I Samuel 30 - Nau Brah Ndu Ngơi 2023

Y-Đavit dơi đah phung Amalek

¹ Pe nar pakơi nĕ, tơlah Y-Đavit jêh ri phung tĭng ndô̆ păng hŏ tât jêh ta Siklak, phung Amalek hŏ lăp lơh jêh nkual Nêgep jêh ri ƀon Siklak, rduh lăp su ƀon Siklak ma ŭnh.

² Khân păng nhŭp phung bu ur jêh ri lĕ rngôch phung gŭ tâm ƀon nây, phung jê̆ nđâp toyh. Khân păng mâu nkhĭt du huê ôh, ƀiălah nhŭp jêng bu nă jêh ri leo phung nây hăn.

³ Tơlah Y-Đavit jêh ri phung tĭng ndô̆ păng tât ta ƀon nây jêh ri saơ ƀon nây bu hŏ su ma ŭnh, phung ur jêh ri phung kon bu klâu, phung kon bu ur khân păng bu nhŭp jêng bu nă jêh.

⁴ Rnôk nây, Y-Đavit jêh ri phung tĭng ndô̆ păng nhhiăng nhĭm da dê; khân păng nhĭm kŏ tât mâu hôm dăng nhĭm đŏng ôh.

⁵ Bar hê ur Y-Đavit bu nhŭp ƀư bu nă tâm ban lĕ, jêng H'Ahinôam bơh Jesrêel, jêh ri H'Abigêl, ur drô Y-Nabal, bơh Karmel.

⁶ Y-Đavit geh nau rêh ni ngăn yorlah bu ŭch klŭp păng ma lŭ, yorlah nuih n'hâm lĕ rngôch phung ƀon lan rngot ngăn yor mĭn ma phung kon bu klâu jêh ri kon bu ur khân păng. Ƀiălah Y-Đavit geh nau ktang bơh Yêhôva Brah Ndu păng nơm.

⁷ Păng ngơi đah kôranh ƀư brah Y-Abiathar, kon Y-Ahimalek: “Ăn may djôt leo hom êphôt tât ma gâp.” Y-Abiathar djôt leo êphôt tât ma Y-Đavit.

⁸ Y-Đavit ôp ma Brah Yêhôva: “Gâp mra hăn tĭng phung tahan nây lĕ? Gâp mra tĭng ban lĕ khân păng?” Brah Yêhôva lah: “Hăn tĭng hom khân păng, nanê̆ ngăn may mra ban, jêh ri rklaih lĕ phung bu nhŭp.”

⁹ Y-Đavit ntơm dâk hăn ndrel ma prao rhiăng nuyh phung tĭng ndô̆ păng. Tơlah khân păng tât ta dak n'hor Bêsor, geh du rnoh bunuyh gŭ tay ta aơ.

¹⁰ Ƀiălah Y-Đavit ndrel ma puăn rhiăng nuyh ăt hăn tĭng lơh; bi bar rhiăng ri gŭ tay yorlah lĕ huăr ngăn, mâu dơi rgăn ôh n'hor dak Bêsor.

¹¹ Phung tĭng ndô̆ Y-Đavit tâm mâp đah du huê bu klâu Êjipt tâm mir, njŭn leo ro păng tât ma Y-Đavit. Bu ăn ma păng sa piăng let jêh ri nhêt dak;

¹² khân păng ăn ma păng du glo ƀănh play rvi kro jêh ri bar glo ƀănh play krăk ƀâu kro. Jêh păng sa, păng geh tay nau ktang, yorlah tâm pe năng pe nar păng mâu sông sa, mâu geh nhêt dak du ntil ndơ ôh.

¹³ Y-Đavit ôp: “Mbu n'hanh may gŭ jêh ri mbah tă may?” Păng plơ̆ lah: “Gâp jêng du huê bu klâu ndăm Êjipt, oh mon ma du huê Amalek. Kôranh gâp chalơi gâp tâm pe nar jêh yorlah gâp ji.

¹⁴ Hên hŏ lơh jêh ta Nêgep phung Chêrêthit, n'gor bri phung Yuđa, Nêgep phung Kalep, jêh ri hên lĕ su jêh ƀon Siklak.”

¹⁵ Y-Đavit ôp: “May dơi njŭn gâp trŭnh hăn ma phung nây lĕ?” Păng plơ̆ lah: “Ăn may sơm ton ma gâp ma amoh Brah Ndu may mâu mra nkhĭt gâp ôh, mâu lah jao gâp ma kôranh gâp, gâp mra leo may hăn trŭnh tât phung nây.”

¹⁶ Tơlah bunuyh Êjipt nây leo Y-Đavit hăn trŭnh, păng saơ phung Amalek hăn pru pra lam n'gor nây, sông sa jêh ri pâl ntalơ̆, yorlah khân păng dơi pit âk ngăn ndơ pit sŏk tă bơh tâm bri Philistin jêh ri tâm n'gor Yuđa.

¹⁷ Y-Đavit lơh nkhĭt khân păng ntơm bơh ƀhit ang ôi nar nây kŏ tât kêng măng nar ôi taơ. Knŏng phung ndăm puăn rhiăng nuyh ncho seh samô lĕ nchuăt du, ƀaƀă mâu geh du huê dơi klaih ôh.

¹⁸ Y-Đavit sŏk tay lĕ rngôch ndơ phung Amalek hŏ sŏk gro jêh, jêh ri tâm ban lĕ tâm rklaih bar hê ur păng nơm đŏng.

¹⁹ Păng djôt leo sĭt lĕ rngôch, mâu klen du huê nuyh, mâu lah jê̆ mâu lah toyh, bu ur mâu lah bu klâu, lĕ ndơ phung Amalek sŏk gro jêh, Y-Đavit sŏk sĭt lĕ rngôch.

²⁰ Păng sŏk đŏng lĕ ndrôk jêh ri biăp. Phung tahan Y-Đavit têk mpô mpa rong nây sĭt, jêh ri lah: “Aơ yơh ndơ Y-Đavit sŏk gro.”

²¹ Y-Đavit plơ̆ sĭt, tât ma phung bar rhiăng nuyh lĕ huăr jêh, mâu dơi tĭng păng, jêh ri hŏ chalơi ta dak n'hor Bêsor. Phung bar rhiăng nây chuă vơt Y-Đavit jêh ri phung tahan tĭng păng. Y-Đavit tât dăch jêh ri mbah jô̆ khâl ma khân păng.

²² Ƀiălah lĕ rngôch phung janh ƀai jêh ri mhĭk tâm phung tahan hăn tĭng ma Y-Đavit, jêh ri lah: “Yorlah khân păng mâu hăn ndrel ma he ôh, he mâu mra ăn ôh du ntil ndơ hŏ geh sŏk sĭt jêh, knŏng ăp nơm dơi njŭn sĭt ur păng jêh ri phung kon păng dơm. Khân păng njŭn leo khân păng hăn sĭt!”

²³ Ƀiălah Y-Đavit lah: “Hơi oh nâu, lơi ƀư pônây ôh ma ndô ndơ Brah Yêhôva hŏ ăn ma he! Păng mât mray he jêh ri jao jêh tâm ti he phung tahan hăn văch lơh jêh he.

²⁴ Pôri, mbu nơm ŭch iăt nau khân may ŭch mĭn lah nây? Kô̆ prăp ma phung hăn tâm lơh jêh ri kô̆ prăp ma phung mât mray ndô ndơ mra tâm ban dơm; khân păng mra tâm pă kô̆ du ai tâm ban.”

²⁵ Ntơm bơh nar nây, Y-Đavit njêng nau nây jêng du nau vay dăp jêh ri nau vay ƀư ma phung Israel kŏ tât ta nar aơ.

²⁶ Tơlah Y-Đavit sĭt tât ma Siklak, păng njuăl du kô̆ ndô ndơ sŏk gro ma phung bu ranh phung Yuđa, jêng phung mĭt jiăng păng, jêh ri lah: “Aơ jêng ndơ nhhơr ma khân may, tă bơh ndô ndơ sŏk gro bơh phung rlăng Brah Yêhôva.”

²⁷ Păng njuăl ma phung kôranh bu ranh gŭ tâm Bêthel, Ramôt Nêgep, Jatir,

²⁸ ma phung kôranh bu ranh gŭ Arôer, Sipmôt, Êstêmôa,

²⁹ ma phung kôranh bu ranh gŭ Rakal, lĕ ƀon phung Jêrahmêlit, jêh ri lĕ ƀon phung Kênit,

³⁰ ma phung kôranh bu ranh gŭ Hôrma, Bôr-Asan, Athach,

³¹ Hêbron jêh ri lĕ rngôch ntŭk Y-Đavit jêh ri phung tĭng ndô̆ păng hŏ hăn rgăn jêh.