I Nau Rêh Jêng 13 - Nau Brah Ndu Ngơi 2023

Y-Đavit djôt leo Hip Nau Tâm Rnglăp bơh Kiriat-Jêarim plơ̆ sĭt Yêrusalem

¹ Y-Đavit tâm chră ndrel ma phung kôranh du rbăn nuyh tahan jêh ri du rhiăng nuyh tahan, ndrel ma lĕ rngôch kôranh chiă uănh.

² Y-Đavit lah ma lĕ rngôch phung Israel tâm rƀŭn: “Tơlah khân may saơ nau aơ jêng ueh jêh ri tât jêh bơh Yêhôva Brah Ndu he, gâp mra prơh bunuyh văch ta ma phung oh nâu he hôm e tâm lam n'gor Israel, nđâp ma phung kôranh ƀư brah jêh ri phung Lêvi gŭ tâm lĕ ƀon geh ndrêch gơ̆ văr jŭm, gay jă ma khân păng văch tâm rƀŭn ndrel ma he.

³ Jêh nây he mra tung leo Hip Nau Tâm Rnglăp Brah Ndu he plơ̆ sĭt ma he, yorlah tâm rnôk Y-Sôl, he mâu hăn tât panăp Hip Nau Tâm Rnglăp gay ôp ma Brah Ndu.”

⁴ Lĕ rngôch phung tâm rƀŭn dơn nau ƀư pônây, yorlah lĕ rngôch phung ƀon lan saơ nau nây jêng di ngăn.

⁵ Y-Đavit tâm rƀŭn lĕ rngôch phung Israel, ntơm bơh Sihôr tâm n'gor bri Êjipt tât ma ntŭk lăp ƀon Hamat, gay tung leo Hip Nau Tâm Rnglăp Brah Ndu plơ̆ sĭt tă bơh Kiriat-Jêarim.

⁶ Y-Đavit jêh ri lĕ rngôch phung Israel hăn hao ma Baala, nâm bu ntĭt Kiriat-Jêarim tâm n'gor Yuđa, gay tung leo Hip Nau Tâm Rnglăp Brah Ndu plơ̆ sĭt, jêng Hip tuy amoh Brah Yêhôva, Nơm hôm gŭ ta nklang phung chêrubim.

⁷ Ntơm bơh ngih Y-Abinadap, khân păng rdeng Hip Nau Tâm Rnglăp Brah Ndu ta klơ ndeh ndrôk mhe; geh Y-Usa jêh ri Y-Ahiô ƀĭt bôk ndeh.

⁸ Y-Đavit jêh ri lĕ rngôch phung Israel hâk răm âk ngăn, pâl ntalơ̆ tanăp Brah Ndu ma nau mprơ, kreh gong rêng loih, gong rêng, gâr jê̆, ching ndrup tâm nchâm, jêh ri uh nŭng.

Y-Uxa khĭt. – Bu djôt leo Hip Nau Tâm Rnglăp tât ma ngih Y-Ôbet-Êđôm

⁹ Tơlah khân păng tât ta ntŭk bu mprah ba ta Kidôn, Y-Usa yơr ti kuăn gay ŭch rđâng Hip Nau Tâm Rnglăp, yorlah ndrôk chêh jâng.

¹⁰ Brah Yêhôva hao ji nuih ma Y-Usa jêh ri rmal păng, yorlah păng yơr ti kuăn ta Hip Nau Tâm Rnglăp. Yor ri, păng khĭt ta nây ro tanăp Brah Ndu.

¹¹ Y-Đavit nuih yorlah Brah Yêhôva rmal jêh ma Y-Usa; hađăch ntơ ntŭk nây jêng Pêres-Usa tât ma nar aơ.

¹² Nar nây, Y-Đavit klach ma Brah Ndu jêh ri păng lah: “Mâm gâp dơi njŭn leo Hip Nau Tâm Rnglăp Brah Ndu ma ngih gâp?”

¹³ Pôri, Y-Đavit mâu njŭn leo ôh Hip Nau Tâm Rnglăp plơ̆ sĭt ma ngih păng nơm tâm ƀon Đavit, ƀiălah njŭn leo Hip Nau Tâm Rnglăp lăp tâm ngih Y-Ôbet-Êđôm, bunuyh Gat.

¹⁴ Hip Nau Tâm Rnglăp Brah Ndu hôm e tâm ngih Y-Ôbet-Êđôm jêh ri rnăk vâl păng tâm pe khay; Brah Yêhôva ăn nau ueh uĭn ma ngih Y-Ôbet-Êđôm jêh ri ma lĕ rngôch ndơ jêng ndơ păng.