II Nau Rêh Jêng 7 - Nau Brah Ndu Ngơi 2023

Nau rƀŭn nhhơr ngih brah

¹ Tơlah Y-Salômôn mbơh sơm lôch jêh, ŭnh tă bơh trôk su ndơ ƀư brah gŭch jêh ri mpa ƀư brah. Nau chrêk rmah Brah Yêhôva bêng ngih brah.

² Phung kôranh ƀư brah mâu dơi lăp tâm ngih Brah Yêhôva, yor nau chrêk rmah Brah Yêhôva bêng ler ngih brah Păng.

³ Lĕ rngôch phung ƀon lan Israel saơ da dê ŭnh tă klơ jêh ri nau chrêk rmah Brah Yêhôva bêng ngih brah. Khân păng păn ta neh, nkŭp muh măt ta klơ mbon ngih, yơk mbah jêh ri tâm rnê ma Brah Yêhôva pô aơ: “Yorlah Kôranh Brah jêng ueh, Nuih n'hâm ueh Păng hôm gŭ ƀaƀơ n'ho ro!”

⁴ Nôk nây, hađăch jêh ri lĕ rngôch phung ƀon lan nhhơr mpa ƀư brah panăp Brah Yêhôva.

⁵ Hađăch Salômôn nhhơr bar rmưn bar rbăn mlâm ndrôk jêh ri du rsen bar rmưn biăp nkuăng. Pônây, hađăch jêh ri lĕ rngôch phung ƀon lan ƀư nau rƀŭn nhhơr ngih brah ma Brah Ndu.

⁶ Phung kôranh ƀư brah gŭ dâk tâm ntŭk khân păng. Bi phung Lêvi djôt gong dŏng ma Brah Yêhôva, jêng ndơ hađăch Đavit hŏ ƀư jêh gay tâm rnê ma Brah Yêhôva, ăp tơ̆ Y-Đavit ntĭnh ma khân păng tâm rnê: “Yorlah nuih n'hâm ueh Păng hôm ƀaƀơ n'ho ro!” Phung kôranh ƀư brah uh nŭng tanăp măt khân păng, jêh ri lĕ rngôch phung Israel gŭ dâk.

⁷ Y-Salômôn prăp êng du ntŭk kloh tâm nklang nhuang panăp ngih Brah Yêhôva, jêng ntŭk hađăch nhhơr ndơ ƀư brah gŭch jêh ri ngi ma ndơ ƀư brah ma nau đăp mpăn, yorlah nơng ƀư brah ma kông Y-Salômôn ƀư jêh, mâu dơi tŏng ntŭk ăn ndơ ƀư brah gŭch, ndơ ƀư brah rnih môi jêh ri ngi.

⁸ Dôl nôk nây, Y-Salômôn nkra nau rƀŭn tâm pơh nar. Râng nau rƀŭn nđâp ma hađăch jêh ri lĕ rngôch phung ƀon lan Israel, du phung tâm rƀŭn dŭt âk râk ntơm bơh n'har ƀon Hamat ma tât n'hor dak Êjipt.

⁹ Tâm nar rơh pham, geh nkra du nau tâm rƀŭn rgum bêng ma nau khư yơk, yorlah khân păng râng rƀŭn nhhơr nơng ƀư brah tâm pơh nar jêh ri răm maak nau rƀŭn tâm pơh nar lĕ.

¹⁰ Nar bar jât ma pe khay pơh, păng ăn phung ƀon lan hăn sĭt rlet ngih vâl khân păng nơm. Nuih n'hâm lĕ rngôch bunuyh răm maak jêh ri hâk răm ngăn yor lĕ nau ueh Brah Yêhôva hŏ ƀư jêh ma Y-Đavit, ma Y-Salômôn jêh ri ma phung ƀon lan Israel Păng.

¹¹ Pônây, Y-Salômôn ƀư lôch jêh nau ndâk ngih ma Brah Yêhôva jêh ri ngih hađăch. Lĕ rngôch nau kan ndâk Y-Salômôn ŭch ƀư tâm ngih brah Brah Yêhôva jêh ri tâm ngih hađăch ƀư lôch da dê jêh.

Brah Ndu tâm mpơl tơ̆ rơh bar ma Y-Salômôn

¹² Dôl măng, Brah Yêhôva tâm mpơl ma Y-Salômôn jêh ri lah pô aơ: “Gâp hŏ tăng jêh nau may mbơh sơm jêh ri hŏ săch jêh ntŭk aơ ƀư du mlâm ngih nhhơr mpa ƀư brah.

¹³ Tơlah Gâp nchăng lĕ ndâr trôk, mâu ăn tŭp mih; nôk Gâp ntăm ma krah ndrach ƀư rai ndơ tuch tăm; jêh ri nôk Gâp njuăl nau ji kuet tâm phung ƀon lan Gâp;

¹⁴ tơlah phung ƀon lan Gâp, jêng phung ƀon lan dơi kuăl ma amoh Gâp, dêh rhêt êng khân păng nơm, mbơh sơm, joi muh măt Gâp jêh ri chalơi trong djơh mhĭk, nôk nây tă bơh klơ trôk Gâp mra rkêng tôr iăt, yô̆ an nau tih khân păng jêh ri ƀư bah n'gor bri khân păng.

¹⁵ Aƀaơ ri, măt Gâp mra uănh treng, tôr Gâp mra rkêng iăt ma nau bu mbơh sơm tâm ntŭk aơ,

¹⁶ yorlah aƀaơ aơ Gâp hŏ săch jêh ri ƀư kloh ueh ma ngih brah aơ gay ma amoh Gâp gŭ ta nây n'ho ro; măt jêh ri nuih n'hâm Gâp mra gŭ ta nây n'ho ro.

¹⁷ Bi may, tơlah may chuat hăn panăp Gâp nâm bu mbơ̆ may jêng Y-Đavit hŏ chuat hăn jêh, ƀư di tĭng lĕ rngôch nau Gâp ntăm jêh ma may, djôt prăp lĕ nau vay dăp jêh ri lĕ nau vay ƀư bơh Gâp,

¹⁸ pôri Gâp mra ƀư ma sưng hađăch may dơi nâp nâm bu nau tâm rnglăp Gâp ƀư jêh đah Y-Đavit, mbơ̆ may pô aơ: ‘May mâu mra pưt ôh bunuyh chiă uănh phung Israel.’

¹⁹ Ƀiălah tơlah khân may teng trong êng jêh ri chalơi lĕ nau vay dăp jêh ri lĕ nau vay ntăm bơh Gâp hŏ n'gân jêh panăp khân may, hăn tĭng phung brah êng jêh ri yơk mbah ma khân păng,

²⁰ nôk nây Gâp mra rôk lơi khân may luh du bơh bri Gâp hŏ ăn jêh ma khân may. Bi ma ngih brah Gâp hŏ ƀư kloh ueh ma amoh Gâp, Gâp mra mƀăr lơi păng bơh Gâp, jêh ri mra ăn păng jêng du bôk nau mprĭng ma lĕ rngôch phung ƀon lan ngơi hôr juar jêh ri gơm mpray.

²¹ Nđâp lah ngih brah aơ toyh ueh ngăn ngên, ƀiălah nôk lĕ rngôch bunuyh hăn rgăn păng ăt bu mra hih rhâl jêh ri ôp pô aơ: ‘Mâm dĭng Brah Yêhôva hŏ ƀư jêh ăn ma n'gor bri aơ jêh ri ma ngih aơ kơt nây?’

²² Bu mra plơ̆ lah pô aơ: ‘Nây jêng yorlah khân păng chalơi jêh Yêhôva Brah Ndu phung chô yau khân păng, jêng Nơm hŏ njŭn leo khân păng du luh bơh Êjipt; jêh ri yor khân păng tĭng ndô̆ phung brah êng, chon mbah jêh ri pah kan ma phung brah êng, pôri Păng ăn tât lĕ nau mhĭk aơ ma khân păng.’”