I Kôrintô 14 - Nau Brah Ndu Ngơi 2023

Nau yô̆ ngơi nau bu năch jêh ri ngơi nau mbơh lor

¹ Tĭng joi hom nau rŏng. Ŭch hom lĕ nau yô̆ tâm nau rêh huêng, ƀiălah khlay lơn ma nau mbơh lor.

² Yorlah bunuyh ngơi nau bu năch mâu ngơi đah kon bunuyh ôh, ƀiălah ngơi đah Brah Ndu; pôri mâu geh nơm gĭt rbăng ôh, yor ri păng ngơi lĕ nau khlay ndâp tâm Brah Huêng Ueh.

³ Ƀiălah bunuyh ngơi nau mbơh lor, păng ngơi đah kon bunuyh gay ndâk njêng, tâm n'hao nuih jêh ri bonh leng.

⁴ Mbu nơm ngơi nau bu năch ndâk njêng êng păng nơm, ƀiălah bunuyh ngơi nau mbơh lor ndâk njêng Phung Ngih Brah Ndu.

⁵ Gâp ŭch ma lĕ rngôch khân may ngơi nau bu năch da dê, ƀiălah lơ hô ŭch lơn ăn khân may ngơi nau mbơh lor. Bunuyh ngơi nau mbơh lor jêng toyh lơn ma bunuyh ngơi nau bu năch, knŏng tơlah geh nơm gĭt rblang gay ma Phung Ngih Brah Ndu geh nau ndâk njêng.

⁶ Hơi phung oh nâu, tơlah gâp hăn ma khân may, ngơi lĕ nau bu năch, jêh ri tơlah nau gâp ngơi mâu geh tâm mpơl, mâu geh nau gĭt rbăng, mâu geh nau mbơh lor, mâu geh ntĭm nti, moh nau gâp jêng khlay ma khân may?

⁷ Nđâp lah lĕ gong rêng mâu geh n'hâm rêh ôh, tâm ban ma n'hôm mâu lah kreh gong rêng, tơlah mâu geh nteh rah vah, mâm ƀư gĭt năl ma bâr n'hôm mâu lah gong rêng?

⁸ Tơlah bâr nŭng mâu rah vah ôh, mbu nơm mra ndrăp tâm lơh?

⁹ Khân may tâm ban lĕ, tơlah mpiăt mâu ngơi lĕ nau gĭt rbăng, mâm bu dơi rbăng nau khân may ngơi? Yorlah khân may knŏng ngơi lă lêng.

¹⁰ Tâm neh ntu nây geh âk nau ngơi, ăp nau ngơi geh nau rblang da dê.

¹¹ Lah ndrĭ, tơlah gâp mâu gĭt rbăng rblang nau ngơi nây, pôri bunuyh ngơi nau nây mra uănh gâp jêng du huê bu năch, jêh ri gâp uănh đŏng khân păng jêng du huê bu năch.

¹² Khân may tâm ban lĕ, yorlah ŭch tâm nau rêh huêng, khân may joi hom gay ma geh âk rmeh lĕ nau dơi ăn, gay ma ndâk njêng Phung Ngih Brah Ndu.

¹³ Yor nây, mbu nơm ngơi nau bu năch, mbơh sơm hom gay ma gĭt rblang nau ngơi nây.

¹⁴ Yorlah tơlah gâp mbơh sơm ma nau ngơi êng, huêng nuih n'hâm gâp gŭ mbơh sơm, ƀiălah nau mĭn gâp mâu dơn play kao ôh.

¹⁵ Lah ndrĭ moh gâp mra ƀư? Gâp mra mbơh sơm tâm nuih n'hâm, ƀiălah mbơh sơm ma nau mĭn lĕ; gâp mra mprơ ma nuih n'hâm, ƀiălah mprơ đŏng ma nau mĭn.

¹⁶ Mâu lah, tơlah may tâm rnê ma huêng mâm ƀư phung bunuyh vay gŭ iăt dơi ngơi: “Amen” ma nau may lah ueh, tơlah khân păng mâu gĭt rbăng nau may ngơi?

¹⁷ Nđâp tơlah nau may lah ueh hâu ngăn, ƀiălah mâu ndâk njêng ma bunuyh êng.

¹⁸ Tâm rnê lah ueh ma Brah Ndu, gâp dơi ngơi lĕ nau ngơi êng âk lơn ma lĕ rngôch khân may.

¹⁹ Nđâp lah kơt nĕ, tâm Phung Ngih Brah Ndu, ueh lơn gâp ngơi prăm rplay ma nau mĭn gay ma ntĭm nti phung êng, rlau lơn ma jât rbăn rplay ma nau ngơi êng.

²⁰ Hơi phung oh nâu, ma nau gĭt rbăng, lơi jêng nâm bu kon se ôh; ƀiălah ma nau mhĭk, ăn jêng nâm bu kon se. Ma nau gĭt rbăng, ăn jêng nâm bu bunuyh văch ma toyh.

²¹ Tâm nau vay geh nau nchih: “Kôranh Brah lah: Gâp mra lah ma phung ƀon lan aơ bơh phung bunuyh ngơi nau êng, Jêh ri ma trôm mbung phung bu năch; nđâp lah pônây, khân păng mâu mra iăt Gâp.”

²² Pôri, lĕ nau ngơi êng mâu di jêng nau mbên ma phung chroh, ƀiălah ma phung mâu chroh yơh; ƀiălah nau mbơh lor mâu di nau mbên ma phung mâu chroh ôh, ƀiălah ma phung chroh.

²³ Pôri, tơlah lĕ Phung Ngih Brah Ndu tâm rƀŭn, lĕ rngôch ngơi nau bu năch, ƀiălah geh phung ê nti jêh ri phung ê hŏ chroh hăn lăp, mâm ƀư khân păng mâu lah khân may jêng brŭt rluk?

²⁴ Ƀiălah tơlah lĕ rngôch ngơi nau mbơh lor da dê, ƀiălah geh bunuyh mâu chroh jêh ri bunuyh ê nti hăn lăp, pôri khân păng mra geh nau nsŭk nsôr jêh ri nau phat dôih tă bơh lĕ rngôch nau mbơh lor.

²⁵ Lĕ nau pôn ndâp tâm nuih n'hâm khân păng mra tâm mpơl; khân păng mra chon mon yơk mbah ma Brah Ndu, jêh ri mbơh pô aơ: Brah Ndu dôl gŭ ndrel ma khân may ngăn ngên.

Nau vay tâm nôk gŭ rƀŭn

²⁶ Hơi phung oh nâu, mâm mra ƀư? Tơlah khân may tâm rƀŭn, bunuyh geh nau mprơ kloh ueh, bunuyh geh nau ntĭm nti, bunuyh geh nau tâm mpơl, bunuyh geh nau ngơi bu năch, bunuyh geh nau gĭt rblang. Ƀư hom lĕ rngôch gay ma ndâk njêng Phung Ngih Brah Ndu.

²⁷ Tơlah geh bunuyh ngơi nau bu năch, ăn geh knŏng bar mâu lah pe nuyh ngơi. Ăp nơm ngơi tâm groi lor nglĕ, jêh ri ăn geh bunuyh gĭt rblang.

²⁸ Lah mâu geh nơm gĭt rblang, ăn bunuyh ngơi gŭ rklăk tâm Phung Ngih Brah Ndu, knŏng ngơi ma păng nơm jêh ri ma Brah Ndu.

²⁹ Knŏng geh đŏng bar mâu lah pe nuyh ngơi nau mbơh lor dơm, bi phung êng sek uănh nau khân păng ngơi.

³⁰ Ƀiălah tơlah geh bunuyh gŭ ta nây geh nau tâm mpơl, pôri bunuyh dôl ngơi ăn gŭ rklăk.

³¹ Yorlah ăp nơm tâm khân may ăn ngơi nau mbơh lor lôch du huê dĭng du huê, gay ma lĕ rngôch geh nau nti jêh ri n'hao nuih.

³² Nuih n'hâm phung nơm mbơh lor tông ma phung nơm mbơh lor.

³³ Yorlah Brah Ndu mâu di jêng Brah Ndu nau uh ah ôh, ƀiălah nau đăp mpăn. Tâm ban ma lĕ Phung Ngih Brah Ndu phung kloh ueh,

³⁴ ăn phung bu ur djôt prăp nau gŭ rklăk tâm Phung Ngih Brah Ndu. Khân păng mâu dơi vay ngơi ôh, ƀiălah ăn khân păng tông tâm ban nau vay hŏ nti jêh.

³⁵ Tơlah ŭch gĭt du ntil nau, ăn khân păng ôp sai khân păng ta ngih; yorlah bu ur ngơi ta nklang Phung Ngih Brah Ndu jêng nau khư bêk prêng.

³⁶ Di lĕ nau Brah Ndu ngơi luh tă bơh ngih khân ay may, mâu lah knŏng văch tât êng ma phung khân ay may dơm?

³⁷ Tơlah du huê mĭn păng nơm jêng nơm mbơh lor, mâu lah geh lĕ nau brah ăn ma nau rêh huêng, ăn bunuyh nây gĭt năl ma lĕ nau gâp nchih ma khân ay may, jêng du nau ntăm tă bơh Kôranh Brah.

³⁸ Tơlah mbu nơm uănh mâu khlay nau nây, lơi rom khân păng ôh.

³⁹ Yor nây, hơi phung oh nâu, ŭch hom ma nau yô̆ ngơi nau mbơh lor, jêh ri lơi ta buay bu ngơi lĕ nau ngơi bu năch ôh.

⁴⁰ Ƀiălah ăn ƀư lĕ ntil ndơ tâm di jêh ri ma nau di.