I Kôrintô 15 - Nau Brah Ndu Ngơi 2023

V. Nau dâk rêh tay ( 15:1-58 ) Nau dâk rêh tay Brah Krist

¹ Hơi phung oh nâu, gâp ŭch nkah khân may Nau Mhe Mhan Ueh gâp hŏ mbơh nkoch jêh ri khân may sŏk dơn jêh, tâm nau nây lĕ khân may gŭ nâp.

² Yor ma Nau Mhe Mhan Ueh nây, khân may geh nau klaih, tơlah khân may djôt prăp nau gâp mbơh nkoch; tơlah mâu di pônây, nau khân may chroh jêng dơm dam.

³ Gâp mbơh ma khân may nau dŭt khlay jêng nau gâp nơm sŏk dơn jêh, nây jêng Brah Krist khĭt jêh yor nau tih he tĭng nâm nau nchih jêh tâm Nau Brah Ndu Ngơi.

⁴ Bu tâp jêh Păng, tât nar rơh pe, Păng hŏ dâk rêh tay tĭng nâm nau nchih jêh tâm Nau Brah Ndu Ngơi;

⁵ jêh ri Păng tâm mpơl jêh ma Y-Sêphas, jêh nây ma phung jât ma bar kôranh oh mon.

⁶ Jêh ma nây, tâm du tơ̆, Păng tâm mpơl ma rlau prăm rhiăng nuyh phung oh nâu; âk tâm phung nây hôm rêh, ƀiălah ƀaƀă hŏ khĭt jêh.

⁷ Păng tâm mpơl đŏng ma Y-Yakơ, jêh ri ma lĕ rngôch phung kôranh oh mon.

⁸ Jêh ma nây, Păng tâm mpơl ma gâp nâm bu du huê kon bu deh mâu tŏng khay.

⁹ Yorlah gâp jêng dŭt jê̆ lê̆ tâm phung kôranh oh mon, mâu khư ôh bu kuăl gâp kôranh oh mon, yorlah gâp ƀư mhĭk jêh ma Phung Ngih Brah Ndu.

¹⁰ Ƀiălah yor ma nau yô̆ Brah Ndu gâp dơi jêng nâm bu nar aơ, jêh ri nau yô̆ Păng ăn ma gâp mâu di jêng dơm dam ôh. Ƀiălah, gâp pah kan âk lơn ma lĕ rngôch bunuyh êng; nau nây mâu di gâp, ƀiălah jêng nau yô̆ Brah Ndu gŭ ndrel ma gâp.

¹¹ Pônây yơh, nđâp tơlah gâp mâu lah phung kôranh oh mon, nau nây jêng nau hên mbơh nkoch jêh ri jêng nau khân may chroh jêh.

Nau phung khĭt dâk rêh tay

¹² Pôri, tơlah khân may hŏ tăng nau mbơh nkoch ma Brah Krist dâk rêh tay tă bơh nau khĭt, mâm ƀư geh ƀaƀă tâm phung khân may lah phung khĭt mâu geh nau dâk rêh tay?

¹³ Tơlah phung khĭt mâu dâk rêh tay, pôri Brah Krist mâu hôm dâk rêh tay ôh.

¹⁴ Jêh ri tơlah Brah Krist mâu hôm dâk rêh tay ôh, nau hên mbơh nkoch jêng mâu khlay, jêh ri nau khân may chroh jêng mâu khlay lĕ.

¹⁵ Tơlah nanê̆ ngăn phung khĭt mâu dâk rêh tay, pôri hên jêng phung mbơh nkoch tih ma nau Brah Ndu; yorlah hên mbơh nkoch ma nau Brah Ndu ƀư ăn Brah Yêsu dâk rêh tay, ƀiălah Păng mâu ƀư ăn ma Brah Krist dâk rêh tay.

¹⁶ Yorlah tơlah phung khĭt mâu hôm dâk rêh tay, Brah Krist mâu hôm dâk rêh tay ôh.

¹⁷ Jêh ri tơlah Brah Krist mâu hôm dâk rêh tay, nau chroh khân may jêng mâu khlay, jêh ri khân may ăt hôm gŭ tâm nau tih khân may yơh.

¹⁸ Pônây, phung khĭt jêh tâm Brah Krist jêng roh rai.

¹⁹ Tơlah he kâp gân tâm Brah Krist knŏng mĭn ma nau rêh aơ dơm, pôri tâm lĕ rngôch bunuyh, he jêng phung rêh ni lơn.

Brah Yêsu Krist, play bôk yan nau dâk rêh tay

²⁰ Ƀiălah aƀaơ, Brah Krist dâk rêh tay jêh tă bơh nau khĭt. Păng jêng play bôk yan ma phung khĭt jêh.

²¹ Yor tă bơh du huê bunuyh geh nau khĭt, tâm ban lĕ yor ma du huê bunuyh geh nau dâk rêh tay tă bơh nau khĭt.

²² Tâm ban ma Y-Ađam, lĕ rngôch khĭt da dê; tâm ban lĕ, tâm Brah Krist, lĕ rngôch bunuyh mra dâk rêh tay da dê.

²³ Ƀiălah ăp nơm tĭng dăp rep êng păng nơm: Brah Krist jêng play bôk yan; tât nar Brah Krist tâm mpơl, phung bunuyh jêng phung Păng mra dâk rêh tay.

²⁴ Rnôk nây mra tât nar lôch, jêng nôk Păng jao ƀon bri hađăch ma Brah Ndu jêng Mbơ̆, jêh Păng ƀư rai lĕ nau ktang chiă uănh, lĕ nau dơi, lĕ nau dăng ktang.

²⁵ Yorlah Păng chiă uănh, tât nôk Brah Ndu “dơm lĕ phung rlăng tâm dâng jâng Păng.”

²⁶ Nơm rlăng nglĕ dŭt Păng mra ƀư rai jêng nau khĭt.

²⁷ Yorlah Brah Ndu dơm jêh “lĕ rngôch ndơ gŭ tâm dâng jâng Brah Krist.” Ƀiălah dôl lah “lĕ rngôch mpa lăp tâm dâng jâng Brah Krist” ri mơ nau rah vah jêng mâu kơp ôh nđâp ma Nơm dơm lĕ rngôch ndơ tâm dâng jâng Păng.

²⁸ Tơlah lĕ rngôch mpa lăp Păng da dê jêh, dôl nây Kon Păng nơm lĕ mra lăp Nơm hŏ nglăp ma Păng lĕ rngôch mpa, gay ma Brah Ndu ƀư lĕ ntil ndơ tâm lĕ rngôch bunuyh.

²⁹ Tơlah mâu di pônây, moh nau kâp gân phung bunuyh dơn nau ƀaptem ntrok an ma phung khĭt? Tơlah phung khĭt mâu hôm dâk rêh tay ôh, mâm ƀư bu dơn ƀaptem ntrok an ma khân păng?

³⁰ Mâm ƀư hên mâp nau djơh mhĭk tâm ăp mông?

³¹ Hơi oh nâu, ăp nar gâp gŭ dăch nau khĭt. Gâp ngơi kơt nây yor nau rnê êng gâp ma khân may tâm Brah Yêsu Krist, Kôranh Brah he.

³² Ngơi tĭng nau kon bunuyh, moh nau khlay ma gâp geh tơlah gâp tâm lơh đah phung mpa bri janh ta ƀon Êphêsô? Tơlah phung khĭt mâu hôm dâk rêh tay, pôri he “Sông sa hom, nhêt hom, Yorlah nar ôi taơ he mra khĭt!”

³³ Lơi ăn bu ndơm khân may nơm: “Mĭt jiăng mhĭk ƀư rai nau knuih ueh.”

³⁴ Ăn rgâl nuih n'hâm jêh ri lơi ƀư tih ôh, yorlah ƀaƀă tâm phung khân may mâu gĭt năl Brah Ndu ôh. Gâp lah kơt nây gay ƀư bêk khân may.

Săk jăn dâk rêh tay

³⁵ Ƀiălah geh bunuyh mra lah: “Mâm nau phung khĭt dơi dâk rêh tay? Moh ntil săk jăn khân păng plơ̆ tay?”

³⁶ Hơi bunuyh rluk! Moh ndơ may tuch, tơlah lor lơn mâu khĭt, păng mâu mra dơi dâk rêh tay ôh.

³⁷ Bi ndơ may tuch nây, mâu di jêng săk păng mra chăt hon, ƀiălah nơih jêng du mlâm găr dơm, nâm bu găr ba ƀlê mâu lah ƀaƀă ntil găr êng.

³⁸ Brah Ndu ăn ma găr ntil ăn geh săk tĭng nâm Păng ŭch, ăp ntil găr geh săk êng êng.

³⁹ Mâu di lĕ rngôch nglay săk tâm ban da dê, nglay săk kon bunuyh êng, nglay săk mpô mpa êng, phung sĭm êng, ka êng.

⁴⁰ Geh lĕ săk jăn jêng ndơ trôk jêh ri săk jăn jêng ndơ ta neh ntu; ƀiălah nau chrêk rmah lĕ săk jăn jêng ndơ trôk êng đah nau chrêk rmah lĕ săk jăn jêng ndơ neh ntu.

⁴¹ Nau chrêk rmah nar êng; nau chrêk rmah khay êng; nau chrêk rmah phung mănh mbing êng; nau chrêk rmah mănh mbing aơ êng lĕ đah nau chrêk rmah mănh mbing ri.

⁴² Nau dâk rêh tay tă bơh phung khĭt tâm ban đŏng. Săk jăn bu tuch jêng blau ôm rai, ƀiălah dâk rêh tay jêng mâu blau ôm rai ôh;

⁴³ bu tuch jêng bêk prêng, ƀiălah dâk rêh tay jêng chrêk rmah; bu tuch jêng rdja, ƀiălah dâk rêh tay jêng ktang;

⁴⁴ bu tuch jêng săk jăn geh nau rêh, ƀiălah dâk rêh tay jêng săk jăn nau rêh huêng. Tơlah geh săk jăn geh nau rêh, geh đŏng săk jăn nau rêh huêng.

⁴⁵ Nâm bu geh nau nchih: “Bunuyh lor lơn jêng Y-Ađam, hŏ plơ̆ jêng bunuyh rêh,” ƀiălah Y-Ađam nglĕ dŭt jêng brah ăn ma nau rêh.

⁴⁶ Mâu di kon bunuyh rêh huêng văch lor, ƀiălah kon bunuyh đah nglay săk; pakơi nây jêng kon bunuyh rêh huêng.

⁴⁷ Bunuyh lor lơn luh tă bơh neh jêng ndơ neh ntu; bunuyh rơh bar luh tă bơh trôk.

⁴⁸ Phung bunuyh jêng phung tâm neh tâm ban ma phung bunuyh luh tă bơh neh; phung bunuyh jêng phung trôk tâm ban ma Nơm luh tă bơh trôk.

⁴⁹ Nâm bu he djôt jêh rup bunuyh tă bơh neh, he mra djôt tâm ban lĕ rup Nơm tă bơh trôk.

Nau rgâl săk jăn jêh ri nau dơi nglĕ dŭt

⁵⁰ Hơi phung oh nâu, gâp lah, nglay săk jêh ri mham mâu dơi dơn ƀon bri hađăch Brah Ndu ôh; nau ôm rai mâu lĕ dơi dơn nau mâu blau ôm rai.

⁵¹ Aơ, gâp mbơh nau khlay nđâp: He mâu mra khĭt lĕ rngôch ôh, ƀiălah lĕ rngôch he mra rgâl

⁵² tâm ƀât lât, nâm bu mƀrêh măt, tâm mông bu uh nŭng nglĕ dŭt. Yorlah nŭng mra uh, phung khĭt mra dâk rêh tay, mâu hôm blau ôm rai ôh, jêh ri he mra dơi rgâl săk jăn.

⁵³ Yorlah săk jăn blau ôm rai aơ mra nsoh nau mâu blau ôm; săk jăn blau khĭt nây mra nsoh nau mâu blau khĭt.

⁵⁴ Tơlah săk jăn blau ôm rai mra nsoh nau mâu blau ôm rai, săk jăn blau khĭt aơ nsoh ndơ mâu blau khĭt, ri mơ nôk nây mra tât di ngăn nau nchih jêh: “Nau dơi rvăn jêh nau khĭt.”

⁵⁵ “Hơi nau khĭt, mbah ntŭk nau dơi may? Hơi nau khĭt, mbah ntŭk mpôch may?”

⁵⁶ Mpôch ma nau khĭt jêng nau tih, nau ktang ma nau tih jêng nau vay.

⁵⁷ Ƀiălah lah ueh ma Brah Ndu ăn ma he nau dơi tă bơh Kôranh Brah he jêng Brah Yêsu Krist.

⁵⁸ Pôri, hơi phung oh nâu gâp rŏng ngăn ngên, gŭ nâp hom, lơi mpât n'gơ, ƀư hom âk rmeh nau kan ma Kôranh Brah, dôl khân may gĭt kan khân may pah mâu mra jêng dơm dam ôh tâm Kôranh Brah.