II Nau Rêh Jêng 35 - Nau Brah Ndu Ngơi 2023

Y-Jôsia djôt prăp rƀŭn Nau Găn

¹ Y-Jôsia djôt prăp rƀŭn Nau Găn ma Brah Yêhôva ta ƀon Yêrusalem. Bu nkhĭt mpa ƀư brah ƀư rƀŭn Nau Găn ta nar jât ma puăn tâm khay nguay.

² Păng tâm pă kan ma phung kôranh ƀư brah jêh ri n'hao nuih khân păng pah kan ngih Brah Yêhôva.

³ Păng lah ma phung Lêvi dôl nti ma lĕ rngôch phung Israel jêh ri phung kloh ueh hŏ prăp êng jêh ma Brah Yêhôva: “Ăn hom Hip Nau Tâm Rnglăp Kloh ta ngih brah, Y-Salômôn kon bu klâu Y-Đavit, hađăch Israel, hŏ ndâk jêh. Khân may mâu hôm ŭch tung ôh Hip Nau Tâm Rnglăp klơ săng nglik khân may. Aƀaơ ri, pah kan hom ma Yêhôva Brah Ndu khân may jêh ri kơl kan ăn phung Israel jêng phung ƀon lan Păng.

⁴ Ndrăp hom khân may nơm tĭng nâm noi deh jêh ri tĭng nâm mpôl khân may, tĭng kơt nau Y-Đavit, hađăch Israel ntĭnh, jêh ri kon bu klâu păng Y-Salômôn.

⁵ Pôri dâk hom tâm ntŭk kloh ueh tĭng groi noi deh oh nâu khân may jêng ƀon lan Israel, jêh ri tĭng groi noi deh phung Lêvi.

⁶ Phung khân may nkhĭt hom mpa ƀư brah ƀư rƀŭn Nau Găn, prăp êng khân may nơm ma nau kloh ueh jêh ri nkra rƀŭn Nau Găn ăn ma phung oh nâu khân may, gay ƀư ăn di nâm bu nau ngơi Brah Yêhôva hŏ dŏng bâr mbung Y-Môis mbơh.”

⁷ Y-Jôsia nhŭp tâm phung mpô mpa păng nơm, rnoh geh pe rmưn kon biăp, jêh ri kon be, nđâp pe rbăn ndrôk nkuăng ăn ma phung ƀon lan dŏng tâm nar rƀŭn Nau Găn ăn ma lĕ phung geh măt râng ta nây; lĕ rngôch mpô mpa nây jêng ndơ hađăch

⁸ Lĕ phung kôranh ăt tâm ban lĕ du ai ăn mpô mpa ma phung ƀon lan, ăn ma phung kôranh ƀư brah jêh ri phung Lêvi. Y-Hilkia, Y-Sakari, jêh ri Y-Jêhiêl, jêng phung mât uănh ngih brah Brah Ndu, ăn phung kôranh ƀư brah, bar rbăn prao rhiăng mlâm biăp jêh ri pe rhiăng mlâm ndrôk gay dŏng tâm rƀŭn Nau Găn.

⁹ Y-Kênania jêh ri phung oh nâu păng jêng Y-Sêmaya jêh ri Y-Nêthanel, nđâp ma Y-Hasabia, Y-Jêiêl, jêh ri Y-Jôsaƀat jêng phung kôranh chiă uănh ma phung Lêvi, ăn ma phung Lêvi ndơ nhhơr prăp ma rƀŭn Nau Găn prăm rbăn mlâm biăp kon jêh ri be kon, jêh ri prăm rhiăng mlâm ndrôk nkuăng.

¹⁰ Lah lĕ kan hŏ ndrăp jêh, phung kôranh ƀư brah gŭ dâk ta ntŭk khân păng nơm, jêh ri phung Lêvi tĭng mpôl khân păng pah kan, di nâm bu nau hađăch ntăm.

¹¹ Phung Lêvi nkhĭt mpa ƀư brah gay ƀư rƀŭn Nau Găn, jêh ri phung kôranh ƀư brah sŏk dơn mham tă bơh ti khân păng djôt nsrih mham nây, bi phung Lêvi doh n'huk ntâu mpa ƀư brah nây.

¹² Khân păng tâm pă lĕ ndơ ƀư brah gŭch, ma phung ƀon lan, groi tĭng noi deh khân păng, gay khân păng nhhơr ma Brah Yêhôva, di tĭng nâm nau bu nchih jêh tâm ndrom samƀŭt Y-Môis. Khân păng ƀư tâm ban pônây lĕ ma ndrôk nkuăng.

¹³ Khân păng gŭch puăch mpa ƀư brah ƀư rƀŭn Nau Găn tĭng nâm nau vay dăp, bi ma mpa nhhơr kloh ueh khân păng gâm tâm glah, glah ƀŭng, jêh ri tâm glah thaih, jêh nây leo gơnh ndơ nây tâm pă ăn ma phung ƀon lan.

¹⁴ Jêh nau nây, khân păng ndrăp nkra ma khân păng nơm jêh ri ma phung kôranh ƀư brah, yorlah lĕ rngôch phung kôranh ƀư brah, jêng kon sau Y-Arôn, gŭ pah kan nhhơr ndơ ƀư brah gŭch da dê jêh ri ngi kŏ tât măng. Yor nây, phung Lêvi ndrăp ma khân păng nơm jêh ri ma phung kôranh ƀư brah, jêng kon sau Y-Arôn.

¹⁵ Phung mprơ jêng kon sau Y-Asap, gŭ ta ntŭk khân păng nơm da dê, tĭng nâm nau vay Y-Đavit, Y-Asap, Y-Hêman, jêh ri Y-Jêduthun nơm tâm saơ ma hađăch, hŏ ntăm. Phung chiă mpông pêr gŭ ta ăp mpông, mâu ŭch trơn ôh bơh kan khân păng, yorlah oh nâu khân păng jêng phung Lêvi, ndrăp nkra ndơ dŏng ăn khân păng.

¹⁶ Pôri nar nây, tĭng nau ntrŭnh bơh Y-Jôsia, lĕ rngôch nau kan bu hŏ nkra jêh ma nau yơk mbah Brah Yêhôva tâm rƀŭn Nau Găn, jêh ri nhhơr lĕ ndơ ƀư brah gŭch ta klơ nơng ƀư brah Brah Yêhôva.

¹⁷ Tâm nar nây, phung ƀon lan Israel tât ta nây, kah gĭt rƀŭn Nau Găn da dê jêh ri rƀŭn Piăng Let Mâu Geh Ndrui tâm pơh nar.

¹⁸ Ntơm bơh rnôk nơm mbơh lor Y-Samuel tât aƀaơ, tâm bri Israel, mâu mâp ôh geh ƀư rƀŭn Nau Găn tâm ban pônây, ăt mâu geh lĕ du huê hađăch Israel mâp djôt prăp rƀŭn Nau Găn nâm bu Y-Jôsia, ndrel phung kôranh ƀư brah, phung Lêvi, lĕ rngôch phung Yuđa, jêh ri phung Israel geh măt râng ta ƀon Yêrusalem, hŏ kah gĭt.

¹⁹ Bu kah gĭt yơk ma rƀŭn Nau Găn aơ tâm năm rơh jât ma pham rnôk rô̆ Y-Jôsia chiă uănh.

Nau Y-Jôsia khĭt

²⁰ Lah Y-Jôsia hŏ lôch jêh nau kan ndâk njêng tay nau yơk mbah ta ngih brah geh Y-Nêkô hađăch Êjipt, djôt tahan hăn hao ŭch lơh ta ƀon Karkêmis ta kơh dak krong Ơphrat. Y-Jôsia leo phung tahan tât tâm rdâng đah păng.

²¹ Nêkô njuăl phung mbơh tât ngơi đah Y-Jôsia: “Ơ hađăch Yuđa, moh nau geh ndrăng he? Nar aơ gâp mâu văch tâm lơh đah may ôh, ƀiălah tâm lơh đah phung rlăng gâp. Brah Ndu ntĭnh jêh ma gâp ăn ƀư gơnh nau aơ. Pôri, lơi tâm rdâng đah Brah Ndu ôh, jêng Nơm gŭ ndrel gâp, klach lah Păng ƀư rai may.”

²² Ƀiălah Y-Jôsia mâu ŭch rŭch tahan ôh. Păng mâu ŭch iăt ôh nau Brah Ndu ngơi bơh bâr mbung Y-Nêkô, ƀiălah lơ hâu nsoh nkrơ̆ ƀư bu êng ŭch tâm lơh đah păng tâm rlŭng Mêgidô.

²³ Phung Êjipt pănh na geh pănh di hađăch Jôsia, jêh ri hađăch lah ma phung oh mon păng: “Chông leo hom gâp ma ntŭk aơ, yorlah gâp rmanh jru ngăn.”

²⁴ Phung oh mon păng chông păng bơh ndeh seh păng jêh ri rdeng păng tâm ndeh seh êng, jêh ri njŭn păng leo sĭt ma ƀon Yêrusalem. Păng khĭt, bu tâp păng tâm môch ndrel phung che păng. Lĕ rngôch phung Yuđa phung gŭ tâm ƀon Yêrusalem nhĭm klâng ma Y-Jôsia.

²⁵ Y-Yêrêmi nchih nau mprơ rngot ma Y-Jôsia. Kŏ tât ta nar aơ, lĕ rngôch phung bu klâu bu ur ăt hôm mprơ nau mprơ rngot ma Y-Jôsia, jêh ri nau nây jêng du nau vay tâm bri Israel; lĕ nau aơ bu nchih jêh tâm Ndrom Samƀŭt Nau Mprơ Rngot.

²⁶ Lĕ kan êng Y-Jôsia ƀư, lĕ kan ueh păng ƀư tĭng nâm nau bu nchih jêh tâm nau vay Brah Yêhôva,

²⁷ lĕ kan păng ntơm bơh saơm tât nglĕ dŭt, aơ bu nchih jêh tâm ndrom samƀŭt Phung Hađăch Israel jêh ri Yuđa.