dôl khân may gŭ rêh ta klơ nây.

³⁶ Bi ma phung tâm khân may hôm rêh, Gâp mra ƀư ma ra ai nuih n'hâm khân may tâm n'gor phung rlăng. Nteh n'ha si tŭp ăt ƀư ma khân may nchuăt du tâm ban ma nchuăt du panăp đao, jêh ri prah nđâp lah mâu geh bunuyh tĭng lơh.

³⁷ Nơm aơ chêh prah ta klơ nơm ri tâm ban ma nchuăt du bơh măt đao nđâp lah mâu geh nơm hăn tĭng khân may. Khân may mâu dơi tâm rđâng đah phung rlăng.

³⁸ Khân may mra rai lôch ta nklang phung ndŭl mpôl bunuyh, jêh ri n'gor phung lăng mra rvăn khân may.

³⁹ Mbu nơm tâm phung khân may hôm rêh mra rngot tâm n'gor phung rlăng yor nau djơh mhĭk khân păng nơm. Yor nau djơh mhĭk phung chô yau khân păng, khân păng mra rngot tâm n'gor phung rlăng tâm ban ma phung chô yau khân păng nơm.

⁴⁰ Ƀiălah tơlah khân păng mbơh nau tih khân păng nơm jêh ri nau tih phung chô yau khân păng hŏ ƀư tih, jêng nau tih chuêl nau Gâp yô̆ jêh ri tâm rđâng đah Gâp,

⁴¹ yor ri Gâp tâm rdâng jêh ri nsot khân păng mŭt tâm n'gor phung rlăng; tơlah nuih n'hâm mâu koh ntâu khân păng gĭt trŭnh jêh ri tông nau phat dôih yor nau tih mhĭk khân păng nơm,

⁴² Gâp mra kah gĭt tay nau tâm rnglăp hŏ ƀư jêh đah Y-Yakôb, Gâp mra kah gĭt tay nau tâm rnglăp hŏ ƀư jêh đah Y-Isăk, tâm ban đŏng ma nau tâm rnglăp đah Y-Abraham, jêh ri Gâp mra kah gĭt tay ma n'gor aơ.

⁴³ Neh khân păng chalơi mra dơn lĕ năm saƀat ntrok tay năng nar ma neh nôk khân păng chalơi jêng rngot njăp mâu geh bunuyh gŭ ta nây. Khân păng mra dơn nau rmal yorlah khân păng mưch rmot nau vay Gâp ƀư jêh ri nuih n'hâm khân păng dĭl khek lĕ nau vay Gâp dăp.

⁴⁴ Ƀiălah, nđâp lah khân păng dôl gŭ tâm n'gor phung rlăng, Gâp mâu đŏng chalơi khân păng, mâu lĕ Gâp rmot ma khân păng kŏ tât Gâp ƀư rai lĕ khân păng jêh ri mâu chalơi nau tâm rnglăp ta nklang Gâp đah khân păng, yorlah Gâp jêng Yêhôva Brah Ndu khân păng.

⁴⁵ Ƀiălah yor ma khân păng, Gâp mra kah gĭt tay nau tâm rnglăp hŏ ƀư jêh đah phung chô yau khân păng jêng phung Gâp hŏ ngluh jêh luh bơh Êjipt tanăp măt phung ndŭl mpôl bunuyh gay ƀư Brah Ndu khân păng. Gâp jêng Brah Yêhôva.’”

⁴⁶ Nây jêng lĕ nau vay dăp, lĕ nau vay ƀư jêh ri lĕ nau vay Brah Yêhôva hŏ njêng jêh ta nklang Păng nơm đah phung ƀon lan Israel ta klơ yôk Sinai tĭng nâm jao jêh ma Y-Môis.