I Pêtrôs 5 - Nau Brah Ndu Ngơi 2023

Nau kan ma phung biăp Kôranh Brah

¹ Gâp njuăl nau ntĭnh ma phung kôranh bu ranh tâm phung khân may, yorlah gâp ăt jêng du huê kôranh bu ranh, jêng nơm mbơh nau rêh ni Brah Krist, jêh ri ăt jêng nơm mra geh kô̆ tâm nau chrêk rmah bơi tâm mpơl.

² Chiăp hom phung biăp Brah Ndu jao jêh ma khân may, mâu di yor ma nau nchâp ôh, ƀiălah ŭch nđơr êng, mâu di yor ma drăp ndơ nkhôm mâu khlay ôh ƀiălah ma lĕ nuih n'hâm nđơr,

³ mâu dŏng nau dơi chiă uănh bu jao jêh ma khân may nơm, ƀiălah ƀư leo trong ueh ma phung biăp.

⁴ Jêh ri tơlah Nơm Rmăk Biăp dŭt prêh ta klơ tâm mpơl, khân may mra dơn đon hađăch nau chrêk rmah mâu blau rai ôh.

⁵ Tâm ban lĕ, phung druh ndăm tông hom ma phung kôranh bu ranh. Lĕ rngôch bunuyh nsoh hom nau dêh rhêt gay ƀư ueh ndrăng khân may; yorlah Brah Ndu tâm rdâng đah phung sưr, ƀiălah ăn nau yô̆ ma phung dêh rhêt.

⁶ Pôri, ntrŭnh hom păng nơm tâm dâng ti nau brah Brah Ndu, gay tât mông tâm di păng mra n'hao khân may klơ.

⁷ Jao hom lĕ nau rngot klâng khân may nơm ma Păng, yorlah Păng mât mray khân may ƀaƀơ.

⁸ Ăn gŭ di keh jêh ri gŭ rngeh njrăng; phung rlăng đah khân may jêng phung brah mhĭk, nâm bu yau mŭr ngrông, ndăch nsong jŭm khân may joi mbu nơm păng dơi sa hêk,

⁹ Gŭ nâp hom tâm nau chroh gay tâm rdâng đah păng, yorlah khân may gĭt jêh ma phung oh nâu geh ndrel nau rnơm tâm lam neh ntu dôl geh nau rêh ni tâm ban khân may nơm đŏng.

¹⁰ Jêh ri lah jêh khân may dơn nau rêh ni ƀât lât, Brah Ndu ma lĕ nau yô̆, Nơm kuăl jêh khân may tât nau chrêk rmah n'ho ro tă bơh Păng tâm Yêsu Krist, Păng nơm mra njêng tay, ƀư ktang, ndâk njêng jêh ri ăn nau dăng ktang ma khân may.

¹¹ Dăn ma nau dơi chiă uănh jêng tâm Păng n'ho ro tâm lĕ rngôch rnôk! Amen.

¹² Gâp đă Y-Silvan, nơm gâp uănh nâm bu oh nâu răp jăp ngăn, nchih bar pe rplay gay n'hao nuih n'hâm jêh ri mbơh nkoch ma khân may gĭt, aơ jêng nau yô̆ ngăn bơh Brah Ndu. Gŭ nâp hom tâm nau yô̆ nây.

¹³ Phung Ngih Brah Ndu ta ƀon Babilôn, jêng phung geh nau săch tâm ban ma khân may, njuăl nau mbah jô̆ khâl khân may; kon gâp jêng Y-Markôs tâm ban lĕ.

¹⁴ Sŏk hom nau chŭm tâm rŏng gay vơt ndrăng khân may. Dăn nau đăp mpăn gŭ ndrel ma lĕ rngôch khân may jêng phung gŭ tâm Brah Krist!