I Pêtrôs 4 - Nau Brah Ndu Ngơi 2023

Nau rêh geh nau rgâl

¹ Pôri, yorlah Brah Krist hŏ dơn jêh nau rêh ni tâm nglay săk, pôri khân may sŏk đŏng hom nau mĭn nây ƀư ndơ tâm lơ; yorlah mbu nơm dơn jêh nau rêh ni tâm nglay săk, păng mâu hôm ŭch ƀư nau tih,

² gay ma dôl hôm gŭ rêh tâm nglay săk, khân may mâu hôm gŭ rêh tĭng nâm nau bunuyh kơnh ŭch ôh, ƀiălah tĭng nâm Brah Ndu ŭch.

³ Nar kăl e, khân may mpŭng mông nar jêh gay ƀư lĕ nau phung bu năch ŭch ƀư, nâm bu gŭ rêh tâm nau blă blơ, nau kơnh mhĭk, nhŭl ndrănh, pâl rlưn rlau keh, nau nhêt sa rlau keh, nau mbah rup brah dŭt ƀơ̆ ƀơch.

⁴ Dôl saơ khân may mâu hôm râng lăp tâm nau blă blơ nây đŏng, ri mơ khân păng hih rhâl jêh ri ngơi mhĭk ma khân may.

⁵ Ƀiălah khân păng mra mbơh nkoch đah Nơm rơm ndrăp phat dôih ma phung rêh jêh ri phung khĭt.

⁶ Yor nau nây, Nau Mhe Mhan Ueh bu mbơh nkoch jêh ma phung khĭt, gay ma jêh phat dôih tĭng kon bunuyh tâm nglay săk, khân păng gŭ rêh tâm huêng tĭng nâm Brah Ndu.

Mât uănh lĕ nau dơi

⁷ Nau nglĕ dŭt lĕ rngôch ntil ndơ dăch tât jêh; pôri ăn khân may gĭt mĭn jêh ri di keh gay ma mbơh sơm.

⁸ Lor lơn, tâm rŏng hom ndrăng khân may dŭt hâu ngăn; yorlah nau rŏng nkŭm brôi âk râk nau tih.

⁹ Tâm rom hom ndrăng khân may, lơi ngơi ƀŭk dŭk suyh ôh.

¹⁰ Ăp nơm dŏng hom nau dơi he hŏ dơn jêh gay pah kan ndrăng khân may, nâm bu bunuyh mât uănh răp jăp blau dŏng nau yô̆ bơh Brah Ndu tâm âk trong êng êng.

¹¹ Tơlah geh nơm mbơh nkoch, mbơh nkoch hom tâm ban mbơh nau ngơi bơh Brah Ndu; tơlah geh nơm pah kan, pah kan hom ma nau ktang Brah Ndu ăn, gay tâm lĕ rngôch ndơ geh nau tâm rnê bơh Brah Yêsu Krist. Dăn nau chrêk rmah jêh ri nau brah jêng ndơ Păng n'ho ro tâm lĕ rngôch rnôk. Amen.

Dơn nau rêh ni yor Brah Krist

¹² Hơi phung gâp rŏng, tơlah ŭnh nau rlong uănh tât gay rlong uănh khân may, lơi dĭng hih rhâl nâm bu khân may nơm mâp du ntil nau êng ang.

¹³ Ƀiălah ndah âk khân may geh kô̆ tâm nau rêh ni ndrel ma Brah Krist, răm maak dŭm nây; gay ma tơlah nau chrêk rmah Păng tâm mpơl, khân may geh đŏng nau răm maak, nau hâk răm ngăn.

¹⁴ Tơlah bu suai rak khân may yor amoh Brah Krist, khân may geh ueh lăng ngăn, yorlah nau chrêk rmah Brah Huêng Ueh tă bơh Brah Ndu gŭ tâm khân may.

¹⁵ Lơi ăn du huê tâm phung khân may dơn nau rêh ni nâm bu nơm nkhĭt bunuyh, nơm ntŭng, nơm ƀư tih, mâu lah nơm lăp tâm kan bu êng ôh.

¹⁶ Ƀiălah, tơlah geh nơm dơn nau rêh ni yor ma păng jêng Phung Brah Krist, lơi đit prêng ôh; ƀiălah yor amoh nây, tâm rnê Brah Ndu.

¹⁷ Yorlah tâm rnôk phat dôih hŏ tât jêh, ntơm bơh ngih Brah Ndu; tơlah păng ntơm bơh phung he, moh mra jêng nau dăch dŭt ma phung mâu tông Nau Mhe Mhan Ueh Brah Ndu?

¹⁸ Jêh ri: “Tơlah bunuyh sŏng srăng hôm jêr gay geh nau tâm rklaih, Mâm mra jêng ma phung mâu klach yơk jêr ri phung geh nau tih?”

¹⁹ Pôri, phung dơn nau rêh ni tĭng nâm nau Brah Ndu ŭch, thoi đŏng ƀư nau ueh jêh ri jao huêng khân păng nơm ma Nơm Rhăk Njêng răp jăp.